နိရဉ္စရာ၊ ဒီဇင်ဘာ ၁/၂၀၂၁ (မြန်မာ)

မြန်မာပြည်သူ ထက်ဝက်ခန့်သည် တစ်ရက်ဝင်ငွေ တစ်ဒေါ်လာအောက်ဖြင့် ရှင်သန်နေရဟု UNDP က ပြောကြောင်း BETV စီးပွားရေးသတင်းတွင် ဖော်ပြသည်။

UNDP က သတ်မှတ်ထားသည့် ဆင်းရဲမွဲတေမှုမျဉ်းအောက် နေထိုင်သူရာခိုင်နှုန်း၏ တစ်ရက်ဝင်ငွေမှာ  ၁၅၉၀ ကျပ် (ဝ ဒဿမ ၉၀ ဒေါ်လာ)ရှိပြီး ၂၀၁၇ ခုနှစ်မှာ ၂၄ ဒဿမ ၈ ရာခိုင်နှုန်းရှိခဲ့သော်လည်း ယခုအခါ ၄၆ ဒဿမ ၃ ရာခိုင်နှုန်းအထိ နှစ်ဆနီးပါး တိုးလာသည်ဟု ဆိုသည်။

မြို့ပြဒေသများတွင်  ဆင်းရဲမွဲတေမှုက ၂၀၁၇ ခုနှစ်တွင်  ၁၁ ဒဿမ ၃ ရာခိုင်နှုန်းရှိခဲ့သော်လည်း  ယခုအခါ တုန်လှုပ်ဖွယ်ဖြစ်လာပြီး ၃၇ ဒဿမ ၂ ရာခိုင်နှုန်းခန့် အထိရှိလာပြီး  ၂၀၂၂ ခုနှစ်အစောပိုင်းတွင်  ဆင်းရဲခြင်းကို ကျရောက်သွားမည်ဟု အဆိုပါ သတင်းတွင် ဖော်ပြသည်။

‘‘ဒီအတိုင်းအတာက ဆင်းရဲမွဲတေမှုထဲ လျှောကျသွားခြင်းက လူလတ်တန်းစားတွေရဲ့ ပျောက်ဆုံးမှုကို ဆိုလိုတာပါ’’ ဟု UNDP အာရှနှင့် ပစိဖိတ်ဒေသဆိုင်ရာဗျူရိုရဲ့ ဒါရိုက်တာ Kanni Wignaraja က Nikkei Asia ကို အင်္ဂါနေ့၌ ပြောကြားခဲ့သည်ဟုဆိုသည်။

တချိန်က မြန်မာနိုင်ငံမှာ တိုးတက်စေခဲ့သည့်  အထည်ချုပ်၊ ခရီးသွားလုပ်ငန်း၊ ဝန်ဆောင်မှုလုပ်ငန်းနှင့်  ဆောက်လုပ်ရေးလုပ်ငန်းတို့မှာ  ကိုဗစ်-၁၉ နှင့်  နိုင်ငံရေးမတည်ငြိမ်မှုတို့ကြောင့် အပြင်းအထန် ထိခိုက်ခဲ့ရသည်ဟုပြောသည်။

မြန်မာနိုင်ငံရှိ လူဦးရ ထက်ဝက်ခန့်က လာမယ့်နှစ်အစောပိုင်းတွင်  ဆင်းရဲနွမ်းပါးစွာ နေထိုင်ရမည်ဖြစ်ပြီး ကိုဗစ်-၁၉ ကပ်ရောဂါဂယက်နှင့် နိုင်ငံရေးမတည်ငြိမ်မှုများကြောင့် လွန်ခဲ့သည့်  ၅ နှစ်ကထက် ဆင်းရဲနွမ်းပါးသူ အကြမ်းဖျင်းအားဖြင့် နှစ်ဆတိုးလာကြောင်း  UNDP ကို ကိုးကားပြီး ၎င်းသတင်းတွင် ဖော်ပြထားသည်။စက်တင်ဘာလတွင် ထုတ်ပြန်ခဲ့သည့်  အာရှဖွံ့ဖြိုးရေးဘဏ်(ADB)၏ ခန့်မှန်းချက်အရ မြန်မာနိုင်ငံ၏ GDP က ယခုနှစ်အတွင်း ၁၈ ဒဿမ ၄ ရာခိုင်နှုန်း ကျုံ့သွားနိုင်ကြောင်း ခန့်မှန်းထားပြီး ဧပြီလခန့်မှန်းချက်ဖြစ်သည့်  ၉.၈ ရာခိုင်နှုန်းထက် မြင့်တက်လာခဲ့သည်။

ကိုဗစ်-၁၉ ကပ်ရောဂါအပြင် ဖေဖော်ဝါရီနောက်ပိုင်း အပြောင်းအလဲများ ကြောင့် လယ်ယာမဟုတ်သည့်  စီးပွားရေးလုပ်ငန်းများက ဝင်ငွေ ၅၀ ရာခိုင်နှုန်းအထိ ကျဆင်းခဲ့ပြီး လုပ်ခနှင့် စိုက်ပျိုးရေးဝင်ငွေများလည်း ၂၅ ရာခိုင်နှုန်း လျော့ကျသွားကာ ငွေလွှဲမှုများကလည်း ၁၀ ရာခိုင်နှုန်းခန့် ကျဆင်းခဲ့ကြောင်း UNDP ၏ ဗုဒ္ဓဟူးနေ့ ထုတ်ပြန်ချက်၌ ဖော်ပြထားသည်။

၎င်းရလဒ်များကြောင့် ယခုအခါ နိုင်ငံလူဦးရေ၏ ထက်ဝက်နီးပါးက အမှန်တကယ် ခက်ခဲသည့်  အချိန်များနှင့် ရင်ဆိုင်နေရသည်ဟု UNDP က ပြောသည်။