မြောက်ကိုရီးယား တပ်ဖွဲ့၀င်များကို ရုရှားသို့ စေလွှတ်မည်

ဂျွန်နသန်၊ နိရဉ္စရာ၊ ဇွန် ၃၀

ရုရှားနှင့်ယူကရိန်းတို့ ဖြစ်ပွားနေသည့် ပဋိပက္ခ တွင် ရုရှားအား ကူညီရန်အတွက် မြောက်ကိုရီးယားက ၄င်း၏ တပ်ဖွဲ့၀င်များကို ရုရှားသို့ စေလွှတ်မည်ဟုသိရသည်။

ပြီးခဲ့သည့် သီတင်းပတ်က သမ္မတ ဗလာဒီမာ ပူတင်သည် (၂၅) နှစ်အတွင်း ပထမဆုံးအနေဖြင့် မြောက်ကိုရီးယားနိုင်ငံသို့ တရားဝင် အလည်အပတ်သွားရောက် ခဲ့ပြီး အဆိုပါ ခရီးစဉ်အတွင်း ပူတင်နှင့် ကင်ဂျုံအွန်း တို့သည် ကာကွယ်ရေးဆိုင်ရာ သဘောတူညီချက်တစ်ရပ်ကို ဇွန် (၁၉)ရက်က ပြုံယမ်း၌ လက်မှတ်ရေးထိုးခဲ့ကြသည်။

အဆိုပါ သဘောတူညီချက် အရ မြောက်ကိုရီးယားသည် Donetsk ဒေသတွင် ရုရှားတပ်ဖွဲ့များကို ထောက်ပံ့ကူညီရန်အတွက် စစ်အင်ဂျင်နီယာတပ်ဖွဲ့တစ်ဖွဲ့ကို စေလွှတ်မည်ဖြစ်ပြီး လာမည့်လ အစောပိုင်းတွင် တပ်ဖွဲ့များရုရှားသို့ သွားရောက်ရန် မျှော်လင့်ထားကြောင်း Kyiv Post သတင်းက ဖော်ပြထားသည်။

ပူတင်နှင့်ကင်ဂျုံအွန်းတို့သည်ပြီးခဲ့သည့်နှစ်စက်တင်ဘာလအတွင်း က ရုရှားနိုင်ငံ ၌ တွေ့ဆုံခဲ့ကြပြီး နောက် မြောက်ကိုရီးယားသည် ရုရှားအား အမြောက်ကျည် နှစ်သန်းနီးပါးနှင့် ပဲ့ထိန်းဒုံးကျည်များ ကိုထောက်ပံ့ကူညီပေးခဲ့ပြီးဖြစ်သည်။

ယူကရိန်းကိုတိုက်ခိုက်နေသည့် တရားမဝင်စစ်ပွဲတွင် သတ်ဖြတ်ရန်အတွက် မြောက်ကိုရီးယားက ၄င်း၏ တပ်ဖွဲ့ဝင်များကို ရုရှားသို့ စေလွှတ်ထားကြောင်းပင်တဂွန်ပြောရေးဆိုခွင့်ရှိသူ Pat Ryder က ဇွန် ၂၅ ရက်က ပြုလုပ်သည့် သတင်းစာရှင်းလင်းပွဲတွင်ထုတ် ဖော်ပြောကြား ခဲ့သည်။

Source/Times of India and Photo by Kypdo News