မိုခါမုန်တိုင်းသင့်ပြည်သူများအတွက် ထိုင်းနိုင်ငံရှိSiam Cement Group (SCG) ကုမ္ပဏီ၊ထိုင်းကြက်ခြေနီအသင်းနှင့် ထိုင်းအယုဒ္ဓယဘဏ်တို့က အိမ်အသုံးအဆောင်ပစ္စည်းများကို ပေးပို့လှူဒါန်းလိုက်ကြောင်းသိ၇သည်။

၎င်းပစ္စည်းများကို ထိုင်းနိုင်ငံသံအမတ်ကြီး၊ ထိုင်းကြက်ခြေနီအသင်းနှင့် ထိုင်းအယုဒ္ဓယဘဏ်တို့က လွှဲပြောင်း လှူဒါန်းခဲ့ကြသည်။

ထိုင်းနိုင်ငံသံအမတ်ကြီးက ရန်ကုန်တိုင်းစကစဝန်ကြီးချုပ်သို့လွှဲပြောင်းလှူဒါန်းခဲ့သော ကယ်ဆယ် ထောက်ပံ့ရေးပစ္စည်းများမှာ သွပ်(၆၅၀)ချပ်၊သွပ်သံ(၃)ဗူး၊ သံမျိုးစုံ(၁၂)ဗူး၊ ဆိုလာမီးဝပ်ခြောက်ဆယ် အလုံး(၂၀)ဖြစ်ကြသည်။

ထိုင်းကြက်ခြေနီ အသင်းတာဝန်ရှိသူများက တစ်ခြားကယ်ဆယ်ရေးပစ္စည်းများကို မြန်မာနိုင်ငံ ကြက်ခြေနီအသင်း တာဝန်ရှိသူများထံလည်းကောင်းလွှဲပြောင်းပေးအပ်ခဲ့ကြသည်ဟု သိ၇သည်။

အဆိုပါလှူဒါန်းပွဲကို ဇူလိုင်လ၁၈ ရက်၊ နံနက်တွင် ရန်ကုန်မြို့၊ ဗိုလ်တထောင်မြို့နယ်၊ မိသားစုရပ်ကွက်၊ကမ်းနားကွန်ကရစ်လမ်း၊ ဗိုလ်အောင်ကျော်ဆိပ်ကမ်း၌ပြုလုပ်ခဲ့ရာမြန်မာနိုင်ငံဆိုင်ရာ ထိုင်းသံအမတ်ကြီး H.E. Mr. Mongkol Visitstump နှင့်ရန်ကုန်တိုင်း ဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်းနှင့်တာဝန်ရှိသူများ တက်ရောက်ခဲ့ကြသည်ဟု သိရသည်။

အဆိုပါလှူဒါန်းပစ္စည်းများအားဗိုလ်အောင်ကျော်ဆိပ်ကမ်းတွင် ဆိုက်ကပ်ထားသော စစ်ကောင်စီ၏ထောက်ပံ့ပို့ဆောင်ရေးသင်္ဘောဖြင့် မိုခါမုန်တိုင်းဒဏ်သင့်ဒေသများရှိပြည်သူများထံသို့ ဆက်လက်ပေးပို့ဖြန့်ဖြူးသွားမည်ဟု ဆိုသည်။

ပြီးခဲ့သည့် မေလ၁၄ ရက်ကတိုက်ခတ်သွားခဲ့သည့် အလွန့်အလွန်အားကောင်းသော ဆိုင်ကလုန်းမုန်တိုင်းမိုခါကြောင့် ရခိုင်ဒေသရှိ လူပေါင်း ၁၄၀ ကျော်သေဆုံးပြီးသိန်းနှင့်ချီသော အဆောက်အအုံများလည်း ပြိုကျပျက်စီးသွားခဲ့၇သည်။

မုန်တိုင်းအလွန် ၂လတာကြာမြင့်လာသည်အထိ ကယ်ဆယ်ထောက်ပံ့ရေးများ မရရှိကြ၍ မုန်တိုင်းသင့်၇ခိုင်ပြည်သူများ၏လူမှုစီးပွားဘ၀သည် ပြန်လည်နာလန်ထူနိုင်ခြင်းမရှိကြသေးဟုသိ၇သည်။ (NN-16)