ဂျွန်နသန်၊ နိရဉ္စရာ၊ မေလ ၂၃/၂၀၂၄

မက္ကဆီကိုနိုင်ငံတွင် ရွေးကောက်ပွဲ မဲဆွယ်စည်းရုံးရေး စင်မြင့်တစ်ခု ပြိုကျခဲ့ရာ လူကိုးဦး သေဆုံးပြီး အနည်းဆုံးလူ၆၃ ဦး ဒဏ်ရာရခဲ့ကြောင်းရိုက်တာသတင်းကဖော်ပြသည်။

မက္ကဆီကိုနိုင်ငံမြောက်ပိုင်း နူဗိုလီယွန်ပြည်နယ်တွင် မေ ၂၂ ရက် (ဗုဒ္ဓဟူးနေ့)ကပြုလုပ်သည့် လူထုလှုပ်ရှားမှုပါတီ၏ ရွေးကောက်ပွဲမဲဆွယ်စည်းရုံးရေးပွဲတစ်ခုတွင် လေပြင်းတိုက်ခတ်မှုကြောင့် စင်မြင့်ပြိုကျခဲ့ခြင်းဖြစ်သည်။

သေဆုံးသူများတွင်အရွယ်ရောက်ပြီးသူ ရှစ်ဦးနှင့် ကလေးတစ်ဦးတို့ဖြစ်ကြောင်းအနည်းဆုံးလူ ၆၃ ဦး ဒဏ်ရာရခဲ့ကြောင်းပြည်နယ်အုပ်ချုပ်ရေးမှူးSamuel Garcia က သတင်းထောက်များကိုပြောကြားသည်။

ဒဏ်ရာရသူအများအပြားကို ဒေသတွင်း ဆေးပေးခန်းများတွင် ကုသပေးနေကြောင်း မက္ကဆီကိုလူမှုဖူလုံရေး အင်စတီကျုမှ ဒါရိုက်တာက သတင်းထုတ်ပြန်ခဲ့သည်။

လူထုလှုပ်ရှားမှုပါတီမှ သမ္မတလောင်း Jorge Alvarez Maynez က လေပြင်းတိုက်ခတ်မှုကြောင့် စင်မြင့်ပြိုလဲသွားကြောင်းပြောကြားခဲ့သည်။

မတော်တဆဖြစ်စဥ်နှင့်ပတ်သက်ပြီး ဗီဒီယိုတစ်ခုတွင် အခမ်းအနား စင်မြင့်သည် လူအုပ်ထဲသို့ ရုတ်တရက်ပြိုကျကာ နိုင်ငံရေးသမားများနှင့်တက်ရောက်လာသူများ ထိတ်လန့်တကြား ပြေးလွှားနေပုံကိုပြသခဲ့သည်။

Alvarez Maynez ၏မဲဆွယ်စည်းရုံးရေးမှူးLaura Ballesteros သည်ခြေ ဖဝါးရိုးကျိုးသွားသဖြင့် ဆေးရုံတင်ထားရပြီးSan Pedro Garza Garcia ၏မြို့တော်ဝန်လောင်း LoreniaCanavati က ထိခိုက်ခံရသူများနှင့် ၎င်းတို့၏ မိသားစုများကိုထောက်ပံ့ရန် အာဏာပိုင်များနှင့် ညှိနှိုင်းနေသည်ဟု လူမှုမီဒီယာတွင်ရေးသားခဲ့သည်။

မက္ကဆီကိုအမျိုးသားအစောင့်တပ်ဖွဲ့ဝင်များနှင့် စစ်တပ် မှတပ်ဖွဲ့ ဝင်များသည် အခင်းဖြစ်ပွားရာ နေရာသို့ ထောက်ပံ့ကူညီရန် ရောက်ရှိခဲ့ကြောင်း ပြည်ထဲရေးဝန်ကြီး Luisa Alcalde ကဆိုရှယ်မီဒီယာမှတဆင့် ပြောကြားခဲ့သည်။

ပြင်းထန်သောမိုးသက် မုန်တိုင်းများ ကြောင့် အဆိုပါ ဧရိယာအတွင်း နေထိုင်သူများကိုအိမ်တွင်း၌သာ နေထိုင်ကြရန် အုပ်ချုပ်ရေးမှူး Garcia က သတိပေးထားသည်။

Alvarez Maynez က၄င်း၏ မဲဆွယ်စည်းရုံးရေး လှုပ်ရှားမှုများကို ရပ်ဆိုင်းထားလိုက်ကြောင်း၊အာဏာပိုင်များကဖြစ်စဉ်အား စုံစမ်းဖော်ထုတ် ရာတွင်ပွင့်လင်းမြင်သာမှုရှိမည်ဟု၄င်းအနေဖြင့် မျှော်လင့်ပါကြောင်း ပြောကြားခဲ့သည်။

လူထုလှုပ်ရှားမှုပါတီမှ သမ္မတလောင်းဖြစ်သူ Alvarez Maynez သည် ဇွန်လ ၂ ရက်၌ ကျင်းပမည့် မက္ကဆီကိုသမ္မတရွေးကောက်ပွဲတွင် ဝင်ရောက်ယှဥ်ပြိုင်မည့်သူဖြစ်ပြီး ရွေးကောက်ပွဲ မဲဆွယ်စည်းရုံးရေးပွဲပြုလုပ်နေစဥ်အတွင်း လေပြင်းတိုက်ခတ်မှုကြောင့် စင်မြင့်ပြိုကျခဲ့သည့် မတော်တဆဖြစ်မှုနှင့်ကြုံတွေ့ခဲ့၇ခြင်းဖြစ်သည်။Source/Reuters