ကရင်နီ ဒေသထဲက ခလရ ၁၃၅ ရှေ့တန်းစခန်းကို သိမ်းပိုက်နိုင်ခဲ့ဟု KMIC အဖွဲ့ထုတ်ပြန်

နိရဥ္စရာ၊ မတ်လ ၁၇/ ၂၀၂၃

ကရင်နီ(ကယား)ပြည်နယ်၊သံလွင်မြစ်အရှေ့ခြမ်းရှိ စစ်ကောင်စီ၏ ခလရ ၁၃၅ ရှေ့တန်းတပ်စခန်းကို သိမ်းပိုက်နိုင်ခဲ့ကြောင်း ကရင်နီစစ်ဖက်ဆိုင်ရာဗဟိုသတင်းထုတ်ပြန်ရေးအဖွဲ့ (KMIC) က ယနေ့ ထုတ်ပြန်သည်။

အဆိုပါ စခန်းကို မတ်လ ၁၆ ရက်နေ့ ညနေပိုင်း ၅ နာရီ မှ ၆ နာရီ အတွင်း ကရင်နီကွန်မန်ဒိုတပ်ဖွဲ့မှ ဝင်ရောက်တိုက်ခိုက် သိမ်းဆည်းနိုင်ခဲ့ခြင်းဖြစ်ကြောင်း ထုတ်ပြန်ပြောဆိုထားသည်။ 

တိုက်ခိုက်သိမ်းပိုက်ချိန်၌ စစ်ကောင်စီ တပ်ဖွဲ့ဝင် ၃ဦး ၏ သေဆုံးရုပ်အလောင်းနှင့် ဆက်သွယ်ရေး စက်ကြီး ၁ လုံးအပါအဝင် လက်နက်ခဲယမ်းများ သိမ်းဆည်းရမိကြောင်း ဖော်ပြထားသည်။

၎င်းပြင် ကရင်နီကွန်မန်ဒိုတပ်ဖွဲ့ သည် မတ်လ ၆ ရက်နေ့ကလည်း သံလွင်မြစ်အရှေ့ခြမ်းရှိ ခလရ(၅၄) ဟွေအွမ်စခန်းအား ဝင်ရောက်တိုက်ခိုက်စီးနင်းခဲ့သေးကြောင်း သိရှိရသည်

ထိုစခန်းသိမ်းပိုက်မှုတွင် ၆၀ မမ (၁)လက်၊ စနိုက်ဘာ (၁)လက်၊ MA-1(၁)လက်၊ MA-2(၂)လက်၊ MA-4(၂)လက် သိမ်းဆည်းရမိခဲ့ပြီး စစ်ကောင်စီတပ်ဖွဲ့ဝင် အလောင်း(၆)လောင်း တွေ့ရှိခဲ့ရသည်။

အလားတူ ဖေဖော်ဝါရီ ၂၇ရက်ကလည်း ကရင်နီတပ်မတော် နှင့် ကရင်နီအမျိုးသားများ ကာကွယ်ရေးတပ် KNDF တို့ပူးပေါင်းပြီးစစ်ကောင်စီ၏ ပွိုင့်အမှတ်(၁၄၄၁) စခန်းကို ဝင်ရောက်တို က်ခိုက်သိမ်းပိုက်ခဲ့သေးသည်။  

ပွိုင့်အမှတ် (၁၄၄၁)စခန်းသိမ်းပိုက်မှု၌ ၁၂၀ မမ(၁)လက်၊9 MM (၁)လက်၊ RPG - 7 (၁)လက်၊ ငါးကျင်းမြီး စက်လတ်(၁)လက်၊ MA-2 (၃)လက်၊ MA-4 (၁)လက် အမျိုးအစားမသိ လက်နက်(၂)လက်၊ ဗုံးသီးများနှင့် ကျည်ဆံများသိမ်းဆည်းရရှိခဲ့သည်။

စစ်ကောင်စီ မှ ကရင်နီ ဒေသအတွင်း စစ်မျက်နှာ ၄ ခု ဖွင့် စစ်ကြောင်း ၁၂ ကြောင်းဖြင့် တိုက်ခိုက်မှုများပြုလုပ်နေကြောင်းသိရှိရသည်။

(NN - 25)

ဓာတ်ပုံ - စစ်ကောင်စီ၏ ခလရ ၁၃၅ ရှေ့တန်းတပ်စခန်းမှ သိမ်းဆည်းရမိ လက်နက်ခဲယမ်းများ