“ ရက္ခိုင့်တပ်တော်နဲ့မဟာမိတ်တွေလည်းပါတယ်လို့တော့ သိထား၇တယ်ဗျ”

အမ်းဒေသခံတစ်ဦး

နိရဉ္စရာ(အင်တာဗျူး)၊ ဇန်နဝါရီ ၃၀/၂၀၂၄

ရက္ခိုင့်တပ်တော်(AA) ကမြို့သိမ်းတိုက်ပွဲတွေ ဖော်ဆောင်ပြီး တိုက်ပွဲပြင်းထန်နေချိန်မှာ အမ်းမြို့မှာ အခြေစိုက်တဲ့  စစ်ကောင်စီအနောက်ပိုင်းတိုင်းစစ်ဌာနချုပ် အခြေအနေဘယ်လိုရှိနေသလဲဆိုတာကို  ဒေသအတွင်းက တက်ကြွလှုပ်ရှားသူ လူငယ်တစ်ဦးနဲ့ ဆက်သွယ်မေးမြန်းပြီး တင်ပြပေးလိုက်ပါတယ်။

မေး- လက်ရှိ အမ်းမြို့ရဲ့ စစ်ရေးအခြေအနေကို တချက်ပြောပြပေးပါလား။

ဖြေ-အမ်းမြို့နယ်မှာတော့ အမ်းမြို့ရဲ့ မြို့ပေါ်ဧရိယာဖြစ်တဲ့ တဝိုက်မှာ စစ်ကောင်စီက ထိန်းချုပ်ထားတဲ့ နေရာတွေမှာပြည်သူတွေကိုသွားလာခွင့်ပိတ်ထားပါတယ်။ ရခိုင်တိုက်ပွဲစကတည်းက စစ်ကောင်စီက မြို့ပေါ်မှာရှိတဲ့ပြည်သူတွေကိုရော၊မြို့နယ်ကပြည်သူတွေကိုရော မြို့အဝင်အထွက် ပိတ်တာတွေ၊ ကုန်းလမ်း ရေလမ်းပိတ်ဆို့တာတွေလုပ်တဲ့အထဲမှာအနောက်ပိုင်းတိုင်းစစ်ဌာနချုပ်ရှိတဲ့ အမ်းမြို့လည်း အပါအဝင်ပေါ့ဗျာ။စစ်တပ်ကပိတ်ဆို့ထားတာတွေကြောင့် ပြည်သူတွေကတော့ အခက်အခဲ အကြီးအကျယ် ကြုံနေကြရတယ်။ အခုနောက်ပိုင်းမှာရက္ခိုင့်တပ်တော်နဲ့ မဟာမိတ်တွေက အနောက်ပိုင်းတိုင်းစစ်ဌာနချုပ်ကိုရော၊အမ်းမြို့နဲ့ ၂ မိုင်ဝန်းကျင်မှာနေရာယူထားတယ်လို့တော့ သိထားရတယ်ဗျ။ရက္ခိုင်တပ်တော်တခုတည်းမဟုတ်ဘဲမဟာမိတ်တပ်တွေလည်းပါနေတော့စစ်အင်အားအများအပြားရှိမှာသေချာသလောက်ရှိတယ်။ ပြီးတော့ ဇန်နဝါရီလ၂၅ ရက်မှာ အနောက်ပိုင်းတိုင်းစစ်ဌာနချုပ်ကို ရက္ခိုင့်တပ်တော်နဲ့မဟာမိတ်တွေကဝင်တိုက်မယ်ဆိုပြီး ကောလာဟလသတင်းတွေ စစ်တပ်အတွင်းမှာထွက်ပေါ်ခဲ့ပြီးတော့အမ်းမြို့မှာရှိတဲ့တပ်ရင်းတွေ၊တိုင်းစစ်ဌာနချုပ်တွေကလက်နက်ကြီးပစ်ခတ်မှုတွေလုပ်ခဲ့တယ်ဗျ။လက်ရှိအမ်းမြို့ဝန်းကျင်မှာ စစ်ရေးအခြေအနေကတော့ တင်းမာနေတယ်လို့တော့လောလောဆယ်ပြောလို့၇ပါတယ်။

မေး-နှစ်ဘက်စစ်ရေးတင်းမာမှုတွေရှိနေတယ်ဆိုတော့ ဒီကြားထဲ ထိတွေ့တိုက်ပွဲဖြစ်တာမျိုးတွေ ရှိလား။

ဖြေ-ပြီးခဲ့တဲ့တပတ်လောက်ကတော့ စစ်ကောင်စီယာဥ်တန်းကို ရက္ခိုင့်တပ်တော်က မိုင်းဆွဲ တိုက်ခိုက်ခဲ့တယ်။မိုင်းဆွဲတိုက်ခိုက်တာမှာ စစ်သားတွေသေဆုံးတာတွေရှိတယ်လို့သိရတယ်။ဒဏ်ရာရသူတွေလည်းရှိတယ်ပေါ့နော်။ အမ်း-တပ်တောင်ကားလမ်းပေါ်က ဂါယ်လောင်းကျေးရွာနဲ့ လုံးကောက်ကျေးရွာကြားက ကားလမ်းမှာမိုင်းဆွဲခဲ့တာ။ အဲဒါက အမ်းမြို့ အနောက်ပိုင်းတိုင်း စစ်ဌာနချုပ်နဲ့ တစ်မိုင်ကျော်၊ နှစ်မိုင်လောက်ပဲဝေးပါတယ်။စစ်ကောင်စီစစ်ကြောင်းက ဂါယ်လောင်းကို လာတာလို့သိရတယ်ဗျ။ဂါယ်လောင်းကနေပြီးမြို့ပေါ်ဘက်ကိုပြန်သွားနေတုန်း AA ဘက်က မိုင်းဆွဲ တိုက်ခိုက်ခဲ့တာလို့သိရတယ်။ဘယ်လောက်သေဆုံးသွားလဲ၊ဒဏ်ရာရသူ ဘယ်လောက်ရှိလဲ ဆိုတာတော့ ကျွန်တော်တို့လည်းမသိ၇ဘူး။

မေး- အမ်းမြို့နယ်မှာမြို့ပေါ်တခုမှာပဲ စစ်ကောင်စီတပ်တွေကျန်တော့တာလား။ အဲဒီအခြေအနေလေး ပြောပြပါဦး။

ဖြေ-အမ်းမြို့နယ်မှာက ဒါးလက်ချောင်းတို့၊ ကဇုကိုင်းတို့ဘက်မှာအရင်ကစစ်စခန်းတွေရှိတယ်။အခု ရခိုင်တိုက်ပွဲ ဖြစ်လာပြီးတဲ့ နောက်ပိုင်းမှာသူတို့(စစ်ကောင်စီ)စခန်းစွန့်ခွာသွားတာတွေ၊ မြို့ပေါ် တပ်ရင်းတွေနဲ့ တိုင်းစစ်ဌာနချုပ်တွေကိုထွက်ပြေးပြီးပူးပေါင်းသွားကြတာတွေရှိတယ်ဗျ။ မညှင်းတောင်စခန်းတို့ဆိုရင်အခုရခိုင်တိုက်ပွဲပြန်စကတည်းက စခန်းစွန့်ပြီးထွက်ပြေးသွားကြတာ။ အခုကျွန်တော်တို့ သိရသလောက်ကတော့ အမ်းမြို့နယ်မှာတောဟိန်းတောင် စစ်ဗျူဟာကုန်းပဲ ကျန်တော့တယ်လို့ သိရတယ်။အဲဒီတောဟိန်းတောင်ကလည်း နှစ်ရှည်လများ ဒေသခံတွေကို ဒုက္ခပေးနေတဲ့ စစ်စခန်းတခုပါ။မြို့ပေါ်ကလွဲရင်အမ်းမြို့နယ်က အင်အားအကြီးဆုံးစခန်းလို့လည်း ပြောလို့၇တယ်။

မေး-အဲဒီတောဟိန်းတောင်ဗျူဟာကိုရော ရက္ခိုင့်တပ်တော်က ထိုးစစ်ဆင်နေတာတွေရှိလား။

ဖြေ-တောဟိန်းတောင်ကိုလည်း ရက္ခိုင့်တပ်တော်ဘက်က ပစ်ခတ်တိုက်ခိုက်တာရှိတယ်လို့တော့ သိထားရတယ်ဗျ။စခန်းသိမ်းတိုက်ပွဲအထိတော့မဖော်ဆောင်နိုင်သေးဘူးထင်တယ်။ အခုထိတော့ တောဟိန်းတောင်ကိုသိမ်းပိုက်တဲ့သတင်းတော့မကြားမိသေးဘူး။ တောဟိန်းတောင်ကနေလက်နက်ကြီးပစ်ခတ်တာတွေရှိနေသေးတယ်။

မေး-အမ်းမြို့ပေါ်နဲ့ အနောက်ပိုင်းတိုင်းစစ်ဌာနချုပ်အခြေအနေက ဘယ်လိုရှိလဲ။

ဖြေ-အမ်းမြို့နဲ့ နီးတဲ့နေရာတွေမှာတော့စစ်ကောင်စီက တောက်လျှောက်ကင်းပုန်း ဝပ်နေတာတွေ ရှိတယ်။ အမ်းမြို့ဝန်းကျင်မှာဆိုအမ်းချောင်းတလျှောက်လည်းကင်းပုန်းဝပ်တာတွေ ရှိတယ်။ သူတို့(စစ်ကောင်စီ)ကသူတို့လုံခြုံရေးအတွက်အပြည့်၀လုပ်နေတာပေါ့။ သို့သော်လည်း ပြည်သူတွေ လုံခြုံရေးအတွက် ဗုံးခိုကျင်းတွေတူးတာတွေကိုပြန်ဖို့ခိုင်းတာတွေရှိနေပါတယ်။

မေး-ရက္ခိုင့်တပ်တော်က ရခိုင်ပြည်ထဲမှာ မြို့သိမ်းတိုက်ပွဲတွေဖော်ဆောင်နေတယ်။ ဆိုတော့ အနောက်ပိုင်းတိုင်းစစ်ဌာနချုပ်လည်းရှိနေတဲ့အမ်းမြို့အခြေအနေကို ဘယ်လိုဖြစ်လာမယ်လို့ သုံးသပ်မိလဲ။

ဖြေ- ရက္ခိုင့်တပ်တော်ကရခိုင်ပြည်မှာမြို့သိမ်းတိုက်ပွဲတွေဖော်ဆောင်လာတဲ့အချိန်မှာအနောက်ပိုင်းတိုင်းစစ်ဌာနချုပ်ရှိတဲ့ ဒီအမ်းမြို့ဟာလည်းအဓိကသိမ်းရမယ့် မြို့ထဲမှာတခု အပါအဝင်ဖြစ်နေတယ်ပေါ့နော်။ ဒါကြောင့်ရက္ခိုင့်တပ်တော်အနေနဲ့ တိုက်ခိုက်ရမယ့်အထဲမှာ ထိပ်ဆုံးမှာပါနေတယ်လို့တော့ကြားရတယ်။စစ်တပ်ကလည်း အမ်းမြို့ကို AA ဘက်တိုက်ခိုက်မယ့်သတင်းတွေ သူတို့ တပ်တွင်းမှာထွက်နေပြီးတော့တောက်လျှောက်လက်နက်ကြီးပစ်ခတ်တာတွေ လုပ်နေတာတွေ ရှိနေတယ်။ ပြည်သူတွေကတော့ဒီအပေါ်မှာစိုးရိမ်မှုတွေရှိနေကြတယ်။ အနောက်ပိုင်းတိုင်း စစ်ဌာနချုပ်ကို ဝင်တိုက်ပြီဆိုတာနဲ့စစ်တပ်က ပြည်သူတွေအသက်အိုးအိမ်တွေကိုအဓိက ပစ်မှတ်ထားတိုက်ခိုက်လာနိုင်တာကြောင့်ပြည်သူတွေကအဓိကစိုးရိမ်နေကြတာပါ။ ဖြစ်လာရင် ပြည်သူတွေမှာထွက်ပြေးနိုင်မယ့်လမ်းစလည်း သိပ်မရှိဘူး။သူတို့(စစ်ကောင်စီ)က အားလုံး ပိတ်ဆို့ထားတာလေ။

(ပြီး)