- Web Master
- ၂၀ ဧပြီ ၂၀၂၄
နိရဉ္စရာ၊ အောက်တိုဘာ ၃၀/၂၀၂၂
မန္တလေးတိုင်းနှင့် ကရင်ပြည်နယ်တွင် အောက်တိုဘာ ၂၈ ရက်နှင့် ၂၉ ရက်အတွင်း ရဲစခန်း ၂ ခု တိုက်ခိုက်ခံရပြီး အနည်းဆုံးရဲ ၁၀ ကျော်သေဆုံးခဲ့သည်ဟု သတင်းရရှိသည်။
ကေအဲန်ယူ- ဒူးပလာယာခရိုင်၊ ကော့ကရိတ်မြို့နယ်ရှိ ကျိုက်ဒုံရဲစခန်းတစ်ခုကို အောက်တိုဘာ ၂၈ ရက်နေ့ ည ၉နာ ရီခွဲအချိန်ခန့်တွင် ကရင်အမျိုး သားလွတ်မြောက်ရေးတပ်မတော်-KNLA တပ်ရင်း (၁၈) ၏ တပ်ခွဲ (၁) တပ်ခွဲ(၄)နှင့် ဒေါနစစ်ကြောင်း ပူးပေါင်းအဖွဲ့တို့ ဝင်ရောက်တိုက်ခိုက်ခဲ့သည်ဟု ကေအဲန်ယူ ဒူးပလာယာခရိုင်က သတင်း ထုတ်ပြန်သည်။
နာရီဝက်ကြာ ပစ်ခတ်မှုများ ဖြစ်ပွားခဲ့သည့် အဆိုပါ တိုက်ပွဲတွင် အာဏာသိမ်းစစ်ကောင်စီတပ်မှ (၂)ဦး ကျဆုံးခဲ့ပြီး ရှေ့ထွက်မိုင်း – ၄လုံး၊ မိုင်းကြိုး – ၂ခွေ၊ လက်ဗစ်ဗုံး – ၂၃ လုံး၊ 7.62 ကျည် – ၂၅၄၀ တောင့်၊ ၆၀ မမ ဗုံးသီး – ၂၃ လုံး၊ G3- ၆ လက်၊ G3 ကျည်ဘောက် – ၁၁ ဘောက်၊ G4- ၁ လက်၊ အူဇီ- ၂ လက်၊ ၆ လုံးပြူး – ၄ လက်၊ ကွန်မန် ဒိုစိန်ဗြောင်း – ၄ လက်၊ ဆသရစက်ကြီး – ၁ လုံး၊ RPG ပို့ယမ်း – ၃တောင့်တို့ သိမ်းဆည်းရသည်ဟု ထုတ်ပြန်ချက်ကို ကိုးကားပြီး ကရင်သတင်းစဉ် KIC တွင် သတင်းဖော်ပြထားသည်။
မန္တလေးတိုင်း၊ ညောင်ဦးမြို့နယ် ငါ့သရောက်မြို့ ရဲစခန်းကို အောက်တိုဘာလ ၂၉ ရက်နေ့ ညနေ ၄ နာရီကျော်အချိန် လက်နက်ကိုင်တပ်ဖွဲ့များက ဝိုင်းဝန်း တိုက်ခိုက်ရာ စခန်းမှူး၊ ဒုရဲအုပ် အပါအဝင် ရဲ ၁၁ ဦး သေဆုံးပြီး လက်နက် ၇ လက် ပါသွားကြောင်း သိရှိရသည်။
အောက်တိုဘာလ ၂၉ ရက်နေ့ ညနေ ၄ နာရီကျော်အချိန် PDF မဟာမိတ်တပ်ဖွဲ့များက ငါ့သရောက်မြို့ ရဲစခန်းကို ဝင်ရောက် တိုက်ခိုက်ခဲ့ကြောင်း၊ ည နေ ၅ နာရီဝန်းကျင်အထိ ရဲစခန်းကို လက်နက်ကိုင်များက ဝင်ရောက်စီးနင်းသွားခဲ့ပြီး ရဲစခန်းအတွင်းမှ ပစ်ခတ်မှုကြောင့် လမ်းပေါ်တွင် လူ ၁ ဦး သေဆုံးမှုရှိကြောင်း ရန်ကုန်ခေတ်သစ်တွင် ဖော်ပြထားသည်။
ရင်ခွဲရုံ သို့ အလောင်း ၁၂ လောင်း ရောက်ရှိလာကြောင်း ရန်ကုန်ခေတ်သစ်က စုံစမ်းသိရှိရကြောင်း သတင်းတွင် ဆက်လက် ဖော်ပြထားသည်။