ရန်ကုန်တိုင်း စစ်ကြောရေးတာ၀န်ခံ အပါအ၀င် (၄) ဦးကို ရှင်းလင်းခဲ့ပြီး လက်နက်များ သိမ်းဆည်းရမိဟု Bago Region PDF ထုတ်ပြန်

နိရဉ္စရာ၊ ဇန်နဝါရီ ၂၃/ ၂၀၂၃

ရန်ကုန်တိုင်း စစ်ကြောရေးတာ၀န်ခံ ဗိုလ်မှူးသန်းထွဋ် နှင့် တပ်ကြပ်ကြီးမြင့်အောင် တို့အပါအ၀င် (၄)ဦးကို ပစ်ခတ် ရှင်းလင်းခဲ့ ပြီး လက်နက်များ သိမ်းဆည်းရမိခဲ့ကြောင်း Bago Region PDF က ထုတ်ပြန် ပြောဆိုသည်။

 “ ရန်ကုန် - မန္တလေး အမြန်လမ်းမှာ ရှင်းလိုက်တာ၊ အဖွဲ့ကလည်း ထုတ်ပြန်ထားပါတယ်။ နှစ်ယောက်ကတော့ ကားပေါ်အပြန်အလှန်ပစ်ရင်းကျသွားတာ။ သူတို့ဆီက ဗိုလ်မှူးကြီးတစ်ဦးနဲ့ တပ်ကြပ်တစ်ဦးကျတယ်။ နောက်ထပ် နှစ်ယောက်ကို စစ်မေးဖို့ခေါ်လာတုန်း လက်နက်လုထွက်ပြေးဖို့လုပ်တော့ အဲဒီမှာ အပစ်ခံရပြီးသေတာ။ သူတို့ လေးယောက်လည်း ကျသွားတယ်။ လက်နက်ငယ်လေးတချို့လည်း သိမ်းဆည်းမိတယ်”ဟု တော်လှန်ရေးအဖွဲ့၀င် တစ်ဦးက ပြောသည်။

ဗိုလ်မှူးသန်းထွဋ်သည် ဒုဗိုလ်မှူးကြီး အစမ်းခန့် တာဝန်ဖြင့်  PDF များ၏ UG ၏ သတင်းကွင်းဆက်များကို လိုက်လံစုံစမ်းပြီး လက်နက်များ ၀ယ်ယူမည်ဟု အကြောင်းပြကာ တော်လှန်ရေးအဖွဲ့၀င်များအား ဖမ်းဆီးခြင်းများ ပြုလုပ်မှုကြောင့် ရှင်းလင်းရခြင်းဖြစ်ကြောင်း Bago Region PDF ကပြောသည်။

 ရှင်းလင်းခံရမှု ဖြစ်စဉ်သည် ဗိုလ်မှူးသန်းထွဋ်နှင့် တပ်ကြပ်ကြီးမြင့်အောင် အပါအ၀င် (၄) ဦးလိုက်ပါစီးနှင်း မောင်းနှင်လာသည့် YGN 2N/6158 Toyota VanGuard ကားဟု YUA အဖွဲ့၏ သတင်းပေးပို့ချက်အရ ကင်းပုန်း၀ပ်စောင့်နေသည့် အဖွဲ့မှ ရန်ကုန် - မန္တလေး အမြန်လမ်း မိုင်တိုင် (၁၆၁) မိုင် တွင် အသွင်ယူဖမ်းဆီးမှု ပြုလုပ်ခဲ့ကြောင်းသိရှိရသည်။

ထိုသို့ ဖမ်းဆီးမှု ပြုလုပ်စဉ် ယာဉ်ပေါ်ပါလာသည့် စစ်ကောင်စီ တပ်ဖွဲ့၀င် ၂ ဦးမှ အသင့်ပါလာသော လက်နက် များဖြင့် ပြန်လည်ခုခံသဖြင့် တော်လှန်ရေးတပ်ဖွဲ့၀င်များ၏ ပစ်ခတ်ဖမ်းဆီးမှုကြောင့် အခင်းဖြစ်ပွားရာ နေရာ၌ ပင် ပွဲချင်းပြီးသေဆုံးခဲ့ကြောင်း Bago Region PDF က ပြောသည်။

 စစ်ကောင်စီ တပ်ဖွဲ့၀င်များနှင့် ပါလာသည့် အမျိုးသမီး ၁ ဦးနှင့် အမျိုးသား ၁ ဦးအား စစ်မေးမှုများပြုလုပ်ရန် ဖမ်းဆီး ခေါ်ဆောင်လာစဉ် လက်နက် လုယူထွက်ပြေးရန် ကြိုးစားလာမှုကြောင့် တော်လှန်ရေးရဲဘော်များမှ ပစ်ခတ် ဖမ်းဆီးခဲ့ရပြီး သေဆုံးလျက်သာ ဖမ်းဆီးရမိခဲ့သည်။

ဖြစ်စဉ်ကြောင့် 9 mm ပစ္စတို (၂)လက်၊ ကျည် (၁၂) တောင့်၊ ယာဉ်လိုင်စင်နှင့် စာရွက်စာတမ်းအချို့အား သိမ်းဆည်းရမိခဲ့ကြောင်းလည်း ထုတ်ပြန်ပြောဆိုထားသည်။

ဓာတ်ပုံ - ဗိုလ်မှူးသန်းထွဋ် ပုံ၊ သေဆုံး စစ်ကောင်စီ တပ်ဖွဲ့၀င်များနှင့် သိမ်းဆည်းရမိသည့် လက်နက်/ စာရွက်စာတမ်းများ