ကော့သောင်း ဝိုင်းဒင်တိုက်ပွဲတွင် NLD မြို့နယ် ဥက္ကဋ္ဌအပါအဝင် တော်လှန်ရေး ရဲဘော် ၉ ဦးကျဆုံး

တနသာင်္ရီတိုင်း၊ ကော့သောင်းခရိုင်၊ ခမောက်ကြီးမြို့နယ်၊ ဝိုင်းဒင်ကျေးရွာတွင် မတ်လ ၄ ရက်နေ့က စစ် ကောင်စီတပ်နှင့် ဒေသခံတော်လှန်ရေးတပ်ဖွဲ့တို့ တိုက်ပွဲဖြစ်ပွားခဲ့ရာ တော်လှန်ရေးရဲဘော် ၉ ဦး ကျဆုံး ခဲ့ကြောင်း ပြည်သူ့ကာကွယ်ရေးတပ်မတော် ကော့သောင်းခရိုင် အမှတ် (၁) က ထုတ်ပြန်ထားသည်။

ကျဆုံံးရဲဘော်များထဲတွင် ကော့သောင်းမြို့နယ် အမျိုးသားဒီမိုကရေစီအဖွဲ့ချုပ် NLD ပါတီဥက္ကဋ္ဌ ဦးသက် နိုင်လည်း ပါဝင်ခဲ့ကြောင်း ဒေသခံများက ပြောဆိုကြသည်။

“ စကစ ကဖြန့်တဲ့ ပုံတွေလဲမြင်တယ်။ အဲ့ဒီထဲမှာ ကျနော်တို့ မြို့နယ်ဥက္ကဌပါတာတွေ့ရတယ်။ ရဲဘော် တွေကျဆုံးတာလဲ မှန်ပါတယ်။ အကုန်မျက်မှန်းတမ်းမိတဲ့သူတွေ့ချည်းပဲဗျ။ ” ဟု ခမောက်ကြီးမြို့နယ် ဒေသခံတစ်ဦးက ပြောသည်။

ယင်းတိုက်ပွဲသည် ပြီးခဲ့သည့်မတ်လ ၄ ရက် မနက် ၈ နာရီကျော်ခန့်က ဖြစ်ပွားခဲ့ခြင်းဖြစ်ပြီး စစ်ကောင်စီ တပ်ဖွဲ့ဝင် အင်အား ၅၀ ခန့်ဖြင့် စစ်ကြောင်းထိုးလာခြင်းဖြစ်ကြောင်း၊ တိုက်ပွဲကြာချိန်မှာ မိနစ် ၂၀ ခန့်မျှ ကြာမြှင့်ခဲ့ကြောင်း ဒေသခံများ ပြောပြချက်အရ သိရှိရသည်။

၀ိုင်းဒင်ကျေးရွာသည် ထိုင်း - မြန်မာနယ်စပ် ရှမ်းကိုးရွာအုပ်စုထဲမှ ကျေးရွာတစ်ခုဖြစ်ပြီး ကော့သောင်း ပြည်သူ့ကာကွယ်ရေးတပ်နှင့် ကော်သူလေးတပ်မတော်တို့ ထိန်းချုပ်ထားသည့် ဒေသတစ်ခုဖြစ်ကြောင်း၊ ယင်းတိုက်ပွဲကြောင့် ဒေသခံများသည် ထိုင်းနိုင်ငံဖက်အခြမ်းသို့ စစ်ဘေးရှောင်နေခဲ့ရကြောင်း ဒေသခံ များက ပြောသည်။

“ စကစ တွေက ရမ်းသမ်းပစ်တော့ ထွက်ပြေးရတာပဲလေ။ ဒီဖက်က ထိုင်းနိုင်ငံနဲ့နီးတော့ ထိုင်းဘက် ခြမ်းပဲ အသက်လွှတ်ရာ ဝင်ပြေးကြရတာလေ။ ” ဟု တိုက်ပွဲရှောင်ခဲ့ရသည့် တပ်ဦးမြိုင်သာယာကျေးရွာ မှ ဒေသခံတစ်ဦးက ပြောသည်။

ကော့သောင်းခရိုင်အတွင်း၌ မကြာခဏ တိုက်ပွဲများဖြစ်ပွားသည့်အတွက် ဒေသခံများသည် ထိုင်းနယ် စပ်ဘက်သို့ ယခုလိုထွက်ပြေးတိမ်းရှောင်နေကြရကြောင်း၊ ထိုင်းနိုင်ငံဘက်ခြမ်းတွင်လည်း သက်ဆိုင်ရာ ဒေသအာဏာပိုင်များမှ လုံခြုံရေးတင်းကြပ်စောင့်ကြပ်မှုများ ပြုလုပ်ထားကြောင်းလည်း မြန်မာစစ်ဘေး ရှောင်များက ပြောသည်။

ယင်းတိုက်ပွဲအတွင်း ပြည်သူ့ကာကွယ်ရေးတပ်ဖွဲ့ဝင်များ၏ သေဆုံးခဲ့သည့်ပုံများနှင့် သိမ်းဆည်းခံလိုက် ရသည့် လက်နက်ခဲယမ်းများကို စစ်ကောင်စီ၏ ဝါဒဖြန့်မီဒီယာများမှ မတ်လ ၄ ရက်နေ့တွင် ရေးသားဖြန့် ဝေထားကြောင်း တွေ့ရှိရသည်။

၎င်းတို့၏ဖော်ပြချက်တွင် M 4 (၁)လက်၊ M 16 (၁) လက်၊ A K 47 (၁) လက်၊ ကိုးလုံးကျည် (၁) လက်၊ တူမီး (၁) လက်၊ ကျည်ဆံ ၂၀၀ တောင့်၊ မိုင်း (၃၈) လုံး နှင့် ဆက်စပ်ပစ္စည်းတချို့ သိမ်းဆည်းရမိခဲ့ ကြောင်း ဖော်ပြထားသည်ကို တွေ့ရှိရသည်။ (NN – 25)

ဓာတ်ပုံ - သေဆုံး တော်လှန်ရေးရဲဘော်များ (စစ်ကောင်စီ ဝါဒဖြန့် မီဒီယာ)