ရေကြည်မြို့နယ်မှာ ကျေးရွာအုပ်ချုပ်ရေးမှူးတစ်ဦးသတ်ဖြတ်ခံရပြီးနောက် ဒေသခံအရပ်သား ၇၀ ကျော်ဖမ်းဆီးခံရ

အောက်တိုဘာ ၃/ ၂၀၂၂ 

ဧရာဝတီတိုင်း၊ ရေကြည်မြို့နယ်မှာ ကျေးရွာအုပ်ချုပ်ရေးမှူးတစ်ဦး အစည်းအဝေးတက်ပြီး ဆိုင်ကယ်ဖြင့် ပြန်အလာတွင် အသတ်ခံခဲ့ရပြီး ယင်းနောက်ပိုင်းတွင် အရပ်သား ၇၀ ကျော်ကို စစ်ကောင်စီက ဖမ်းဆီးခဲ့ကြောင်း သတင်းရရှိသည်။

စစ်ကောင်စီက ခန့်အပ်ထားသည့် ဇရပ်လှရွာအုပ်ချုပ်ရေးမှူးဦးတာတေသည် ရေကြည်မြို့တွင်  အစည်းအဝေးတက်ပြီး ဆိုင်ကယ်ဖြင့် ပြန်အလာ စက်တင်ဘာလ ၂၈ ရက်နေ့ ညနေ ၃ နာရီခန့်တွင်  ကျုံတာရွာအနီးတွင်  သေနတ်ဖြင့်ပစ်သတ်ခံခဲ့ရသည်ဟု ဒေသခံများ ပြောသည်။

၎င်းနောက် စစ်ကောင်စီတပ်သားများသည် အနီးအနားရှိ မြစ်ဆယ်ရွာ၊ ဇရပ်လှရွာ၊ ကျုံတာရွာများသို့ ဝင်ရောက်လာပြီး ဒေသခံ ၇၀ ကျော်ကို ဖမ်းဆီးလိုက်သည်ဟု ငသိုင်းချောင်းမြို့က ဒေသခံတစ်ဦးက ပြောသည်။

“  အဓိက အဖမ်းခံရတာ အခင်းဖြစ်ပွားတဲ့ နေရာအနီးဝန်းကျင်မှာရှိတဲ့ မြစ်ဆယ်၊ ဇရပ်လှက ရွာတွေကလူတွေ ဖြစ်ကြပါတယ်။ ငသိုင်းချောင်းမြို့ပေါ်က လူတချို့လည်း အဖမ်းခံရတယ်လို့ သိရပါတယ်” ဟု ၎င်းက ပြောသည်။

ရေကြည်မြို့နယ်၊ ငသိုင်းချောင်းမြို့နယ်ခွဲ၊ ဇရပ်လှရွာက ဦးတာတေသည်  ဆိုင်ကယ်ဖြင့် ပြန်လာစဉ် လူနှစ်ဦးက ဆိုင်ကယ်ဖြင့် ဘေးချင်းယှဉ်ကာ အနီးကပ် သေနတ်ဖြင့် ငါးချက်ပစ်ခတ်ခဲ့သည်ဟု ဆိုသည်။

သေနတ်ကျည်ဆံများသည် ဦးတာတေ၏ ခေါင်း၊ ရင်ဘတ်များတွင် ထိမှန်ကာ ၎င်းပစ်ခတ်ခံရသည့် နေရာမှာတင် ပွဲချင်းပြီးသေဆုံးသွားကြောင်း သိရသည်။

“ သူအပစ်ခံရပြီးတဲ့နောက် ရာအိမ်မှူးနဲ့ ဒလန်တွေ၊ စစ်သားတွေက ရွာတွေထဲကို  တစ်အိမ်ဝင် တစ်အိမ်ထွက် လိုက်ဖမ်းတာပါပဲ။  ဒေသခံတွေကို ဖမ်းဆီးခံရတဲ့ ဒေသခံတွေကို လက်ပြန်ကြိုးတုပ်တယ်၊ သံကြိုးတွေခတ်တယ်။ ဘယ်အဖွဲ့၊ ဘယ်သူက သတ်မှန်းမသိဘဲ ဖမ်းနေတာပါ" ဟု ၎င်းက ပြောသည်။

လက်ရှိအချိန်တွင် ဖမ်းဆီးခံရသူများကို ကြမ်းကြမ်းတမ်းတမ်းကိုင်တွယ်စစ်ဆေးနေပြီး မိသားစုများနှင့်လည်း အဆက်အသွယ် မရဖြစ်နေကြသည်ဟု သိရသည်။