-

“ မြို့ခံကလူ‌တွေကကတော့အဆင်ပြေတာထက် အခက်အခဲတွေအပေါ် နေသားကျသွားပြီ”

တောင်ကုတ်မြို့မှ အမျိုးသမီးတစ်ဦးနဲ့ အင်တာဗျူး

သဉ္ဇာနွယ် မေးမြန်းသည်/ နိရဉ္စရာ၊ အောက်တိုဘာ ၂၄/၂၀၂၄

ရခိုင်ပြည်က ခရိုင်မြို့တစ်ခုဖြစ်တဲ့ တောင်ကုတ်မြို့ဟာ စကခ(၅) အပါအဝင် စစ်ကောင်စီ တပ်ရင်း နှစ်ရင်း အခြေစိုက်ထားတဲ့မြို့ဖြစ်ပါတယ်။

တောင်ကုတ်မြို့ပေါ်ကို လက်ရှိ စစ်ကောင်စီက ထိန်းချုပ်ထားပြီး နယ်ကျေးရွာတွေ အကုန်လုံးကို အာရက္ခတပ်တော်က ထိန်းချုပ်ထားပါတယ်။

အာရက္ခတပ်တော် (AA)က တောင်ကုတ်မြို့ကိုလည်း တိုက်ခိုက်သိမ်းပိုက်သွားမယ်လို့ ၂၀၂၄ ခုနှစ် ဩဂုတ် ၁ ရက်က ထုတ်ပြန်ကြေညာချက်ထဲမှာ ဖော်ပြထားပါတယ်။

လက်ရှိ တောင်ကုတ်မြို့ပေါ်မှာ တိုက်ပွဲဖြစ်ပွားတာမရှိသေးပေမယ့်လည်း မြို့ကို AA က ဝိုင်းဝန်းပိတ်ဆို့ထားတဲ့အတွက် နှစ်ဖက်စစ်ရေးတင်းမာမှုတွေလည်း ကြီးထွားနေပါတယ်။

စစ်ကောင်စီကလည်း တောင်ကုတ်မြို့ပေါ် က စခက (၅) ဌာနချုပ်နဲ့ တပ်ရင်း နှစ်ခုဖြစ်တဲ့  ခမရ (၅၄၄) နဲ့ မခရ (၃၄၆) တပ်ရင်းတို့ကို AA က ဝင်ရောက်တိုက်ခိုက်မှာကို စိုးရိမ်ပြီး AA ရှိနိုင်တယ်လို့ ထင်ရတဲ့ ကျေးရွာတွေကို ရမ်းသန်း ဗုံးကြဲနေတဲ့အတွက် အရပ်သားသေဆုံးမှုတွေလည်း မြှင့်တက်နေပါတယ်။

၂၀၂၄ခုနှစ် ဩဂုတ်လကနေ ဒီလအောက်တိုဘာ ပထမပတ်အထိ စစ်ကောင်စီလေတပ်က ဗုံးကြဲခဲ့တဲ့ အတွက် သေဆုံးခဲ့ရတဲ့ အရပ်သား ၁၁ ဦးရှိပြီး ၂၆ ဦးထက်မနည်း ဒဏ်ရာရရှိခဲ့ပါတယ်။

ဒါ့အပြင် ဖုန်းလိုင်းနဲ့ အင်တာနက်လိုင်း မကြာခဏ ဖြတ်တောက်ခံထားရတာကြောင့် ပြင်ပကမ္ဘာနဲ့ အဆက်အသွယ်ပြတ်နေတဲ့ မြို့နယ် တစ်ခုဖြစ်ပါတယ်။

အခုလို အခြေအနေကြားက ဖုန်းနဲ့ အင်တာနက် အဆင်ပြေနေတုန်း ဒီလ အောက်တိုဘာ ၂၂ ရက်နေ့  နံနက် ၁၁နာရီခွဲခန့်မှာ တောင်ကုတ်မြို့မှ အမျိုးသမီးတစ်ဦးနဲ့ ဖုန်းထဲကနေ အင်တာ‌ဗျူးမေးမြန်းခွင့်ရခဲ့ပါတယ်။

မေး- သာလီစွပါအစ်မ။ တောင်ကုတ်ဟာဆိုရင် စစ်ကောင်စီရဲ့ ဗုံးကြဲခြင်းကို ဒီလအတွင်း အခံရဆုံး မြို့နယ်တွေအထဲမှာ တစ်ခုအပါအဝင်ဖြစ်တယ်။ ဒီတော့အခုလက်ရှိ မြို့ရဲ့ အခြေအနေ ဘယ်လိုရှိနေပါလဲ။
ဖြေ-ဟုတ်ကဲ့ပါ။ လက်ရှိအခြေအနေဟာဆိုရင် တောင်ကုတ်မြို့ခံလူတွေ ပိတ်မိနေတာကလွှဲလို့ မြို့ပေါ်မှာ အခြေအနေအေးဆေးပြောလို့ရတယ်။ ဒါပေမယ့် နယ်ဘက်‌တွေက ဆက်သွယ်ရခက်ခဲလို့ သတင်းအတိအကျမသိနိုင်ဘူး။ “မြို့ခံကလူ‌တွေကကတော့ အဆင်ပြေတာထက် အခက်အခဲတွေအ ပေါ်နေသားကျသွားတယ်” လို့ ပြောရမှာပေါ့နော်။

မေး-မြို့ပေါ်ကနေရော တခြားနေရာတွေကိုသွားလို့ရလား။
ဖြေ- မရပါဘူး။ ကိုယ့်နည်းကိုယ့်ဟန်နဲ့ ထွက်လို့ရတဲ့ လူက အပြင်ထွက်ကြတယ်။ ဟိုတလောက၊ ဒီလ ပထမ အပတ်လောက်က သင်္ဘောနဲ့ ပြည်မဖက်ကို သွားခွင့်ရတယ်ဆိုပြီး စီမံဆီမှာစာတင်ကြတာ။ လူ အယောက် (၇၀၀)ကျော်ဖြစ်သွားလို့ သင်္ဘောလည်းမထွက်တော့ဘူး။ ထွက်ခွင့်မပေးတော့ မြို့ကနေ ဘယ်ကိုမှ သွားလို့မရပါဘူး။ တောင့်ခံနေကြရပါတယ်။

မေး- လက်ရှိအစ်မတို့အနေနဲ့ စားဝတ်နေရေး ဘယ်လိုဖြတ်သန်းနေကြရပါလဲ။ ကျန်းမာရေးနဲ့ ပက်သက်ရင်ကော ဘယ်လိုရင်ဆိုင်နေကြရပါလဲ။
ဖြေ-ဆေးရုံမှာ ဒေါက်တာဟေမာန်ဦး ဆရာဝန်အမျိုးသမီးနဲ့ သူနာပြုဆရာမတစ်ယောက်။ နှစ်‌ယောက်ပဲ ရှိပါတယ်။ ကျန်တဲ့အရိုးခွဲစိပ်၊ OG အကုန်လုံးက ပြည်မဖက်ကိုသွားတာကြာပြီ။ ဒီဆရာဝန်မကြီး တစ်ယောက်ရှိနေလို့ တော်သေးတယ်လို့ပြောရမှာပါ။ ကလေးမွေးလည်းသူ၊ ခွဲစိပ်လည်းသူ။ ကိုယ်ဝန်ဆောင်တွေ၊ ကလေးတွေကလည်း အစား‌အသောက်ကောင်းကောင်း မစားရဘူး။ အသီးအနှံ ဆိုရင် မမြင်ဖူးဘူး။ အဟာရတွေ‌လည်းချို့တဲ့နေကြပါပြီ။ သက်ကြီးရွယ်အို နာမကျန်းဖြစ်ရင်တောင် ဖြစ်သလိုကုသနေကြရတယ်။ပြည်မဖက်ကိုသွားလို့မှမရတော့တာ။

မေး- လက်ရှိမြို့ပေါ်မှာနေရတာ စိတ်လုံခြုံမှုရှိပါရဲ့လား။
ဖြေ- စိတ်ကလုံခြုံလားဆိုတော့ သတိဝိရိယနဲ့နေရတယ်။ နယ်ဖက်တွေမှာဗုံးကြဲတယ်။ မိသားစု ဆွေမျိုးတွေရှိတယ်။ စိတ်ပူရတယ်။ မြို့ပေါ်မှာလည်း ဘယ်နေ့ဖြစ်မှန်းမှန်းဆလို့မရဘူး။ ထွက်ပြေး စရာနေရာလည်းမရှိဘူး။ နောက်တစ်ခုက ဖုန်းလိုင်းအင်တာနက် အဆက်အသွယ်မရတာ ပိုဆိုးတယ်။ တခုခုဆိုဘာတွေဖြစ်နေမှန်းမသိရဘူး။

မေး- မြို့ပေါ်မှာဘာတွေထူးခြားတာတွေ ရှိပါသေးလဲ။
ဖြေ-အရင်လတွေကလောက် အစစ်အဆေးသိပ်မရှိဘူး။ ဒါပေမယ့် လျှပ်စစ်မီတာခ လာမကောက်တာ ၂ လရှိနေပြီ။ မီတာခတိုးမြှင့်ကောက်မယ်ဆိုကတည်းက လာမကောက်တော့ဘူး။ ပြီးတော့ လျှပ်စစ်မီး ဖြတ်တောက်တော့မယ်လို့လဲ ကြားနေတယ်။ ဒီလျှပ်စစ်မီးကလည်း ကျမတို့ အတွက် အရေးပါလို့ ဖြတ်တောက်ခံရမှာလည်းကြောက်တယ်။  ‌

မေး-စားသောက်နေထိုင်ရေးရော အဆင်ပြေကြပါလား။
ဖြေ-အခြေခံလူတန်းစား‌ တွေက ဘယ်လိုအဆင်ပြေပါ့မလဲ။ တောထဲကနေဖြတ်ပြီး ကုန်ပစ္စည်း အထုပ်သယ်တဲ့ သူက သူကသယ်။ ကြုံရာကျဗန်းလုပ်တဲ့သူက လုပ်စားနေကြရတယ်။ ကုန်ပစ္စည်းက မရှားပေမယ့် ကုန်ဈေးနူန်းဈေးတွေကမကျတော့ လက်လုပ်လက်စားတွေအတွက် အရမ်းခက်ခဲကြပါတယ်။ အခက်အခဲကတော့ ဘက်ပေါင်းစုံရှိပါတယ်။
(ပြီး)