ခိုင်လူလှ (ရိုးမမြီ) စက်တင်ဘာ ၂၉/၂၀၂၄

ဩစတြေးလျနိုင်ငံ၊ ဆစ်ဒနီမြို့တွင် ဘင်္ဂလားဒေ့ရှ်နိုင်ငံ ဌာနေတိုင်းရင်းသား၁၅၀ ခန့်က ယနေ့ စက်တင်ဘာ ၂၉ ရက် နံနက်က ဆန္ဒပြခဲ့ကြသည်။

ယခုကဲ့သို့ ဆန္ဒပြရခြင်းမှာ လွန်ခဲ့သည့် ရက်အနည်းက စစ်တကောင်းတောင်တန်းနယ်ခါကာဆိုရီနှင့် ရန္ကာမတီခရိုင်တွင် ဌာနေတိုင်းရင်းသားများအား ဘင်္ဂလီရွှေ့ပြောင်းအခြေချသူများက တိုက်ခိုက်မှုနှင့် ပတ်သက်ပြီး ဆန္ဒပြခဲ့ကြခြင်းဖြစ်သည်ဟု သိ၇သည်။

ဆန္ဒပြပွဲတွင် ပူးပေါင်းပါဝင်ခဲ့သူ တစ်ဦးက “ ဒီဆန္ဒပြပွဲ အခမ်းအနားကိုမနက် ၁၀ နာရီကနေ ၁၂ နာရီထိ Sydney Town Hall ရှေ့မှာပြုလုပ်ခဲ့ပါတယ်။ လူပေါင်း ၁၅၀ လောက် ပူးပေါင်းပါဝင်ခဲ့ပါတယ်။ဘင်္ဂလားဒေ့ရှ်က လူနည်းစု ဌာနေတိုင်းရင်းသားတွေဖြစ်ကြတဲ့ သက်၊ မရမာ၊ ဘရဝါ( မရမာကြီး)၊ရခိုင်၊ ထရီပူရ စတဲ့ လူမျိုးပါဝင်တယ်။ ဒါ့ပြင် နီပေါနိုင်ငံသားတွေနဲ့ ဘင်္ဂလီလူမျိုးအချို့လည်းလာရောက် ပူးပေါင်းခဲ့ကြပါတယ်”ဟု ပြောကြားသည်။

ဆန္ဒပြပွဲတွင် တောင်းဆိုမှုတချို့ကိုလည်းပြုလုပ်ခဲ့ကြသည်ဟုဆိုသည်။

၎င်းတောင်းဆိုချက်များမှာ ဘင်္ဂလားဒေ့ရှ်ရှိ လူနည်းစုများအားကာကွယ်ပေးရန်၊ဌာနေ တိုင်းရင်းသားများအား တိုက်ခိုက်မှုများအား ရပ်တန့်ရန်၊ တိုက်ခိုက်ခဲ့သူများအားအရေးယူပေးရန်နှင့် စစ်တကောင်းတောင်တန်းနယ်က ဘင်္ဂလာစစ်တပ်ကို ရုပ်သိ်မ်းပေးဖို့ တောင်းဆိုခဲ့ကြသည်ဟု သိ၇သည်။

၎င်းပြင် “လူနည်းစုများကို လေးစားပါ၊ စစ်တကောင်းတောင်တန်းနယ်တွင် ဌာနေတိုင်းရင်းသားများထံက မြေယာ လုယူနေခြင်းများကို ရပ်တန့်ပါ၊  Jummaတောင်ပေါ်သားများအတွက် တရားမျှတမှုကိုလိုလားသည်၊ ငါတို့သည့်ဘင်္ဂလားဒေ့ရှ်မှ မရမာလူမျိုးများဖြစ်ကြသည်၊ တိုက်ခိုက်မှုများကို ရပ်တန့်ပြီး လူ့အခွင့်အရေးကိုမြှင့်တင်ပါ၊ ၁၉၉၇ ခုနှစ် သဘောတူညီမှုအရ ဘင်္ဂလားစစ်တပ် စစ်တကောင်းတောင်တန်းနယ်က ရုပ်သိမ်းပါ၊တရားမျှတမှု မရှိဘဲငြိမ်းချမ်းရေး မ၇နိုင်” စသည့် ပိုစတာများ၊ ဆိုင်းဘိုး ဘန်နာများကို ကိုင်ဆောင်၍ ဆန္ဒပြခဲ့ကြသည်ဟုဆိုသည်။

စက်တင်ဘာ ၁၉ နှင့် ၂၀ ရက်များတွင်   ဗုဒ္ဓဘာသာဝင်အများစုနေထိုင်သည့် စစ်တကောင်းတောင်တန်း ခါကာဆိုရီခရိုင်Deghiniala နှင့်ရန္ကာမတီတွင် နေထိုင်ကြသည့် လူနည်းစု ဌာနေတိုင်းရင်းသားများ (Jammu) လူမျိုးများ ဖြစ်ကြသည့် သက်၊ မ၇မာလူမျိုးများအပေါ် မြေပြန့်အခြေစိုက်နေထိုင်လာကြသည့်ဘင်္ဂလီလူမျိုးများမှ တိုက်ခိုက်ခဲ့ခြင်း အပေါ် ကန့်ကွက်သည့် အနေဖြင့် ပြုလုပ်ခဲ့ကြခြင်းဖြစ်သည်ဟု၎င်းက ပြောဆိုသည်။

အဆိုပါ တိုက်ခိုက်မှုအတွင်း ဌာနေတိုင်းရင်းသား ၄ ဦးသေဆုံးခဲ့ပြီးလူပေါင်း ၇၀ ခန့် ဒဏ်ရာရရှိခဲ့ကြီး ဈေးဆိုင်နှင့် နေအိမ်ပေါင်း ၂၀၀ ခန့် မီးရှို့ဖျက်ဆီးခံခဲ့ရသည်ဟုဘင်္ဂလားဒေ့ရှ် အာဏာပိုင်များက ထုတ်ဖော်ပြောကြားသော်လည်း သေဆုံးသူအရေအတွက်မှာ ယင်းထက်မကပိုများသည်ဟု ဒေသခံများက ပြောကြားသည်။