ရှမ်းမြောက်တွင် လူသတ်မှုနှင့်ပြန်ပေးဆွဲမှုကျူးလွန်သူ (၂)ဦးကို ကိုးကန့်တပ်က ထပ်မံသေဒဏ်ပေး

ရှမ်းပြည်နယ် (မြောက်ပိုင်း)ကွတ်ခိုင်မြို့နယ်အတွင်းက လူသတ်မှုနှင့် ပြန်ပေးဆွဲမှုများအား ကျူးလွန်ခဲ့သူ (၂)ဦးကို ကိုးကန့်တပ် (MNDAA)က မေလ ၂၀ ရက်နေ့က အများပြည်သူရှေ့မှောက်တွင် သေဒဏ်ပေးစီရင်ခဲ့ကြောင်း The Kokang သတင်း ဖော်ပြချက်အရ သိရှိရသည်။

သေဒဏ်ပေးခံရသူ (၂)ဦးသည် ၂၀၂၂ ခုနှစ် မတ်လ ၂ ရက်နေ့က ကွတ်ခိုင်မြို့က အသက် (၈)နှစ်အရွယ် ကလေးငယ် တစ်ဦးအား ပြန်ပေးဆွဲကာ မိသားစုထံမှ တရုတ်ယွမ် (၅)သိန်း တောင်းခံခဲ့ကြောင်း၊ တောင်းခံငွေကြေး၏ တစ်ဝက်မျှသာ မိသားစုပေးနိုင်ခဲ့သည့်အတွက် ကလေးငယ်အား သတ်ဖြတ်ခဲ့ကြောင်း၊ ထိုသို့ သတ်ဖြတ်မှုကို ၎င်းတို့ နှစ်ဦးက စစ်ဆေးစဉ် ထွက်ဆိုခဲ့ကြောင်း သတင်းတွင် ဖော်ပြသည်။

၎င်းကျူးလွန်သူ ၂ ဦးအား ၂၀၂၂ ခုနှစ် မတ်လ ၂၅ ရက်နေ့တွင် ကား (၂)စီးအပါဝင် တရုတ် ငွေကြေးများနှင့် အတူ ကိုးကန့်တပ်ဖွဲ့က ဖမ်းဆီးရမိခဲ့သည်ဟု  သိရှိရသည်။

 ပြန်ပေးဆွဲသတ်ခံခဲ့ရသည့် ကလေးမိသားစုများထံသို့လည်း ဖမ်းဆီးရမိသူများထံက သိမ်းဆည်းရမိသည့် ငွေကြေးများ ပြန်လည် ပေးအပ်ခဲ့ကြောင်းကိုလည်း သတင်းဖော်ပြထားမှုအရ သိရှိရသည်။

၂၀၂၃ ခုနှစ် မေလ ၂ ရက်နေ့ကလည်း လားရှိုးဒေသအတွင်း ပြန်ပေးဆွဲ၊ ငွေညှစ်၊ လုယက်မှု ကျူးလွန်သူ (၄) ဦးကို အများပြည်သူရှေ့မှောက်တွင် သေဒဏ်ပေးတရားစီရင်မှုပြုလုပ်ခဲ့သေးသည်။

(NN – 25) ဓာတ်ပုံ - သေဒဏ်ပေးခံရသူများ (The Kokang)