စိန့်မာတင်ကျွန်း၏ လုံခြုံရေးနှင့် ပတ်သက်၍ ကောလာဟလသတင်းများကို မယုံကြည်ကြဖို့ ISPR က တိုက်တွန်း

ဂျွန်နသန်၊ နိရဉ္စရာ၊ ဇွန် ၁၇/၂၀၂၄

နတ်မြစ်၀ရှိ စိန့်မာတင်ကျွန်း (ရခိုင်အခေါ် အုန်းကျွန်း) ၏ လုံခြုံရေးနှင့် ပတ်သက်၍ ဆိုရှယ်မီဒီယာပေါ်တွင် ပျံ့နှံ့နေသည့် ကောလာဟလ သတင်းများကို ပြည်သူလူထုအနေဖြင့် မယုံကြည်ကြဖို့ ဘင်္ဂလားဒေ့ရှ် ပြည်သူ့ဆက်ဆံရေး ညွှန်ကြားမှု ဦးစီးဌာန (ISPR) က တိုက်တွန်း ပြောကြားလိုက်သည်။

စိန့်မာတင်ကျွန်းနှင့် အနီးတွင် ဖြစ်ပွားနေသည့် မြန်မာပြည်တွင်းပဋိပက္ခများကြောင့် ရပ်ကွက် အချို့တွင်စိန့်မာတင်ကျွန်း၏ လုံခြုံရေးနှင့် ပတ်သက်၍ ကောလာဟလသတင်းများ ဆိုရှယ်မီဒီယာ ပေါ်တွင် ပျံ့နှံ့နေကြောင်း (ISPR) က တနင်္လာနေ့ (ဇွန်လ ၁၆ ရက်)တွင် သတင်း ထုတ်ပြန် ကြေညာခဲ့သည်။

“ဒီလို ကောလဟာလသတင်း တွေနဲ့ လူတွေ ကို မလှည့်စားဖို့ တိုက်တွန်းပါတယ်” ဟု အဆိုပါသတင်း ထုတ်ပြန်ချက်တွင်ဖော်ပြထားသည်။

ရခိုင်ပြည်နယ်အတွင်း မြန်မာ့တပ်မတော်နှင့် အာရက္ခတပ်တော်တို့ တိုက်ပွဲဖြစ်ပွားနေသည်ဟု အဆိုပါထုတ်ပြန်ချက်တွင်ဆက်လက်ဖော်ပြထားသည်။

ယင်းဖြစ်စဥ်များကြောင့် နတ်မြစ်နှင့် အနီးတဝိုက်ရှိ ဘင်္ဂလားဒေ့ရှ် စက်လှေများကို ပစ်ခတ်မှု ဖြစ်ပွားခဲ့ပြီးအဆိုပါဖြစ်ရပ်အပေါ် တုံ့ပြန်သည့်အနေဖြင့် ဘင်္ဂလားဒေ့ရှ် နိုင်ငံခြားရေး ဝန်ကြီးဌာနက ဇွန်လ ၁၂ ရက်က ကန့်ကွက် ခဲ့သည်။

မြန်မာ့ရေတပ်သည် စိန့်မာတင်ကျွန်းအနီးရှိ ရေပိုင်နက်များမှနေ၍ ရက္ခိုင့်တပ်မတော် တည်ရှိ ရာနေရာများသို့ ပစ်မှတ်ထား တိုက်ခိုက်နေပြီး ရက္ခိုင့်တပ်မတော်ကလည်း လက်တုံ့ပြန်တိုက်ခိုက်​ခဲ့သည်ဟုဖော်ပြသည်။

မြန်မာ့ရေတပ်မှ စစ်သင်္ဘောအများအပြားသည် နယ်စပ်အနီးတွင်စစ်ဆင်ရေးလုပ်ဆောင် နေပြီး ၎င်းတို့ရောက်ရှိနေသည့်အကြောင်းကို ဘင်္ဂလားဒေ့ရှ် ရေတပ်သို့ အကြောင်းကြားထားကြောင်း ISPR မှ ပြောကြားခဲ့သည်။

ဘင်္ဂလားဒေ့ရှ် ရေတပ်နှင့် ကမ်းရိုးတန်းစောင့်တပ် တို့သည် အဆိုပါ တိုက်ပွဲဖြစ်ပွားနေမှု အခြေအနေကို စောင့်ကြည့်ရန် ပုံမှန် ကင်းလှည့်မှုများလုပ်ဆောင်လျက်ရှိကြောင်း ISPR မှ ထပ်လောင်း ပြောကြားခဲ့သည်။

အဆိုပါ သတင်းတွင် ပျံ့နှံ့နေသော ကောလဟလနှင့် ပတ်သက်ပြီး တစုံတစ်ရာ ရေးသားဖော်ပြထားခြင်း မရှိပါ။

 Ref: Financial Express/SPR warns against social media rumours about Saint Martin’s Island security