ခရိုနီ ဦးတေဇနဲ့အပေါင်းအပါများကို စင်္ကာပူအစိုးရက အရေးယူပေးရန်Justice For Myanmar က တောင်းဆို

စင်္ကာပူနိုင်ငံရှိ စီးပွားရေးလုပ်ငန်းများမှတဆင့် စစ်ကောင်စီကို လက်နက်ခဲယမ်း၊ ကုန်ကြမ်းပစ္စည်းများ နှင့် ရန်ပုံငွေများကို တရားမဝင် ထောက်ပံ့ပေးနေကြသည့် ထူးအုပ်စုကုမ္ပဏီ ဥက္ကဋ္ဌ ဦးတေဇ အပါအဝင် ခရိုနီသူဌေးများကိုအရေးယူပေးရန် Justice For Myanmar က စင်္ကာပူအစိုးရထံ တောင်းဆိုလိုက်ကြောင်းသိရသည်။

ထူးအုပ်စု ကုမ္ပဏီ ဥက္ကဋ္ဌ ဦးတေဇ၊ Myanmar Chemical & Machinery ကုမ္ပဏီ ဥက္ကဋ္ဌ ဦးအောင်လှိုင်ဦး၊ International Gateways ကုမ္ပဏီ ဥက္ကဋ္ဌ ဦးနိုင်ထွဋ်အောင်တို့သည် စင်ကာပူနိုင်ငံရှိ စီးပွားရေးလုပ်ငန်း ကွန်ရက်များကိုအသုံးချကာ စစ်ကောင်စီအတွက် စစ်လက်နက်ပစ္စည်းများ၊ လေကြောင်းမှ ပစ်ခတ်တိုက်ခိုက်နိုင်သည့် လက်နက်ပစ္စည်းများကို ထောက်ပံ့ပေးနေကြောင်း Justice For Myanmar က ဇူလိုင်လ ၃၁ ရက်နေ့စွဲနှင့် ဖော်ပြထားသည်။

စစ်ကောင်စီအတွက် စစ်ဘက်-အရပ်ဘက် နှစ်မျိုးသုံးကုန်ပစ္စည်းများ၊ နည်းပညာများကို တိုက်ရိုက် (သို့မဟုတ်) သွယ်ဝိုက်ပြီး လွှဲပြောင်းပေးနေသည်များကို ပိတ်ဆို့အရေးယူပေးဖို့၊ စစ်ကောင်စီ၏ ဘဏ်များ အပါအဝင် ပစ်မှတ်ထားဒဏ်ခတ်ပိတ်ဆို့များကတဆင့် စင်ကာပူ၏ ဘဏ္ဍာရေးစနစ်အတွင်း စစ်ကောင် စီ ဝင်ရောက်ခွင့်ကိုပိတ်ဆို့ပေးဖို့၊ ယခုလို စစ်ကောင်စီအတွက်ပံ့ပိုးပေးနေသည့် စင်ကာပူ ကုမ္ပဏီများကို အများပြည်သူသိရှိစေနိုင်မည့် ပွင့်လင်းမြင်သာသော စုံစမ်းစစ်ဆေးမှုများကို အရှိန်မြှင့် လုပ်ဆောင်ပေးဖို့ စသည့်အချက်များကို Justice For Myanmar က အဓိက တောင်းဆိုထားခြင်း ဖြစ်သည်။

"စစ်ကောင်စီလို လက်နက်တွေလိုအပ်နေတဲ့သူတွေအတွက် လက်နက်တွေ၊ ကုန်ကြမ်းတွေ လွယ်လင့် တကူဝယ်ယူနိုင်နေတာကို ပိတ်ပင်ဖို့က ခက်တော့ခက်တယ်ဗျ၊ သတင်းအချက်အလက်အပေါ်မှာလည်း အများကြီးအခြေခံပါတယ်၊ Justice For Myanmar ကနေ ကြိုးပမ်းချက်တွေကလည်း ထိရောက်တဲ့ ကြိုး ပမ်းမှုတွေ ဖြစ်စေချင်တယ်၊ စင်္ကာပူအစိုးရကိုလည်း သေသေချာချာလေး ဖိအားပေး ပြောစေချင်ပါတယ် ခင်ဗျ"  ဟု စမ်းချောင်းမြို့နယ် အမျိုးသားဒီမိုကရေစီအဖွဲ့ချုပ် NLD ပါတီ ဒုတိယ ဥက္ကဋ္ဌ ဦးဘိုဘိုဦးက နိရဉ္စရာ ကို ပြောသည်။

အရက်ဘက် စစ်ဘက်မခွဲခြားဘဲ ကျေးရွာများအပေါ် လေကြောင်းမှ ပစ်ခတ်တိုက်ခိုက်တာ၊ မတရားဖမ်း ဆီးညှဉ်းပန်းနှိပ်စက်မှုများတွင် အသုံးပြုနေသည့် လက်နက်၊ စက်ပစ္စည်းကိရိယာများနှင့် ရန်ပုံငွေများရ ယူနိုင်ဖို့ ကူညီပေးနေသည်မှာ စင်ကာပူနိုင်ငံကကုမ္ပဏီတွေပဲဖြစ်ကြောင်း Justice For Myanmar က ဆို ထားသည်။

Mi-17၊ Bell 206၊ Mi-2 နှင့် Mi-17 စသည့် ရဟတ်ယာဉ်များ၊ MiG-29 ဂျက်တိုက်လေယာဉ်များနှင့် စက်ပစ္စည်းအစိတ်အပိုင်းများကို စစ်ကောင်စီအတွက် ထောက်ပံ့ပေးနေသည့် ထူးအုပ်စု ကုမ္ပဏီ ဥက္ကဋ္ဌ ဦးတေဇ၊ Myanmar Chemical & Machinery ဥက္ကဋ္ဌ ဦးအောင်လှိုင်ဦးနှင့် International Gateways Group ကုမ္ပဏီ ဥက္ကဋ္ဌ ဦးနိုင်ထွဋ်အောင် တို့ကို အမေရိကန်၊ ယူကေ၊ အီးယူ နှင့် ကနေဒါ နိုင်ငံများက ပိတ်ဆို့အ ရေးယူထားပြီးဖြစ်ကြောင်းလည်း Justice For Myanmar က ဖော်ပြထားသည်။

စစ်တပ်အာဏာသိမ်းအပြီး စစ်ကောင်စီထံသို့ လက်နက်နှင့်ပစ္စည်းကိရိယာများကို ဆက်လက်ထောက်ပံ့ ပေးနေသည့် စင်ကာပူစီးပွားရေးလုပ်ငန်း ၁၃၈ ခုတို့ ပါဝင်ကြောင်း မြန်မာနိုင်ငံအခြေအနေနှင့် ပတ်သက် ပြီး ကုလသမဂ္ဂ အထူးကိုယ်စားလှယ်က ပြောထားကြောင်းလည်း ဖော်ပြထားသည်။ NN – 24

Photo ; Justice For Myanmar , FB