ခိုင်လူလှ (ရိုးမမြေ)၊ နိရဉ္စရာ၊ ဧပြီ ၁၁/ ၂၀၂၅

မြန်မာ့အိမ်နီးချင်း ဘင်္ဂလားဒေ့ရှ်နိုင်ငံတွင် ဒါကာမြို့တော် အပါအဝင် နေရာအများအပြားတွင် ယနေ့ ဧပြီ ၁၁ ရက်နေ့ ညနေက အင်အား ၄ ရစ်ခ်ျတာစကေးရှိ ငလျင်တစ်ခု လှုပ်ခတ်သွားကြောင်း ဘင်္ဂလားဒေ့ရှ် မိုးလေဝသဌာန (BMD) မှသတင်းထုတ်ပြန်သည်။

“ ဒါကာနဲ့ နိုင်ငံအတွင်းက အခြားနေရာအများအပြားမှာငလျင်လှုပ်ခတ်ခဲ့ပါတယ်။ငလျင်ရဲ့ ပြင်းအားက ရစ်ခ်ျတာစကေး ၄ ရှိပါတယ်။ သောကြာနေ့ ညနေ ၄ နာရီ ၅၂ မိနစ်ခန့်မှာလှုပ်ခတ်သွားတာပါ”ဟု ဘင်္ဂလားဒေ့ရှ် မိုးလေဝသဌာန (BMD) မှ မိုးလေဝသပညာရှင်(Golam Mostafa)က ပြောကြားသည်။

မြို့တော် ဒါကာ အပါအဝင် နိုင်ငံအနှံ့အပြားတွင် ငလျင်လှုပ်ခတ်ခဲ့သည်ကိုသိသိသာသာ ခံစားခဲ့ရသည်ဟု ဒေသခံများက ပြောဆိုသည်။

ငလျင်ဗဟိုချက်သည် ဒါကာမှ ၁၀၅ ကီလိုမီတာအကွာတွင်ရှိသော Brahmanbaria အနီးတစ်ဝိုက်တွင်ဖြစ်ကြောင်း ၎င်းက ထပ်လောင်းပြောကြားခဲ့သည်။

"ကျွန်တော်တို့ ဒီကိစ္စကို ဆက်လက်ဆောင်ရွက်နေတုန်းပါပဲ" ဟုGolam က ဆက်လက်ပြောကြားသည်။

ငလျင်နှင့်ပတ်သက်ပြီး ဘင်္ဂလားဒေ့ရှ်မှလူတော်တော်များများက Facebook မှာ တင်ထားကြသော်လည်းထိခိုက်ပျက်စီးမှုသတင်းကိုမူ မရရှိသေးဟုဆိုသည်။