လုံခြုံရေးတင်းကျပ်ထားသည့်ရန်ကုန်မြို့တော်ခန်းမထိ ဗုံးခွဲတိုက်ခိုက်မှုဖြစ်လာ၊ ရဲ ၄ဦးနှင့်စည်ပင်ဝန်ထမ်း၂တို့ဒဏ်ရာရ

နိရဉ္စရာ၊ ဇူလိုင် ၃၁/ ၂၀၂၂ (မြန်မာရေးရာ)

လုံခြုံရေး တင်းကျပ်ထားသည့် ရန်ကုန်မြို့လယ်ခေါင်၌ တည်ရှိသည့်  မြို.တော်ခန်းမ အထိ ဗုံးခွဲတိုက်ခိုက်မှုများဖြစ်ပေါ်လာခဲ့ပြီး ယမန်နေ့က တိုက်ခိုက်မှု အတွင်း ရဲတပ်ဖွဲ့ဝင် ၄ ဦးနှင့် စည်ပင် ဝန်ထမ်း ၂ ဦးတို့ ဒဏ်ရာ ရရှိသွားကြောင်း သတင်းရရှိသည်။

၎င်းတိုက်ခိုက်မှုသည် မြို့တော်ခန်းမ အနောက်ဘက်ဂိတ်တွင် ဇူလိုင် ၃၀ ရက် နေ့လည် ၁၁ နာရီခန့်က ဖြစ်ပွားခဲ့ခြင်းဖြစ်သည်။

သံဆူးကြိုးအတားအဆီးများဖြင့် ပိတ်ထားသော မြို့တော်ခန်းမအနောက်ဖက်အနီး ဖြတ်သန်း သွားလာနေသူထဲမှ လူနှစ်ဦးက လက်ပစ်ဗုံးဖြင့် ရဲများကိုပစ်ခတ်ခဲ့ခြင်းဖြစ်ကြောင်း သတင်းများတွင် ဖော်ပြသည်။

၎င်းတိုက်ခိုက်မှုသည် များမကြာသေးမီက နိုင်ငံရေးအကျဥ်းသားလေးဦးကို စစ်ကောင်စီက ကွပ်မျက် သတ်ဖြတ်ခဲ့ခြင်းအပေါ် စစ်တပ်ထောက်ခံသူများက ဇူလိုင် ၂၉ ရက်နေ့ ထောက်ခံပွဲ ပြုလုပ်အပြီး နောက်တစ်နေ့တွင် ဖြစ်ပွားခဲ့ခြင်းဖြစ်သည်။

ရဲ ၄ ဦးနှင့် စည်ပင် ၂ ဦးတို့ ဒဏ်ရာရရှိသွားပြီး သေဆုံးသူ မရှိကြောင်း၊ မေးမြန်းစစ်ဆေးမှုများမှ အပ ဖမ်းဆီးခံရသူလည်း မရှိကြောင်း သိရသည်။

တိုက်ခိုက်မှုဖြစ်ပွားပြီးနောက် မြို့တော်ခန်းမအနီးတစ်ဝိုက်တွင် လုံခြုံရေးကို ပိုမို တင်းကျပ်လိုက်ပြီး လမ်းများကိုပိတ်ဆို့ထားကာ စစ်သားနှင့်ရဲများဖြင့် လုံခြုံရေးတင်းကျပ်ထားသည်ဟု သိရသည်။  

(ဓာတ်ပုံ- Myanmar Now)