ပင်လောင်းမြို့ နမ်းနှိမ်ရွာ သံဃာ ၃ ပါးအပါအဝင် ဒေသခံ ၃၀ တို့ အစုလိုက်အပြုံလိုက်အသတ်ခံရမှုကို နိုင်ငံတကာတရားရုံးများအထိ တိုင်ကြားရန်စီစဉ်နေဟုဆို

နိရဉ္စရာ၊ မတ်လ ၁၃/ ၂၀၂၃

ရှမ်းပြည်နယ်၊ ပင်လောင်းမြို့နမ်းနှိမ်ကျေးရွာတွင် စစ်ကောင်စီတပ်က သတ်ဖြတ်သွားသည့် သံဃာ ၃ ပါးအပါအဝင်ဒေသခံ ၃၀ တို့၏ အမှုကို ဒေသတွင်းအရပ် ဖက်အဖွဲ့အစည်းများက နိုင်ငံတကာတရားရုံးများတွင် တရားစွဲဆိုနိုင်ရန် စီစဉ်နေကြောင်း ဒေသခံများက ပြောသည်။

ကရင်နီလူ့အခွင့်အရေးအဖွဲ့ ဒါရိုက်တာ ဦးဗညား က ‘’ဒီလိုသတ်ဖြတ်မှုဖြစ်စဉ်ကိုတော့ ဒီအတိုင်းထားခဲ့လို့တော့ မ၇ဘူးပေါ့နော်၊ ရှမ်းပြည်နယ်ထဲက အရပ် ဖက်အဖွဲ့အစည်းတွေနဲ့ချိတ်ဆက်နိုင်အောင်ကြိုးစားပြီးနေပါတယ်၊ ဒီဖြစ်စဉ်ကို စနစ်တကျနဲ့ပေါ့နော်။ နိုင်ငံတကာမှာတရားစွဲနိုင်ရေး UN process အ၇ ကြိုးစားနေပါတယ်၊ ဒါက တာဝန်ယူမှုတာဝန်ခံမှု အပိုင်းကိုသွားနေတဲ့အပြင် နောက်နောင်ဒီလိုဖြစ်စဉ်မျိုးမဖြစ်၇လေအောင်၊ ကျူးလွန်တဲ့သူတွေကိုလည်းနောက်ထပ်တဖန်မကျူးလွန်၇အောင် သွားလို့၇အောင်လုပ်နေပါတယ်’’ ဟု နိရဉ္စရာသတင်းဌာနကို ပြောသည်။

မတ်လ ၁၀ ရက်နေ့က နမ်းနှိမ်ရွာကို စစ်ကောင်စီတပ် စစ်ကြောင်းထိုးကာပစ်ခတ်တိုက်ခိုက်မှုများ ပြုလုပ်ခဲ့ကြောင်း၊ မတ်လ ၁၁ရက်နေ့ မနက် ၅ နာရီခန့်မှာလည်း လေကြောင်းကနေ တိုက်ခိုက်ခဲ့ကြောင်း၊ ဒေသခံများမှာ ကြောက်လန့်ပြီး နမ်းနှိမ်ရွာဘုန်းကြီးကျောင်းထဲတွင် တိမ်းရှောင်ခိုလှုံနေစဉ် စစ်ကောင်စီတပ်သားများ ဝင်၇ောက်ပြီး ဘုန်ကြီးကျောင်းထဲက သံဃာ ၃ ပါးအပါအဝင် ဒေသခံ အယောက်၃၀ တို့ကို သေနတ်ဖြင့် ပစ်ခတ် သတ်ဖြတ်သွားခဲ့ကြောင်း KNDF၏ ထုတ်ပြန်ချက်တွင် ဖော်ပြထားသည်။

“အဲဒီဖြစ်စဉ်ကို ရှမ်းပြည်နယ်နဲ့ ကယားပြည်နယ်ထဲကအရပ်ဖက်အဖွဲ့အစည်းတွေပူးပေါင်းပြီး ကျူးလွန်သူတွေကို နိုင်ငံတကာအဆင့်တရားရုံးတွေမှာ တရားစွဲဆိုနိုင်တဲ့အဆင့်အထိ လုပ်ဆောင်သွားပါမယ်။ ဒါက အစုလိုက်အပြုံလိုက် လူသားမျိုးနွယ်အပေါ် ကျူးလွန်တဲ့ စစ်ရာဇဝတ်မှုဖြစ်ပါတယ်” ဟု ၎င်းက ဆက်လက်ပြောကြားသည်။

KNDF ရဲ့ ထုတ်ပြန်ချက်အ၇ မတ်လ ၁၁ ရက်ညနေပိုင်းက စစ်ကောင်စီတပ်များ ရွာထဲဝင်ရောက်သတ်ဖြတ်နေချိန်တွင် ကရင်နီလက်နက်ကိုင်အဖွဲ့တွေ ဖြစ်ကြသည့် KNDF, PDF,KA အဖွဲ့တို့က အနီးအနားတွင် ရှိနေသော်လည်း အင်အားမမျှဖြစ်နေသဖြင့် ၀င်မကူနိုင်ခဲ့ဟု လည်း ထုတ်ပြန်ချက်တွင် ဖော်ပြထားသည်။

မတ်လ ၁၂ ရက်နေ့မနက်ပိုင်းမှသာ ရွာထဲကိုဝင်ရောက်နိုင်ခဲ့ပြီးအဲဒီဘုန်းကြီးကျောင်းထဲတွင် သေဆုံးခဲ့သည့် အလောင်းများကိုတွေ့ရှိခဲ့ပြီး သက်ဆိုင်ရာရဲဌာန၏ ဆေးမှုခင်းစစ်ဆေးများ လုပ်ဆောင်နေသည်ဟု KNDFက ပြောဆိုသည်။

စစ်ကောင်စီတပ်ဖွဲ့ဝင်များ၏ ယခုလုပ်ရပ်အပေါ် လက်တုံ့ပြန်သည့် အနေဖြင့် KNDF, KA, ရှမ်းတောင် PDF,PDF ဖယ်ခုံ, PDF မိုးဗြဲ နှင့် လာရောက်ကူညီပေးသည့် DMOPDF တို့ကတန်ပြန် စစ်ဆင်နေသည်ဟု သိ၇သည်။

လက်ရှိ၎င်းဒေသတွင် စစ်ကောင်စီတပ်နှင့် ဒေသတွင်းတော်လှန်ရေးလက်နက်ကိုင်တပ်ဖွဲ့တို့ အကြား စစ်ရေးတင်းမာနေကြောင်း ရှေ့တန်းသတင်းပေးပို့ချက်များကို ကိုးကားပြီး ကရင်နီစစ်ဘက်ဆိုင်ရာ ဗဟိုသတင်းထုတ်ပြန်ရေးအဖွဲ့ တာဝန်ခံ ခူးညေးရယ် က ပြောသည်။

‘’ပင်လောင်းဖက်ဖြစ်စဉ်တွေအပြီး မနေ့ကအထိတော့ စစ်ကောင်စီတပ်နဲ့ ကျွန်တော်တို့တပ်တွေ ရှမ်း၊ ကယားနယ်စပ်ဖက်ဖယ်ခုံရဲ့အရှေ့ဖက်မှာ တိုက်ပွဲတွေဆက်ဖြစ်နေတယ်၊ ပင်လောင်းဖက်က ရှမ်းပြည်တောင်ပိုင်းဖက်မှာကျတယ်၊ အကွာအဝေးဆို ရင် ကယားနယ်စပ်ကနေဆို တစ်နာရီလောက်တော့ ကား နဲ့သွား၇ဦးမယ်။’’

စစ်ကောင်စီတပ်သည် ပင်လောင်းမြို့နမ့်နှိမ်းရွာဖြစ်စဉ်နှင့် အလားတူ ဖြစ်စဉ်မျိုးကို ၂၀၂၁ ခုနှစ် ဒီဇင်ဘာ ၂၄ ရက်နေ့က ကယားပြည်နယ် ဖရူဆိုမြို့နယ် မိုဆိုကျေးရွာတွင် ကျူးလွန်ခဲ့ကြောင်း၊ ၎င်းဖြစ်စဉ်တွင် Savethe Children ကဝန်ထမ်းနှစ်ဦး၊ အမျိုးသမီးနှင့် ကလေးငယ်များ အပါအဝင် စုစုပေါင်း ၄၉ ဦး ရက်ရက်စက်စက် အသတ်ခံ၇သည်။

ပြီးခဲ့သည့် မတ်လ ၂ရက်နေ့ကလည်း စစ်ကိုင်း တိုင်း မြင်းမူမြို့နယ်တာတိုင်ကျေးရွာတွင် ဒေသခံရွာသား ၁၇ ဦးကို စစ်တပ်က ရက်ရက်စက်စက် အစုလိုက်အပြုံလိုက် သတ်ဖြတ်ခဲ့ကြောင်း၊ ယင်းကဲ့သို့ ဖြစ်စဉ်မျိုးကိုစစ်ကောင်စီတပ်ဖွဲ့ဝင်များက ကျူးလွန်မြဲ ကျူးလွန်နေကြောင်း ဒေသခံများနှင့် အရပ်ဖက်အဖွဲ့အစည်းများကပြောသည်။

ယင်းဖြစ်စဉ်များမှာ လူ့အခွင့်အရေးချိုးဖောက်မှုဖြစ်ပြီး စစ်ရာဇဝတ်မှုမြောက်သဖြင့် ကုလသမဂ္ဂနှင့် နိုင်ငံတကာတရားရုံးများကို အချိန်နှင့် တပြေးညီတင်ပြမှုများ ပြုလုပ်နေကြောင်း အမျိုးသားညီညွတ်ရေးအစိုး၇ NUG လူ့အခွင့်အရေးဝန်ကြီးဦးအောင်မျိုးမင်းက နိရဉ္စရာကို ပြောဆိုထားသည်။

‘’လူ့အခွင့်အရေးချိုးဖောက်နေတဲ့၊ရာဇဝတ်မှုမျိုးစုံကိုချိုးဖောက်နေတဲ့ စစ်အာဏာရှင်နဲ့ စစ်တပ်တာဝန်ရှိသူတွေကို နိုင်ငံတကာ ဥပဒေအရဘယ်လိုအရေးယူနိုင်မလဲဆိုတာ ကြိုးစား ဆောင်ရွက်နေပါတယ်။ ဒါတွေတရားစွဲဆို အရေးယူနိုင်ရေး အတွက် ကျနော်တို့ နိုင်ငံတစ်နိုင်ငံချင်းဖြစ်ပါစေ၊နိုင်ငံအစုလိုက်အဖွဲ့လိုက်ဖြစ်ပါစေ အချိန်နဲ့တပြေးညီ ဆက်လက်လုပ်ဆောင်နေပါ တယ်။ နေ့တိုင်းလဲလုပ်ဆောင်နေလျက်ရှိပါတယ်။’’ဟု ပြောသည်။

NUG ရဲ့စာရင်းတွေအ၇ ငါးဦးနှင့် အထက်သတ်ဖြတ်ခံရမှုကို လူအစုလိုက်အပြုံလိုက် သတ်ဖြတ်ခံ၇မှုဟု သတ်မှတ်ထားပြီးစစ်ကောင်စီလက်ထက်တွင် ယခုလိုကျူးလွန်မှုပေါင်းအကြိမ် ၃၀ ကျော်ရှိသည်ကို စာရင်း ပြုစုထားသည်ဟု သိ၇သည်။ NN– 24 ၊ NN – 25

ဆက်စပ် အကြောင်းအရာများ

နောက်ဆုံးရသတင်းများ