(အာဏာသိမ်းကြိုးပမ်းသည့် စစ်တပ်အကြီးအကဲဗိုလ်ချုပ်ကြီးနှင့် ရေတပ် ဒုတိယဗိုလ်ချုပ်ကြီး တို့ဖမ်းဆီးခံရ)
ဂျွန်နသန်၊ နိရဉ္စရာ၊ ဇွန် ၂၇/၂၀၂၄
ဘိုလီးဗီးယားတွင် စစ်တပ်ကအာဏာသိမ်းရန်ကြိုးစားခဲ့ရာ မအောင်မြင်ခဲ့ဘဲ စစ်တပ်အကြီးအကဲ ဗိုလ်ချုပ်ကြီးနှင့် ရေတပ်မှ ဒုတိယဗိုလ်ချုပ်ကြီးတို့သည် အာဏာသိမ်းရန် ကြိုးပမ်းမှုဖြင့် ဖမ်းဆီးခံလိုက်ရသည်။
ဘိုလီးဗီးယားစစ်ဦးစီးချုပ် ဗိုလ်ချုပ်ကြီး Juan José Zúñiga ဦးဆောင်သော သံချပ်ကာယာဉ်များ သည် ဇွန်လ(၂၆)ရက်က လာပက်ဇ်ရှိ အစိုးရနန်းတော် တံခါးများကို ဖောက်ထွင်း ဝင်ရောက်စီးနင်းခဲ့ ပြီး အာဏာသိမ်းရန် ကြိုးပမ်းခဲ့သည်။
သမ္မတ Luis Arce က အဆိုပါ လုပ်ရပ်အား အာဏာသိမ်းမှုအဖြစ် ရှုတ်ချလိုက်ပြီး နိုင်ငံတကာ၏ ထောက်ခံမှုကို တောင်းခံလိုက်ပြီးနောက်တွင် Zúñiga ဦးဆောင်သော တပ်ဖွဲ့များသည် နန်းတော်အတွင်းမှ လျင်မြန်စွာ ပြန်လည်ဆုတ်ခွာသွားခဲ့ပြီး ပုန်ကန်မှုသည် ဆုံးသတ်သွားခဲ့သည်။
သမ္မတ Arce ကို ထောက်ခံသူ ရာပေါင်းများစွာသည် နန်းတော်အပြင်ဘက်ရှိ ရင်ပြင်ဆီသို့ အပြေးအလွှား ရောက်ရှိလာကြသည်။ယင်းနောက် ဘိုလီးဗီးယား အလံများကို ဝှေ့ယမ်းကာ နိုင်ငံတော်သီချင်း သီဆိုပြီးသမ္မတ Arce ကို အားပေးခဲ့ကြပြီးနောက် အောင်ပွဲခံခဲ့ကြသည်။
နာရီပိုင်းအကြာတွင် Zúñiga နှင့် ရေတပ်မှ ဒုတိယဗိုလ်ချုပ်ကြီး Juan Arnez Salvador တို့ကို ဖမ်းဆီးလိုက်ပြီးနောက် အာဏာသိမ်းရန် ကြိုးပမ်းမှုသည် အဆုံးသတ်သွားခဲ့ရသည်။
ယင်းနောက် သမ္မတ Arce က စစ်တပ်အကြီးအကဲ အသစ်ကို ခန့်အပ်တာ၀န် ပေး လိုက်သည်။
Zúñiga အပြင် ရေတပ် ဒုဗိုလ်ချုပ်ကြီး Juan Arnez Salvador ကိုလည်း ဖမ်းဆီးထိန်းသိမ်းထားကြောင်း အစိုးရ၀န်ကြီး Eduardo del Castillo မှ ပြောကြားခဲ့သည်။
" ဒီအဖွဲ့ရဲ့ ပန်းတိုင်က ဘာလဲ။ ရည်ရွယ်ချက်ကတော့ ဒီမိုကရေစီနည်းကျ ရွေးကောက် တင်မြှောက်ထားတဲ့ သူတွေကို ဖြုတ်ချဖို့ပါပဲ” ဟု Castilloက သတင်းထောက်များကို ပြောကြားခဲ့သည်။
“ယခုလုပ်ရပ်သည်ဒီမိုကရေစီနှင့် ဖွဲ့စည်းပုံအခြေခံဥပဒေကို တိုက်ခိုက်ခဲ့ခြင်း” ဟု တရားရေးဝန်ကြီး Iván Lima က ပြောကြားခဲ့သည်။
Zúñiga သည် အမြင့်ဆုံးထောင်ဒဏ် (၁၅) နှစ်မှ (၂၀) နှစ်အထိ ချမှတ်ခံရနိုင်ကြောင်း Lima က ဆိုရှယ်မီဒီယာပလပ်ဖောင်း X မှတစ်ဆင့်ပြောကြားခဲ့သည်။
Source/AP,Times of India