စစ်အုပ်ချုပ်ရေးနယ်မြေများဖြစ်သည့် စစ်ကိုင်းတိုင်းတွင်သင်္ကြန်ပွဲတော်ကို စည်ကားအောင် ကျင်းပမည်ဟုဆို

နိရဉ္စရာ၊ မတ်လ ၂၀/၂၀၂၃

စစ်အုပ်ချုပ်ရေး နယ်မြေများအဖြစ် သတ်မှတ်ထားသည့် စစ်ကိုင်းတိုင်းတွင် သင်္ကြန်ပွဲတော်ကို စည်ကား သိုက်မြိုက်အောင် ကျင်းပသွားမည်ဟု စစ်ကောင်စီ၏ တိုင်းဒေသကြီး၀န်ကြီးချုပ် ဦးမြတ်ကျော်က ပြော ဆိုခဲ့ကြောင်း စစ်ကိုင်းတိုင်းအတွင်းမှ ၀န်ထမ်းတစ်ချို့ထံမှ သိရှိရသည်။

ပြီးခဲ့သည့် မတ်လ ၁၅ ရက်နေ့က တိုင်းဒေသကြီးအစိုးရအဖွဲ့ရုံးတွင် ကျင်းပပြုလုပ်ခဲ့သည့် ၂၀၂၃ ခုနှစ် မြန်မာ့ရိုးရာ မဟာသင်္ကြန်ရိုးရာပွဲတော်ကျင်းပရေး လုပ်ငန်းညှိနှိုင်းအစည်းအဝေးတွင် ဝန်ကြီးချုပ်က ပြောဆိုခဲ့ခြင်းဖြစ်ကြောင်း သိရှိရသည်။

“သူပြောသွားတာတော့ ပြည်သူတွေ၊ မွန်းကျပ်မှုတွေ ပြေပျောက်အောင်လို့တဲ့ဗျာ။ အဆိုတော်တွေ၊ မင်း သမီး မင်းသားတွေနဲ့ စည်းကားအောင်လုပ်ဖို့ မှာခဲ့တယ်ပေါ့”ဟု အဆိုပါအစည်းအဝေးကို တက်ရောက်ခဲ့ သည့် စစ်ကောင်စီ၏ ၀န်ထမ်းတစ်ဦးက ပြောသည်။

စစ်ကောင်စီက စစ်ကိုင်းတိုင်းအတွင်းက မြို့နယ် ၁၁ မြို့နယ်ကို စစ်အုပ်ချုပ်ရေးနယ်မြေများအဖြစ် ကြေ ညာထားပြီး ကျေးရွာများအတွင်းသို့ စစ်ကောင်စီတပ်ဖွဲ့ဝင်အင်အားများအပြားဖြင့် စစ်ကြောင်းထိုးကာ ၀င်ရောက်မီးရှို့ဖျက်စီးမှုများ ပြုလုပ်လျက်ရှိကြောင်း ဒေသခံများ က ပြောသည်။

“နယ်မြေတည်ငြိမ်တယ်ပြချင်လို့နေမှာပေါ့။ သူတို့တပ်ရဲ့ အပေါက်၀နားတွေပဲလုပ်လို့ရမှာလေ။ ဒီမှာ နယ်မြေစိုးမိုးမှုက သိတဲ့အတိုင်းပဲလေ”ဟု မုံရွာဒေသခံ တစ်ဦးက ပြောသည်။

အဆိုပါဒေသသည် တော်လှန်ရေးအင်အားစုများ အားကောင်းသည့် နယ်မြေများဖြစ်ကြောင်းနှင့် ယခုကဲ့ သို့ သင်္ကြန်ကာလ စည်ကားအောင်ကျင်းပမည်ဟု ဝန်ကြီးချုပ်မှပြောဆိုခြင်းသည် လက်တွေ့မှာမဖြစ်နိုင် ကြောင်းလည်း ဒေသခံများနှင့် စစ်ကောင်စီ၏ ၀န်ထမ်းများအကြားပြောဆိုနေကြောင်း သိရှိရသည်။

စစ်ကိုင်းတိုင်းတွင် ပြီးခဲ့သည့် ၂၀၁၈ နှင့် ၂၀၁၉ ခုနှစ် အမျိုးသားဒီမိုကရေစီအဖွဲ့ချုပ် NLD အစိုးရလက် ထက်က မုံရွာမြို့ချင်းတွင်းသင်္ကြန်ပွဲတော်ကို ချင်းတွင်းမြစ်ကမ်းဘေးတွင် ပြုလုပ်ကျင်းပခဲ့ပြီး အတော် ကိုစည်ကားမှုရှိခဲ့ကြောင်း သိရှိရသည်။

ရန်ကုန်၊ မန္တလေး၊ နေပြည်တော်နှင့် အခြားမြို့ကြီးများတွင် ပြီးခဲ့သည့် ၂၀၂၂ ခုနှစ်က စစ်ကောင်စီကဦးစီး  ကျင်းပပြုလုပ်ခဲ့သည့် သင်္ကြန်ပွဲတော်သည် လုံခြုံရေးအင်အား တင်းကြပ်စွာချထားပြီး ကျင်းပပြုလုပ်ခဲ့ရ ကြောင်း သိရှိရသည်။

 (NN – 25)

ဓာတ်ပုံ - ၂၀၂၂ ခုနှစ် နေပြည်တော် မြို့တော်၀န် မဏ္ဍပ်