ဂျာမနီက မြန်မာကို ကူညီရန် UNOCHA ကတဆင့် ယူရို ၂ သန်း ထပ်တိုးထောက်ပံ့


နိရဉ္စရာ၊ ဒီဇင်ဘာ ၁၅/၂၀၂၁

ဂျာမနီက မြန်မာကို ကူညီရန် ကုလသမဂ္ဂ လူသားချင်းစာနာထောက်ထားမှုဆိုင်ရာ ပေါင်းစပ်ညှိနှိုင်းရေးရုံး (UNOCH) ကတဆင့် ယူရို ၂ သန်း ထပ်တိုးထောက်ပံ့ခဲ့သည်ဟု BETV စီးပွားရေး သတင်းတွင် ဖော်ပြထားသည်။

လာမည့်နှစ်တွင် ူဦးရေ ၁၄ သန်းခန့် အကူအညီလိုအပ်လာမည်ဟု ကုလသမဂ္ဂ ခန့်မှန့်ထားပြီး

ဂျာမနီနိုင်ငံက မြန်မာနိုင်ငံကို အကူအညီပေးနိုင်ရန် ကုလသမဂ္ဂ လူသားချင်းစာနာထောက်ထားမှုဆိုင်ရာ ပေါင်းစပ်ညှိနှိုင်းရေးရုံး (UNOCH) ကတဆင့် ယူရိုငွေ ၂ သန်း ထပ်တိုးထောက်ပံ့ခဲ့ကြောင်း ဂျာမနီသံရုံး(ရန်ကုန်)က သတင်းထုတ်ပြန်ထားကြောင်း သိရသည်။

ဂျာမနီအနေဖြင့်  ပဋိပက္ခနှင့် သဘာဝဘေးအန္တရာယ်များကြောင့် အကူအညီလိုအပ်နေသည့် ပြည်သူများကို ထောက်ပံ့ပေးရန်  မြန်မာနိုင်ငံအတွက်  လူသားချင်းစာနာထောက်ထားမှု အကူအညီပမာဏကို ၂၀၂၁ ခုနှစ်တွင် နှစ်ဆထက်ပိုပြီး တိုးမြှင့်ခဲ့သည်ဟု ဆိုသည်။

ယခုနှစ် တနှစ်တည်းတွင်ပင် မြန်မာနိုင်ငံ စီးပွားရေးက ၂၀ ရာခိုင်နှုန်းခန့် ကျဆင်းသွားမည် ဖြစ်ပြီး ဆင်းရဲမွဲတေသည့်  လူဦးရေကလည်း နှစ်ဆတိုးသွားနိုင်ကြောင်း  တွက်ချက်ထားကြသည်။

၂၀၂၂ ခုနှစ်မှာ မြန်မာ ူဦးရေ ၁၄ သန်းခန့်က အကူအညီအထောက်အပံ့ လိုအပ်လာမည်ဟု  ကုလသမဂ္ဂက ခန့်မှန်းထားသည်။

ဂျာမနီ  ဦးစားပေးမှုမှာ အထိခိုက်အလွယ်ဆုံး ပြည်သူတွေကို ထောက်ပံ့မှုပေးရန်နှင့်  ၎င်းထက်များပြားသည့်  ပြည်သူများ ထိခိုက်လွယ်သည့်  အခြေအနေမှ အလွန်အမင်း လိုအပ်သည့် အခြေအနေကို ရောက်မသွားစေဖို့ ကူညီတားဆီးရန် ဖြစ်သည်ဟု  သံရုံးဘက်က ပြောသည်။

 သို့အတွက်ကြောင့် ဂျာမနီက မြန်မာ နိုင်ငံတစ်ဝှမ်းရှိ ထိခိုက်အလွယ်ဆုံးသော ပြည်သူများအတွက် အခြေခံလိုအပ်ချက်တွေကို ဖြည့်ဆည်းပေးဖို့ UNOCHA  မြန်မာနိုင်ငံဆိုင်ရာ လူသားချင်းစာနာ ထောက်ထားမှု ရံပုံငွေအတွက် ယူရို ၂ သန်း ထပ်မံထောက်ပံ့ပေးခဲ့ခြင်း ဖြစ်သည်ဟု ဆိုသည်။

လူသားချင်းစာနာထောက်ထားမှုဆိုင်ရာ ရန်ပုံငွေများကို ရှုပ်ထွေးသည့်  အရေးပေါ်အခြေအနေများနှင့် အလုံးစုံပါဝင်ပြီး ပွင့်လင်းမြင်သာမှုရှိသည့်  လုပ်ငန်းစဉ်များကတဆင့် လိုအပ်သည့်  နေရာများကို ထိရောက်စွာ ပံ့ပိုးပေးနိုင်သည့်  နိုင်ငံတကာနှင့်  ပြည်တွင်း NGO များ၊ UN အဖွဲ့အစည်းများ၏  အထူးဦးစားပေး စီမံကိန်းများအတွက် ထောက်ပံ့ပေးရန်  စီစဉ်ထားသည်ဟု ဆိုသည်။

(ဓာတ်ပုံ-  Eurasia Review)

Share: