ဂျွန်နသန်၊ နိရဉ္စရာ၊ ဩဂုတ်၂၂/၂၀၂၄

အိန္ဒိယတွင် ဆေးဝါးစက်ရုံ ပေါက်ကွဲမှုကြောင့် အနည်းဆုံး လူ(၁၇)ဦးသေဆုံးခဲ့ပြီး၊ လူ (၄၀)ဦးခန့် ပြင်းထန်စွာ ဒဏ်ရာရရှိခဲ့ကြောင်း တာဝန်ရှိသူများကပြောကြားသည်။

အိန္ဒိယနိုင်ငံတောင်ပိုင်း ၊ အန်ဒရာပရာဒေ့ရှ် ပြည်နယ်၊ Anakapalliရှိ ဆေးဝါးစက်ရုံတစ်ရုံတွင် သြဂုတ်လ(၂၁)ရက်ကပေါက်ကွဲမှုဖြစ်ပွားခဲ့ရာ၊ အနည်းဆုံး လူ (၁၇)ဦး သေဆုံးခဲ့ပြီးလူ (၄၀)ဦးခန့်ဒဏ်ရာပြင်းထန်စွာ ရရှိခဲ့ကြောင်း ၊ ရဲတပ်ဖွဲ့က ပြောကြားခဲ့သည်။

ဆေးဝါးစက်ရုံရှိဓာတုဓာတ်ပေါင်းဖိုပေါက်ကွဲခဲ့ခြင်းဖြစ်ကြောင်း၊ ပေါက်ကွဲမှုသည်အင်အားအလွန်ပြင်းထန်သဖြင့် အလုပ်သမားများသည် အရေပြား မီးလောင်ဒဏ်ရာများ ပြင်းထန်စွာခံစားခဲ့ရကြောင်း၊ သေဆုံးသူများ၏ ရုပ်အလောင်းများသည်လည်း တစ်စစီဖြစ်သွားကာအခင်းဖြစ်ပွားရာ နေရာအနှံ့ပြန့်ကျဲနေခဲ့သည်ဟုရဲတပ်ဖွဲ့ကသြဂုတ်လ(၂၂)ရက်ကပြောဆိုခဲ့သည်။

"ပေါက်ကွဲမှု ဒဏ်သင့်ခဲ့ရတဲ့ အလုပ်သမားတွေဟာကြောက်မက်ဖွယ်ရာ မီးလောင်တဲ့ ဒဏ်ရာတွေ ခံစားခဲ့ရပါတယ်။ဒါဟာ အင်မတန်မှကြောက်စရာကောင်းတယ်၊ ကြေကွဲစရာလည်းကောင်း ပါတယ်၊ သူတို့ဟာ သတိမလစ်ခင် အထိအော်ဟစ်နေခဲ့ကြတယ်"ဟု ဒေသခံရဲအရာရှိ M Buchaiah ကIndian Express သတင်းစာကို ပြောကြားခဲ့သည်။

ပေါက်ကွဲမှုဖြစ်ပွားခဲ့မှုနှင့်ပတ်သက်ပြီး စုံစမ်းစစ်ဆေးဖို့ပြည်နယ်အစိုးရကအမိန့်ထုတ်ပြန်ထားပြီး၊ အိန္ဒိယဝန်ကြီးချုပ် နာရန်ဒါမိုဒီက လည်းသေဆုံးသူများအတွက် ဝမ်းနည်းကြောင်း ပြောကြားခဲ့ပါသည်။

"Anakapalli ရှိ စက်ရုံတစ်ခုတွင် မတော်တဆမှု ကြောင့်အသက် ဆုံးရှုံးခဲ့ရသူများအတွက် ဝမ်းနည်းကြောင်း " ဝန်ကြီးချုပ် မိုဒီ က Xလူမှုကွန်ရက်တွင် ရေးသားဖော်ပြခဲ့သည်။

သေဆုံးသူများနှင့် ၎င်းတို့၏ မိသားစုများထံ ငွေကြေးများ ပံ့ပိုးကူညီပေးအပ် သွားမည်ဖြစ်ကြောင်း ၎င်းက ဆက်လက်ပြောဆိုသည်။ အဆိုပါဆေးဝါးစက်ရုံသည် အိန္ဒိယနိုင်ငံတောင်ပိုင်း၊ အန်ဒရာပရာဒေ့ရှ် ပြည်နယ်၏မြို့တော်ဖြစ်သည့် Amaravati ၏ အရှေ့မြောက်ဘက် ကီလိုမီတာ ၃၅၀ ခန့်အကွာ Anakapalli ရှိ ခရိုင်ရှိ Escientia ကုမ္ပဏီတွင် သြဂုတ်လ(၂၁)ရက်က ပေါက်ကွဲမှု ဖြစ်ပွားခဲ့ခြင်းဖြစ်သည်။

ယင်း ဆေးဝါးကုမ္ပဏီတွင် အလုပ်သမား ၃၈၀ ခန့်ရှိပြီး ပေါက်ကွဲမှုဖြစ်ပွားပြီး၊ မီးလောင်မှုဖြစ်ပွားချိန်တွင် အများအပြားမှာ ကံကောင်း ထောက်မစွာဖြင့်လွတ်မြောက်ခဲ့ကြသည်။

ဓာတုဓာတ်ပေါင်းဖိုတွင်ပေါက်ကွဲမှုဖြစ်ပွားခဲ့ရခြင်းနှင့်ပတ်သက်ပြီး၊ တာဝန်ရှိသူများက CCTV မှတ်တမ်းများကို စစ်ဆေးလျက်ရှိပြီး ပေါက်ကွဲမှုဖြစ်ပွားရခြင်းသည် လူ၏မှားယွင်းမှုကြောင့်ဖြစ်ပွားရခြင်း ရှိ၊ မရှိ ကို စစ်ဆေးမေးမြန်းမှုများ ပြုလုပ်လျက်ရှိသည်။

ပေါက်ကွဲမှုဖြစ်ရခြင်းသည် ဓာတ်ငွေ့ယိုစိမ့်မှုကြောင့်ဖြစ်ကြောင်း၊ယိုစိမ့်လာသည့် ဂတ်စ် များသည် နောက်ဆုံးတွင် လျှပ်စစ်အကန့်ကိုထိမှန်သွားခဲ့ခြင်းကြောင့်ပေါက်ကွဲမှုဖြစ်ခဲ့ခြင်း ဖြစ်ကြောင်းစုံစမ်းစစ်ဆေးသူများက ယုံကြည်လက်ခံထားကြောင်း ခရိုင်ရဲမှူး M.Deepika က ပြောကြားခဲ့သည်။

အိန္ဒိယနိုင်ငံသည် ဆေးဝါးထုတ်လုပ်ရာတွင် ကမ္ဘာပေါ်တွင်အချက်အချာကျသော်လည်း ပိုင်ရှင်များသည် စည်းကမ်းများ၊ ဘေးကင်းရေး စံနှုန်းများကိုလိုက်နာမှုမရှိကြသည့်အတွက်ကြောင့် စက်ရုံ မီးလောင်ကျွမ်းမှုဖြစ်စဥ်များအဖြစ်များလျက်ရှိကြောင်းသိ၇ သည်။ Source/DhakaTribute