နိရဉ္စရာ၊ မတ်လ ၁၇/ ၂၀၂၃

 

စစ်ကောင်စီမှ နိုင်ငံခြားငွေ ၀ယ်ယူရောင်းချလဲလှယ်ပေးခွင့် လိုင်စင်ရထားသည့် ပြည်တွင်းက ကုမ္ပဏီ ၂၀ ၏ လုပ်ငန်းလိုင်စင်အား ရုပ်သိမ်းလိုက်ကြောင်း သိရှိရသည်။

 

ရုပ်သိမ်းခံရသည့် ကုမ္ပဏီများသည် မြန်မာနိုင်ငံတော် ဗဟိုဘဏ်က ထုတ်ပြန်ထားသော အမိန့်နှင့် ညွှန်ကြား ချက်များကို လိုက်နာမှုမရှိသဖြင့် ဒါရိုက်တာအဖွဲ့အစည်းအဝေးဆုံးဖြတ်ချက်အရ ရုပ်သိမ်းရခြင်းဖြစ်ကြောင်း ကြေညာထားသည်။

 

ရုပ်သိမ်းခံရသည့် ကုမ္ပဏီများထဲတွင် Oake Khaung Travel & Tours Co.,Ltd၊ Senjo Royal Myanmar Co.,Ltd၊ Dawei Popular Co.,Ltd၊ Zam Myo Co.,Ltd၊ Phyp Thet (PT) Co.,Ltd၊ Sky Bound Co.,Ltd၊ Myanmar MCG Corporation Ltd၊ Htwe and Htwe Family Co.,Ltd၊ Won Won Co.,Ltd နှင့် United Eleven Co.,Ltd တို့ ပါ၀င်ကြောင်း သိရှိရသည်။ 

 

“အခုခေတ်မှာ သူတို့ သဘောပဲ၊ ပိတ်တော့လဲ ပိတ်လိုက်တာပေါ့။ အရေးကြီးခွင်ကျယ်လုပ်လို့ဗျာ။ ဘာကို အမ်ိန့် ညွှန်ကြားချက်တွေနဲ့ မလိုက်နာတာလဲ မသိပါဘူးဗျာ”ဟု လိုင်စင်ရုပ်သိမ်းခံရသည့် ကုမ္ပဏီ တစ်ခုက ပြောသည်။

 

ထိုအပြင် Tun Yama Co.,Ltd၊ Myanmar Alinkar Hotel Group Co.,Ltd၊ Cartel Co.,Ltd၊ Super Phoneix Co.,Ltd၊ Golden Falcon Shipping Co.,Ltd၊ Fairness Travels & Tours Co.,Ltd၊ Yadanar Bon Travel & Tours Co.,Ltd၊ Maynmar National Airlines Co.,Ltd၊ Dewant Financial Loan Microfinance Co.,Ltd နှင့် Treasure Su Co.,Ltd တို့လည်း လိုင်စင်ရုပ်သိမ်းခံရသည့် အထဲတွင် ပါ၀င်ကြောင်း သိရှိရသည်။

 

အဆိုပါ လိုင်စင်ရုပ်သိမ်းခံရသည့် ကုမ္ပဏီများ၏ စာရင်းကို မတ်လ ၁၄ ရက်နေ့ ရက်စွဲဖြင့် မြန်မာနိုင်ငံတော် ဗဟိုဘဏ်က ဒါရိုက်တာအဖွဲ့ အစည်းအဝေးဆုံးဖြတ်ချက် အမှတ် (၁/ ၂၀၂၃) ဖြင့် ထုတ်ပြန်ကြေညာ ထားခဲ့ခြင်းဖြစ်သည်။ (NN – 25)

 

ဓာတ်ပုံ - လိုင်စင် ရုပ်သိမ်းခံရသည့် ကုမ္ပဏီများ စာရင်း