အိန္ဒိယနိုင်ငံသို့ တရားမဝင်ရွေ့ပြောင်းလာသည့်  မြန်မာဒုက္ခသည်များအား လူပုဂ္ဂိုလ်တစ်ဦးစီ၏စိတ်ဆန္ဒကို လျစ်လျူရှု၍ အတင်းအဓမ္မ ဇီ၀မှတ်တမ်း(Biometric) ကောက်ယူခြင်းအား India for Myanmar အဖွဲ့ က အပြင်းအထန် ကန့်ကွက်ရှုတ်ချကြောင်း ဇူလိုင် ၃၀ ရက်က ထုတ်ပြန်ခဲ့သည်။

အဆိုပါအချက်အလက်ကောက်ယူနေမှုအား မဏိပူရပြည်နယ်အစိုးရသည် ပြည်ထဲရေးဝန်ကြီးဌာန၏ညွှန်ကြားချက်ဖြင့် ပြည်နယ်အတွင်း ယာယီခိုလှုံနေကြသည့် စစ်ဘေး မြန်မာဒုက္ခသည်များအားပြီးခဲ့သည့် ဇူလိုင်လ(၂၉) ရက်နေ့က စတင်၍ ကောက်ယူနေခြင်းဖြစ်သည်။

ဇီ၀မှတ်တမ်းအချက်အလက်ကောက်ယူခြင်းဆိုသည်မှာ လူတစ်ဦးချင်းစီ၏ မတူညီသည့်တစ်မူထူးခြားသောရုပ်ပိုင်းဆိုင်ရာ သို့မဟုတ် အပြုအမူဆိုင်ရာလက္ခဏာများကို နည်းပညာအသုံးပြုသိမ်းဆည်းပြီး လူတစ်ဦးချင်းစီအား ခွဲခြားမှတ်တမ်းတင်ရန် ရည်ရွယ်သည်ဟု သိ၇သည်။

ယေဘူယျ ဇီ၀ဗေဒဆိုင်ရာ အချက်အလက်များတွင် လက်ဗွေများ၊ မျက်နှာပုံများ၊ မျက်ဝန်းစကင်န်များ၊ DNA ပရိုဖိုင်များ၊ အသံဗွေရာများနှင့် အခြားအရာများ ပါဝင်သည်ဟု ထုတ်ပြန်ချက်တွင်ဖော်ပြထားသည်။

စစ်ဘေးကြောင့်ထွက်ပြေးလာသည့် မြန်မာဒုက္ခသည်များ၏ စိတ်ဆန္ဒမပါဘဲ ဇီ၀မှတ်တမ်းအချက်အလက် ကောက်ယူနေခြင်းအား ရပ်တန့်ပေးရန်အပြင် ယင်းအချက်အလက်အများအား မြန်မာစစ်အုပ်စုသို့  အချက်အလက်များရောက်သွားမည့်ကို စိုးရိမ်ပူပန်မှုများ ရှိနေကြောင်းဖော်ပြထားသည်။

နည်းပညာဖွံ့ဖြိုးတိုးတက်မှုနှင့်အတူ နိုင်ငံတကာအစိုးရအသီးသီးသည်လုံခြုံရေးအတွက် အချက်အလက် စုဆောင်း၇မည်ဟုဆိုကာပြည်သူများ၏ ဇီ၀မှတ်တမ်းတင်မှုလုပ်ရပ်များ လုပ်ဆောင် လာကြသော်ငြား ၄င်းတို့ရရှိလာသည့် အချက်အလက်များအားအသုံးပြု၍ ဖိနှိပ်မှု၊ နိုင်ငံရေးအသုံးချမှုများ မဖြစ်လာရန် ထိန်းကြောင်းနိုင်သည့်ဒီဂျစ်တယ်ရပိုင်ခွင့် အား လေးစားလိုက်နာသည့် ဥပဒေများ၊ နည်းဥပဒေများနိုင်ငံအသီးသီးတွင် လုံလုံလောက်လောက် မရှိသေးဟုလည်း ထုတ်ပြန်ချက်တွင် ဖော်ပြထားသည်။

၎င်းအပြင် အိန္ဒိယအစိုးရ ကစစ်ဘေးရှောင်ပြည်သူများ၏ ဇီ၀မှတ်တမ်းများရယူရန် ဆောင်ရွက်သည့် ဖြစ်ရပ်တွင်အိန္ဒိယနိုင်ငံသို့ က ထွက်ပြေးလွတ်မြောက်လာကြသည့် မြန်မာပြည်သူအများစုသည်တိုင်းပြည်အားလက်နက် အသုံးပြုအုပ်ချုပ်ရန် ကြိုးပမ်းနေသည့် အကြမ်းဖက်စစ်အုပ်စု၏လူမျိုးတုန်းသတ်ဖြတ်မှု၊အစုလိုက် အပြုံလိုက်သတ်ဖြတ်မှု၊ ဥပဒေမဲ့ဖမ်းဆီးသတ်ဖြတ်မှု၊ အကြောင်းမဲ့ဖမ်းဆီးထောင်ချမှု၊ အမျိုးသမီးများနှင့် ကလေးသူငယ်များအား... အုပ်စုဖွဲ့မုဒိန်းမှု အပါအဝင်သတ်ဖြတ်မှုများဘေးမှလုံခြုံမှုရရှိနိုင်ရေးအတွက်အိမ်နီးချင်းဒီမိုကရေစီနိုင်ငံဖြစ်သော အိန္ဒိယနိုင်ငံသို့ ယာယီ ခိုလှုံလာကြခြင်း ဖြစ်သည်ကို သတိချပ်စေချင်ပါသည်ဟု ဖော်ပြပါရှိသည်။

လက်ရှိတွင်  အိန္ဒိယအစိုးရအနေဖြင့် မြန်မာစစ်အုပ်စုနှင့် အနီးကပ်သံတမန်ဆက်ဆံရေးအား ရပ်တန့်ရန်နှင့် ဒုက္ခသည်များအတွက်ကုလ လုပ်ထုံးလုပ်နည်းများနှင့်အညီ ယာယီနေထိုင်ခွင့်ကဒ်များ ထုတ်ပေး၍ နိုင်ငံတကာလူသားချင်းစာနာမှုအထောက်အပံ့များအား ပေးအပ်ရန်တို့ကို တိုက်တွန်း တောင်းဆိုထားသည်။

အာဏာသိမ်းစစ်တပ်၏ ပြည်သူများအပေါ် ရက်စက်ကြမ်းကြုတ်မှုတို့ကြောင့် ထွက်ပြေးလာရသည့်မြန်မာဒုက္ခသည် ငါးသောင်းကျော် ခြောက်သောင်းနီးပါး အိန္ဒိယတွင် ခိုလှုံနေကြောင်းIndiafor Myanmar အဖွဲ့မှ သိ၇သည်။ (NN- 9)