ဂျွန်နသန်၊ နိရဉ္စရာ၊ ဇူလိုင် ၁၇/၂၀၂၄

အိုမန်နိုင်ငံ၊ဝါဒီအယ်လ်ကာဗီးယား ရှိ (Shiitemosque) ဗလီ အနီးတွင် ပစ်ခတ်မှုဖြစ်ပွားခဲ့ရာ လူ ၆ ဦးထက် မနည်းသေဆုံးပြီး ၃၀ ခန့် ဒဏ်ရာ ရရှိခဲ့ကြောင်းအိုမန်ရဲတပ်ဖွဲ့က ဇူလိုင်(၁၆)ရက်တွင် ပြောကြားခဲ့သည်။

"တော်ဝင်အိုမန်ရဲတပ်ဖွဲ့ရဲ့ကနဦးရရှိထားတဲ့ သတင်းအရ ဝါဒီအယ်လ်ကာဗီးယားဒေသမှာရှိတဲ့ ဗလီတစ်ခုအနီးတစ်ဝိုက်မှာ ပစ်ခတ်မှုများဖြစ်ပွားခဲ့လို့လူ ၆ ဦးသေဆုံးပြီးအခြားလူအများအပြား ဒဏ်ရာရရှိခဲ့ပါတယ်"ဟု တော်ဝင်အိုမန်ရဲတပ်ဖွဲ့၏ X လူမှုကွန်ရက်တွင်ရေးသား ဖော်ပြထားသည်ကိုတွေ့၇သည်။

လက်ရှိအခြေအနေကိုကိုင်တွယ်ဖြေရှင်းရန် လုံခြုံရေးအစီအမံများအားလုံးကို လုပ်ဆောင်ပြီးစီးပြီ ဖြစ်ကြောင်း၊ ပစ်ခတ်မှုဖြစ်ပွားရခြင်း နှင့်ဆက်စပ်သည့် အထောက်အထားများကိုစုဆောင်းခြင်းနှင့် စုံစမ်းစစ်ဆေးခြင်းဆိုင်ရာ လုပ်ထုံးလုပ်နည်းများဆောင်ရွက်ပြီးစီးနေပြီဟုတော်ဝင်အိုမန်ရဲတပ်ဖွဲ့က ဆက်လက်ပြောကြားခဲ့သည်။

သို့သော်မည်သည့်အတွက်ကြောင့်ပစ်ခတ်မှုဖြစ်ပွားရသည်ဆိုသည့်အသေးစိတ်ကိုမူအိုမန်ရဲတပ်ဖွဲ့ကသတင်းထုတ်ပြန်ခြင်းမရှိခဲ့သလို တိုက်ခိုက်မှုအတွင်း သံသယရှိသူကိုလည်းဖော်ထုတ်နိုင်ခြင်းမရှိသေးပေ။

သို့သော် DW၏ သတင်းတွင်  ၎င်းပစ်ခတ်မှုကိုIS အဖွဲ့က ပြုလုပ်ကြောင်း၎င်းအဖွဲ့က ဝန်ခံ ပြောကြားထားပြီး သေဆုံးသူ ၆ ဦးအထဲတွင် ပါကစ္စတန်နိုင်ငံသား ၄ ဦး ပါဝင်ကြောင်းဖော်ပြထားသည်။

အမေရိကန်နိုင်ငံသားများအနေဖြင့်အဆိုပါပစ်ခတ်မှုဖြစ်ပွားခဲ့သည့်နေရာမှ ခပ်ဝေးဝေးတွင် နေကြ ရန် အိုမန်နိုင်ငံရှိ အမေရိကန်သံရုံးက သတိပေးချက်ထုတ်ပြန်ခဲ့သည်။ Source/Times of India andDW