လာမည့်ငါးနှစ်အတွင်း ရုရှားနှင့် ဖြစ်ပွားလာမည့် စစ်ပွဲအတွက် ဂျာမနီက ကြိုတင်ပြင်ဆင်မှုများ ပြုလုပ်

ဂျွန်နသန်၊ နိရဉ္စရာ၊ ဇွန် ၁၀/၂၀၂၄

လာမည့်ငါးနှစ်အတွင်း ရုရှားနှင့် ဖြစ်ပွားလာမည့် စစ်ပွဲအတွက် ဂျာမနီက ကြိုတင်ပြင်ဆင်မှုများ ပြုလုပ်နေကြောင်းသိရသည်။

ဂျာမနီသည်  လူငယ်များကို စစ်မှုထမ်း စေခြင်း၊ စားနပ်ရိက္ခာများကို ခွဲတမ်း  ချခြင်း၊ စစ်ပွဲကာလ အတွင်း မြေအောက်ရထားဘူတာရုံများကို ဗုံးခိုအောင်း ရာနေရာ အဖြစ်ပြောင်းလဲ ခြင်း စသည့်ရုရှားနှင့် အနာဂတ်တွင် ဖြစ်ပွားလာမည့် ပဋိပက္ခ(စစ်ပွဲ)အတွက် ကြိုတင်ပြင်ဆင်မှုများ ပြုလုပ်နေကြောင်း အစိုးရအဖွဲ့ သစ်၏ အဆိုအရသိရသည်။

ဂျာမနီသည် လာမည့်ငါးနှစ်တွင် ရုရှားနှင့် စစ်ဖြစ်ရန် မျှော်မှန်းထားကြောင်း ဖော်ပြထားသည့် စာမျက်နှာ ၆၇ မျက်နှာပါ အစီရင်ခံစာကို ထုတ်ပြန်ခဲ့ကြောင်း ဇွန်၆ရက်က  တယ်လီဂရပ်သတင်းဖော်ပြချက်အရ သိရသည်။

စစ်ပွဲဖြစ်ပွားပါက အရပ်သားပြည်သူများအပေါ် မည်ကဲ့သို့ အကျိုးသက်ရောက်မှုရှိမည် ဆိုသည်ကို ထည့်သွင်း  ဖော်ပြထားသည့် စာမျက်နှာ ၆၇ မျက်နှာပါ အချက်အလက်များကို ဂျာမန်အရာရှိများက ထုတ်ပြန်ခဲ့ပြီး အထူးသဖြင့် စစ်တပ်ကို အထောက် အကူပေး နိုင်သည့် အသက်မွေးဝမ်းကြောင်း လုပ်ကိုင်သူများ အပေါ်မည်ကဲ့သို့အကျိုးသက်ရောက်မှုရှိမည်ဆိုသည်ကိုအဆိုပါ အစီရင်ခံစာတွင် အကျဉ်းချုပ်ဖော်ပြထားသည်။

လူငယ်များ စစ်မှုထမ်းဆောင် ခြင်းသည် ဂျာမနီနိုင်ငံသို့ တဖန် ပြန်လည် ရောက်ရှိလာမည်ဖြစ်သည်ဟု ဆိုသည်။

ဂျာမန်အစိုးရသည်   တစ်နေ့လျှင် အနည်းဆုံး  အစားအစာတစ်နပ်စာအတွက် ရိက္ခာကိုလည်း ခွဲတမ်းချပေးမည်ဖြစ်ပြီး  စားနပ်ရိက္ခာဖူလုံရန်အတွက်ပြောင်းဆန်များကို လည်း လျှို့ဝှက်စွာ သိမ်းဆည်းသိုလှောင်သွားမည်ဖြစ်သည်။

ထို့အပြင် ဂျာမန်စီးပွားရေးလုပ်ငန်းများကိုလည်း ကာကွယ်ရေးဆိုင်ရာထုတ်လုပ်မှုလုပ်ငန်းများဘက်သို့ ပြောင်းလဲရန် လိုအပ်မည်ဖြစ်ပြီး အရှေ့ဘက်ခြမ်းဒေသတွင် စစ်ပွဲအတွင်း ထိခိုက်ကျဆုံးမှု အများအပြားကို လက်ခံကုသရန် ဆေးရုံများကိုလည်း ကြိုတင်ပြင်ဆင်ထားရန် ညွှန်ကြားထားသည်ဟု အစီရင်ခံစာတွင်ဖော်ပြထားသည်။

ဂျာမန်ကာကွယ်ရေးဝန်ကြီး Boris Pistorius သည် ရုရှားက ယူကရိန်းကို ကျူးကျော်ဝင်ရောက်ခဲ့ မှုကို တုံ့ပြန်သည့်အနေဖြင့် ဂျာမနီနိုင်ငံကို “စစ်ပွဲ - အသင့် အနေအထား ”  နိုင်ငံ အဖြစ်သို့ ပြောင်းလဲသွားမည်ဟု ကတိပြုထားပြီး၊ ရုရှားနှင့် တိုက်ရိုက် ပဋိပက္ခ(စစ်ပွဲ) သည် အနည်းဆုံး ငါးနှစ်အတွင်း ဖြစ်ပွားနိုင်သည်ဟု သတိပေးထားသည်။

ယူကရိန်းကို ရုရှားကကျူးကျော်မှု အပြီးတွင် စိုးရိမ်မှုမြင့်တက်လာသည့် ဂျာမနီသည် စစ်တပ် အတွက် အထူးရန်ပုံငွေ ယူရို ၁၀၀  ဘီလီယံ ပေးအပ်ရန် တောင်းဆိုထားပြီး ယင်းသည် ဘတ်ဂျက် GDP ၂ရာခိုင်နှုန်း  အထက်သို့တို့မြှင့်ခဲ့ခြင်းဖြစ်သည်။

ဂျာမနီသည်၂၀၂၅ ခုနှစ်တွင်  စစ်တပ် ကို  စစ်သားအင်အား ၂၀၃၀၀၀ ခန့် အထိ တိုးချဲ့ရန် ရည်မှန်းထားသည်ဟုဆိုသည်။

Source/The Telegraph