- Web Master
- ၂၀ စက်တင်ဘာ ၂၀၂၄
နိရဉ္စရာ၊ အောက်တိုဘာ ၆/၂၀၂၄
ဗုဒ္ဓဘာသာအများဆုံးနေထိုင်သည့် ဘင်္ဂလာဒေ့ရှ်နိုင်ငံ စစ်တကောင်းတောင်နယ် ခရိုင် ၃ ခုတွင် ယခုနှစ် ဗုဒ္ဓဘာသာဝင်များ၏ အမြင့်မြတ်ဆုံး ဘာသာရေး ပွဲတော်တစ်ခုဖြစ်သည့် ‘ကထိန်ပွဲတော်’ အား မကျင်းပရန် စစ်တကောင်းတောင်တန်းနယ် သံဃာ့အဖွဲ့ (The Sammilito Bhikkhu Sangha of the Chittagong Hill Tracts) ဆုံးဖြတ်ကြေညာလိုက်သည်။
ယခုကဲ့သို့ ဆုံဖြတ်လိုက်ခြင်းမှာ စစ်တကောင်းတောင်တန်းနယ်တွင် လက်ရှိဖြစ်ပွားနေသည့် ဘာသာရေး၊ လူမျိုးရေး ပဋိပက္ခကြောင့် လုံခြုံရေးနှင့် ငြိမ်းချမ်းရေး ကင်းမဲ့နေ၍ ဖြစ်သည်ဟုဆိုသည်။
တနင်္ဂနွေနေ့က ရန္ကာမတီ (Rangamati) မြို့ ရှိ Maitree ဗုဒ္ဓဝိဟာတွင် ပြုလုပ်သည့် သတင်းစာ ရှင်းလင်းပွဲ၌ ထိုသို့ ကြေညာချက်ထုတ်ပြန်ခဲ့ခြင်းဖြစ်သည်။
ဗုဒ္ဓဘာသာဝင်များ၏ အမြင့်မြတ်ဆုံး ဘာသာရေး ပွဲတော်တစ်ခုဖြစ်သည့် ‘ကထိန်ပွဲတော်’ ကို နှစ်စဉ် ဝါကျွတ်လပြည့်ကျော် တစ်ရက်နေ့မှ တန်ဆောင်းမုန်းလပြည့်အထိ တစ်လအတွင်း ကျင်းပကြပြီး ယခုနှစ် နိုဝင်ဘာ လဆန်းမှ စတင် ကျင်းပရန်ရှိသည့် ကထိန်ပွဲများအား စစ်တကောင်းတောင်တန်းနယ် တစ်ခုလုံးတွင် ဖျက်သိမ်းလိုက်ကြောင်း ကြေညာသည်။
အဆိုပါ သတင်းစာရှင်းလင်းပွဲသို့ စစ်တကောင်းတောင်တန်းဒေသ သံဃာ့အဖွဲ့ ဥက္ကဋ္ဌ Shraddhalankar Mahathera အပါအဝင် ဒုဥက္ကဋ္ဌ၊ အတွင်းရေးမှူး ဆရာတော်ကြီးများ အပါအဝင် ရဟန်းသံဃာတော်များ တက်ရောက်ခဲ့ကြသည်။
သတင်းစာရှင်းလင်းပွဲတွင် စစ်တကောင်းတောင်တန်းနယ်ရှိ လုံခြုံရေးတပ်ဖွဲ့ဝင်များသည် များမကြာမီက ဖြစ်ပွားခဲ့သည့် လူမျိုးရေး ဘာသာရေး ပဋိပက္ခအတွင်းတွင် တိုက်ရိုက်(သို့မဟုတ်) သွယ်ဝှိုက်၍ ပါဝင်ပတ်သက်ခဲ့ကြသည်ဟု စွပ်စွဲပြောဆိုခဲ့ကြသည်။
ယနေ့အချိန်အထိ ဖြစ်ပွားခဲ့သည့် ဌာနေတိုင်းရင်းသားများ အပေါ် အစုအပြုံလိုက် တိုက်ခိုက်မှုများ အနက်မှ တစ်စုံတစ်ရာကို စစ်ဆေး အပြစ်ပေး အရေးယူခြင်း မရှိသေးဟု ဆိုသည်။
ပဋိပက္ခ ဖြစ်စဉ်များနှင့် ပတ်သက်ပြီး စုံစမ်းစစ်ဆေးရေး ကော်မတီများကို ဘင်္ဂလာအစိုးရက အမည်ခံ အဖြစ်သာ ဖွဲ့စည်းပြီး စုံစမ်းစစ်ဆေးမှုများကိုလည်း ယနေ့အချိန်ထိ မမြင်တွေ့ရသေးကြောင်း သတင်းစာရှင်းလင်းပွဲတွင် သံဃာတော်များ ပြောကြာသည်။
ဘင်္ဂလားဒေ့ရှ် အစိုးရ၏ အုပ်ချုပ်ရေးဌာနများကို သံဃာတော်များနှင့် ဗုဒ္ဓဘာသာဝင်များ၏ အယုံအကြည် မရှိဖြစ်နေသလို လုံခြုံရေးစိုးရိမ်မှုများလည်း ရှိနေကြသည်ဟု ဆိုသည်။
စက်တင်ဘာလ ၁၈ ရက်မှ ၂၀ ရက်အတွင်း ဖြစ်ပွားခဲ့သည့် စစ်တကောင်းတောင်တန်းနယ်၊ ခါကာဆိုရီနှင့် ရန္ကာမတီ ခရိုင်ရှိ လူနည်းစု ဌာနေတိုင်းရင်သားများနှင့် မြေပြန့်က အခြေချလာသည့် ဘင်္ဂလီလူမျိုးများအကြား ဖြစ်ပွားခဲ့သည့် လူမျိုး ပဋိပက္ခအတွင်း ဌာနေတိုင်းရင်းသား ၄ ဦးသေဆုံးခဲ့ပြီး ဆိုင်ခန်းပေါင်း ၁၀၀ကျော် လုယက်ဖျက်ဆီး ခံခဲ့ကြရကာ ဗုဒ္ဓရုပ်ပွားတော်များ၊ အလှူခံသေတ္တာများ လုယက်ဖျက်ဆီးခံခဲ့ရသည်ဟု သတင်းစာရှင်းလင်းပွဲတွင် ရဟန်းတော်များက ပြောကြားခဲ့သည်။
အဆိုပါ ကိစ္စနှင့် ပတ်သက်၍ စစ်တကောင်းတောင်တန်းနယ် လက်ထောက်ကော်မရှင်နာ Md. Mosharraf Hossain Khan က "ကထိန်ပွဲတော် မကျင်းပဖို့ ဗုဒ္ဓဘာသာဘုန်းကြီးတွေရဲ့ ဆုံးဖြတ်ချက်ကို ကျွန်တော်တို့ ကြားသိခဲ့ရပါတယ်။ မနက်ဖြန် တနင်္လာနေ့တွင် ခရိုင်အုပ်ချုပ်ရေးမှူးနှင့် တွေ့ဆုံရန် စီစဉ်ထားပါတယ်။ အဲဒီမှာ သူတို့ပြောတာကို နားထောင်မယ်။ တရားဥပဒေစိုးမိုးရေး အခြေအနေက ပုံမှန်ပဲလို့ ကျနော်တို့ ယူဆပါတယ်” ဟု ပြောကြားသည်။
စစ်တကောင်းတောင်တန်းနယ် ရန္ကမတီခရိုင် (သက်ထောင်)၊ ခါကာဆိုရီ( ဖလံထောင်)နှင့် ဘင်ဒရိုဘင် ခေါ် ရွာတော်ခရိုင် (ဗိုလ်မင်းထောင်) စသည့် ခရိုင် ၃ ခုရှိပြီး အဆိုပါ ခရိုင် ၃ခုတွင် ဗုဒ္ဓဘာသာဝင် သန်းနှင့်ချီပြီး နေထိုင်လျှက်ရှိကြောင်း သိရှိရသည်။
Ref: Prothom Alo