ရန်ကုန် ဘုရင်နောင်တံတားအဆင်း ခမရ (၅၃၂)တပ်ဝင်း ရှော့တိုက်ဒုန်းဖြင့် ပစ်ခတ်ခံရ

နိရဉ္စရာ၊ ဇန်နဝါရီ ၁၉/ ၂၀၂၃

ရန်ကုန်မြို့၊ လှိုင်သာယာမြို့ (အရှေ့ပိုင်း)၊ ဘုရင်နောင်တံတားအဆင်းတွင် တည်ရှိသည့် ခမရ(၅၃၂) တပ်ဝင်း ရှော့တိုက်ဒုန်းဖြင့် ယနေ့ (ဇန်နဝါရီလ ၁၉ရက်) ည ၈ နာရီ ခွဲခန့်က  ပစ်ခတ်တိုက်ခိုက်ခံခဲ့ရသည်ဟု သတင်းရရှိသည်။

“တပ်ထဲကို ရှော့တိုက်ဒုန်းနဲ့ လာပစ်ကျတယ်လို့ကြားတယ်။ ထိခိုက်တာတွေဘာတွေတော့ မသိရ သေးဘူးဗျာ။ ကျနော်တို့လဲ ဆိုင်ကယ်ကယ်ရီဆွဲနေတာကနေ စစ်ဆေးတာတွေဘာတွေရှိလာတော့ ပြေးလာလိုက်တော့တာ” ဟု ဒေသခံ တစ်ဦးက ပြောသည်။

အဆိုပါ ဘုရင်နောင်တံတားအဆင်း လှိုင်သာယာမြို့ (အရှေ့ပိုင်း) နယ်ထဲတွင် ခမရ ၅၃၂ တည်ရှိပြီး ရှော့တိုက်ဒုန်းဖြင့် ပစ်ခတ်တိုက်ခိုက်ခဲ့မှုအား ရန်ကုန်မြို့ပြပြောက်ကျားအဖွဲ့မှ ပြုလုပ်ခဲ့ခြင်း ဖြစ်ကြောင်း ဒေသခံများအကြား ပြောဆိုနေကြသည်။

အပျက်အစီးနှင့် အထိအခိုက်ကို မသိရသေးဟု ပြောဆိုသည်။

လက်ရှိတွင်  ဖြစ်ပွားခဲ့သည့် အနီးအနားရှိ လမ်းများကို ပိတ်ဆို့စစ်ဆေးမှုများပြုလုပ်နေကြောင်း ဒေသခံများနှင့် လမ်းသွားလမ်းလာများက ပြောသည်။ (NN-25)