ရခိုင်ပြည်မှ နေ့ရပ်စွန်ခွာသွားသူများကို မည်သည့်အချိန်တွင်မဆို စိစစ်လက်ခံရန် အသင့်ရှိနေဟု စစ်ကောင်စီပြော

“ဒေသအတွင်းဖွံ့ဖြိုးတိုးတက်ရေး လုပ်ငန်းများ အောင်မြင်မှုရရှိနေပြီဟု ဆိုလာပြန်”

နိရဥ္စရာ၊ စက်တင်ဘာလ၁၆/၂၀၂၃

ရခိုင်ပြည်မှ နေရပ်စွန့်ခွာသွားသူများပြန်လည်စိစစ်လက်ခံရေးနှင့် နေရာချထားရေး လုပ်ငန်းအား မည်သည့်အချိန်တွင်မဆို စတင်နိုင်သည့်အခြေအနေသို့ ရောက်ရှိနေပြီဖြစ်ကြောင်း၊ ဒေသအတွင်းဖွံ့ဖြိုးတိုးတက်ရေး လုပ်ငန်းများ အောင်မြင်မှု ရရှိနေပြီဖြစ်ကြောင်းစစ်ကောင်စီ လုံခြုံရေးနှင့် နယ်စပ်ရေးရာ ဝန်ကြီးဌာနဝန်ကြီး ဒုတိယ ဗိုလ်ချုပ်ကြီး ထွန်းထွန်းနောင်က ပြောဆိုလိုက်သည်။

စက်တင်ဘာလ ၁၄ ရက်နေ့နေ့လည်ပိုင်းက နယ်စပ်ရေးရာဝန်ကြီးဌာန စုပေါင်းခမ်းမတွင်ကျင်းပသည့် ၁/ ၂၀၂၃ရခိုင်ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးဆိုင်ရာလုပ်ငန်းများ ညှိနှိုင်းအစည်းအဝေးတွင် စစ်ကောင်စီ ဒုတိယဗိုလ်ချုပ်ကြီး ထွန်းထွန်းနောင်းက ပြောဆိုလိုက်ခြင်းဖြစ်သည်။

“ ယနေ့အချိန်အခါတွင် ရခိုင်ပြည်မှနေရပ်စွန့်ခွာသူများ ပြန်လည်စိစစ်လက်ခံရေးနှင့် နေရာချထားရေးလုပ်ငန်းအားမည်သည့်အချိန်အခါမဆို စတင်နိုင်သည့်အနေအထားသို့ ရောက်ရှိနေပြီဖြစ်သည့်အပြင်ဒေသအတွင်း ဖွံ့ဖြိုးတိုးတက်ရေး လုပ်ငန်းများ အောင်မြင်မှုရရှိနေပြီဖြစ်ကြောင်း” ၎င်းက ပြောဆိုသည်။

အဆိုပါ အစည်းအဝေးကိုစစ်ကောင်စီက ဖွဲ့စည်းထားသည့် ရခိုင်ပြည်နယ် တည်ငြိမ်အေးချမ်းရေးနှင့်ဖွံ့ဖြိုးတိုးတက်ရေး ဆိုင်ရာ ညှိနှိုင်းပေါင်း စည်းရေးကော်မီတီ ဥက္ကဋ္ဌလည်းဖြစ် နယ်စပ်ရေးရာ ဝန်ကြီးဌာန ဝန်ကြီး ဒုတိယဗိုလ်ချုပ်ကြီး ထွန်းထွန်းနောင်၊ ပြည်ထောင်စုအစိုးရအဖွဲ့ရုံး ဝန်ကြီးဌာန (၂) ဝန်ကြီးဦးကိုကိုလှိုင်၊ လူကယ်ပြန် ဝန်ကြီး ဒေါက်တာစိုးဝင်းနှင့် ကော်မီတီဝင်ဒုတိယဝန်ကြီးများတက်ရောက်ခဲ့ပြီးရခိုင်ပြည်နယ် နယ်လုံဝန်ကြီး လည်း Zoome ကတဆင့် တက်ရောက်ခဲ့ကြောင်း သိရှိ၇သည်။

ဘင်္ဂလား-မြန်မာနှစ်နိုင်ငံအစိုးရPilot Project အရနေရပ်စွန့်ခွာသူ ၇၀၀၀ကျော်ကို ယခုနှစ်အတွင်း စိစစ် လက်ခံသွားမည်ဖြစ်ကြောင်း မကြာသေးမီကစစ်ကောင်စီ အမြဲတန်းအတွင်းဝန် ဒေါက်တာ ကိုကိုနိုင်က ပြော ဆိုထားသည်။

ရခိုင်ပြည်ဖွံ့ဖြိုးတိုးတက်ရေးအတွက် လုပ်ငန်းကော်မီတီများအနေဖြင့်ရှေ့ဆက်လုပ်ရမည့်ကိစ္စများကို ရေးဆွဲ ထားသည့် စီမံချက်များနှင့်အညီအောင်မြင်အောင် ကိုယ်စွမ်း ဉာဏ်စွမ်းရှိသမျှ ဝိုင်းဝန်း ဆောင်ရွက်ကြရန် လည်း ဒုတိယဗိုလ်ချုပ်ကြီး ထွန်းထွန်းနောင်က အဆိုပါ အစည်းအဝေးတွင်တိုက်တွန်းခဲ့သည်။

မွတ်ဆလင်ဒုက္ခသည် ၇၀၀၀ ကျော်ခန့်ကိုစစ်ကောင်စီက စိစစ်လက်ခံရန် ပြင်ဆင်နေခြင်းမှာ အမှန်တကယ် လို လား၍မဟုတ်ဘဲနိုင်ငံတကာဖိအားကို ခံနေရသည့် စစ်ကောင်စီက နိုင်ငံရေး အကျိုးအမြတ်အတွက် အသုံးချနေခြင်းဖြစ်ပြီး ဟန်ပြ လုပ်ဆောင်နေခြင်းသာဖြစ်ကြောင်းဒုက္ခသည်များနှင့် နိုင်ငံရေး လေ့လာသူများက သုံးသပ်ပြောဆိုမှုများရှိနေကြသည်။

ရခိုင်ဝါရင့် နိုင်ငံရေးသမားတစ်ဦးဖြစ်သူဦးဦးဖေသန်းက ဒုက္ခသည်ပြန်လည်လက်ခံရေး အစီအစဉ်မှာ ရခိုင် ကိုယ်စားပြုအဖွဲ့အစည်းများ ပါဝင်ရန်လိုအပ်သည်ဟု မကြာသေးမီက နိရဥ္စရာကိုပြောဆိုထားသည်။

“ အထူးသဖြင့်တော့ကျွန်တော်တို့ ၇ခိုင်တမျိုးသားလုံးက အားကိုး အားထားပြုနေတဲ့ ULA/AA က ဒီကိစ္စကို ဖြေရှင်းတဲ့ကိစ္စတွေမှာ ပါဝင်နိုင်မယ်ဆိုရင်တော့ ရခိုင်သူ ရခိုင်သားတွေလည်းပိုလက်ခံလာနိုင်မယ်။ ပိုနီး စပ် သွားမယ်။ ဒါကြောင့် ရခိုင်တွေရဲ့ကံကြမ္မာအဆုံးအဖြတ်ကို ပေးတဲ့နေရာမှာ ရခိုင်အဖွဲ့အစည်းတွေ မပါလို့ မရ ဘူး။ဗမာနိုင်ငံရေးပါတီတွေ၊ ဗမာအဖွဲ့အစည်း၊ ဗမာစစ်တပ်၊ NUG အပါအဝင် ကိုယ့်ရဲ့ နိုင်ငံရေး အသာစီးရလို မှုနဲ့ ဒီကိစ္စကို အသုံးချမယ်ဆိုရင်တော့ သမိုင်းမှာဆိုးဝါးတဲ့ကိစ္စတွေဘဲ ဖြစ်လာမယ်။” ဟုဦး ဦးဖေသန်းကပြောသည်။

စက်တင်ဘာလ ၂ ရက်နေ့က ဝန်ကြီး ဦးကိုကိုလှိုင်ဦးဆောင်သည့် ရန်ကုန်အခြေစိုက် သံရုံး များ မှ အကြီးအကဲများနှင့်သံတမန်များက ပြည်လည်ဝင်ရောက်လာမည့် မွတ်ဆလင်ဒုက္ခသည်များကို လက်ခံ ရန်ပြင်ဆင်ထားသည့် ကြိမ်ချောင်းနှင့် လှဖိုးခေါင် ပြန်လည်လက်ခံရေးစခန်းများကို သွားရောက်လေ့လာ ခဲ့ကြ သည်။

အလားတူ မေလ၅ ရက်နေ့ကလည်း ဘင်္ဂလာအစိုးရ တာဝန်ရှိသူ ၇ ဦးနှင့် မွတ်ဆလင်ဒုက္ခသည် ၂၀ဦးပါ သည့် ကိုယ်စားလှယ်အဖွဲ့က မောင်တောမြို့နယ် တောင်ပြိုလက်ဝဲ၊ ငါးခူရနှင့်လှဖိုးခေါင် ပြန်လည်လက်ခံရေးစခန်းများကို သွားရောက်လေ့လာခဲ့ကြသည်။

ပြည်လည်ဝင်ရောက်လာသည့်မွတ်ဆလင်ဒုက္ခသည်များမှာ ကြားစခန်းများတွင် ယာယီနေထိုင်ရမည် ဖြစ်ပြီး ယင်းမှတစ်ဆင့် အမြဲတမ်းနေထိုင်မည့်နေရာများကို ပြောင်းရွှေ့ရမည်ဖြစ်ကြောင်း သိရှိ၇သည်။

၇ခိုင်ပြည်တွင် ၂၀၁ရခုနှစ် ဖြစ်ပွားခဲ့သည့် လူမျိုးရေး ဘာသာရေးဆန်သည့် ပဋိပက္ခများကြောင်းသိန်းနှင့်ချီ သည့် မွတ်ဆလင်များမှာ ဘင်္ဂလာနိုင်ငံဘက်ကို နေရပ်စွန့်ခွာထွက်ခွာသွားခြင်း ဖြစ်သည်။

(NN-14)

Photo- စစ်ကောင်စီ

ရခိုင်ပြည်မှ နေ့ရပ်စွန်ခွာသွားသူများကို မည်သည့်အချိန်တွင်မဆို စိစစ်လက်ခံရန် အသင့်ရှိနေဟု စစ်ကောင်စီပြော

ဆက်စပ် အကြောင်းအရာများ

နောက်ဆုံးရသတင်းများ