ရန်ကုန်တိုင်းဝန်ကြီးချုပ်ဟောင်း ဦးဖြိုးမင်းသိန်းကတရားလိုစွပ်စွဲထားသည့်အတိုင်း ဒေါ်အောင်ဆန်းစုကြည်၏အဂတိမှုတွင်သက်သေထွက်ဆို


နိရဉ္စရာ၊ အောက်တိုဘာ၂ /၂၀၂၁


နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို စွဲဆိုထားတဲ့ အဂတိအမှုကို မနေ့ကနေပြည်တော် အထူးတရားရုံးမှာ စတင် စစ်ဆေးခဲ့ရာမှာ ယခင် ရန်ကုန်တိုင်းဝန်ကြီးချုပ် ဦးဖြိုးမင်းသိန်းက တရားလိုက စွပ်စွဲထားတဲ့ အတိုင်း သက်သေထွက်ဆိုခဲ့တယ်လို့ ဒေါ်အောင်ဆန်းစုကြည်ရဲ့ အကျိုးဆောင်ရှေ့နေတွေက ပြောပါတယ်။

 

ဒေါ်အောင်ဆန်းစုကြည်ကို ရွှေခုနစ်ပိဿာနဲ့ အမေရိကန်ဒေါ်လာ ခြောက်သိန်းကို ရန်ကုန်တိုင်း ဝန်ကြီးချုပ် ဦးဖြိုးမင်းသိန်းက ပေးခဲ့ရတယ်ဆိုတဲ့ စွပ်စွဲချက်နဲ့ အဂတိလိုက်စားမှု တိုက်ဖျက်ရေးကော်မရှင်ရုံး ညွှန်ကြားရေးမှူး ဦးရဲထက်က အဂတိပုဒ်မ - ၅၅ နဲ့  ဒေါ်အောင်ဆန်းစုကြည်ကို တရားစွဲဆိုခဲ့တာ ဖြစ်ပါတယ်။

မနေ့က အမှုကို စစ်ဆေးရာမှာ  ရန်ကုန်တိုင်းဝန်ကြီးချုပ် ဦးဖြိုးမင်းသိန်းက တရားလိုပြ သက်သေအဖြစ်နဲ့  တရားစွဲဆိုထားတဲ့အတိုင်း ရွှေခုနစ်ပိဿာနဲ့ အမေရိကန်ဒေါ်လာ ခြောက်သိန်းကို ဒေါ်အောင်ဆန်းစုကြည်ကို ပေးခဲ့ရတယ်လို့ ထွက်ဆိုခဲ့တယ်လို့ ဆိုပါတယ်။

 

ဒီအဂတိအမှုကို လာမယ့် အောက်တိုဘာလ ၈ ရက်နေ့ မှာ ပြန်လည် ရုံးချိန်း ရှိတယ်လို့ ဆိုပါတယ်။

ဒေါ်အောင်ဆန်းစုကြည်ကို  အမှုစုစုပေါင်း ၁၁ မှုနဲ့  တရားစွဲထားပြီး အဲဒီအမှုတွေအထဲမှာ နှစ်ရှည်ထောင်ဒဏ်တွေ ချမှတ် ခံရနိုင်တဲ့ အစိုးရ လျှို့ဝှက်ချက်များ အက်ဥပဒေ ပုဒ်မ ၃ (၁) (ဂ)၊ အဂတိလိုက်စားမှု တိုက်ဖျက်ရေး ဥပဒေပုဒ်မ (၅၅) တို့ ပါဝင်တယ်လို့  သိရှိရပါတယ်။


(ဓာတ်ပုံ- ဧရာ၀တီ)

Share: