မြန်မာစစ်ကောင်စီက မြို့နယ်ပေါင်း ၂၀ တွင် ရှေ့ပြေး သန်းခေါင်စာရင်း စတင်ကောက်ယူမည်

(အတိုက်အခံများကို ပိုမိုထောက်လှမ်းမှုပြုရန် ရည်ရွယ်သည်ဟု ဝေဖန်သူများက ဆိုကြောင်း CNA က သတင်းဖော်ပြ)

“စီမံချက်အရ အသက် ၁၀ နှစ်အထက် နိုင်ငံသားအားလုံး၏ ကိုယ်ရေးအချက်အလက်နှင့် ဇီဝအချက်အလက်တို့ကို ကောက်ယူမည်ဖြစ်ပြီး စီမံချက်အကောင်အထည်ဖော်ရန် တရုတ်နိုင်ငံအား အကူအညီတောင်းထားဟု သိရ”

ယခုကဲ့သို့ တစ်နိုင်ငံလုံး မငြိမ်မသက်ဖြစ်နေချိန်တွင် သန်းခေါင်စာရင်းကောက်ယူမှုမှာ အတိုက်အခံများအား ပိုမိုထောက်လှမ်းမှုပြုရန်အတွက်သာ ဖြစ်သည်ဟု ဝေဖန်သူများက ဆိုသည်။

စစ်ကောင်စီသည် ၂၀၂၁ ခုနှစ် အာဏာသိမ်းမှုကို ၂၀၂၀ရွေးကောက်ပွဲအတွင်း မဲမသမာမှုရှိသည်ဆိုသော မရေမရာ မခိုင်လုံသည့် အကြောင်းပြချက်ဖြင့် အကြောင်းပြလေ့ရှိသည်။

စစ်ကောင်စီတာဝန်ရှိသူများက တစ်နိုင်ငံလုံး သန်းခေါင်စာရင်း ကောက်ယူမှုကို ရွေးကောက်ပွဲမကျင်းပမီ အပြီး ပြုလုပ်သွားမည်ဖြစ်ပြီး လာမည့် ရွေးကောက်ပွဲကို ၂၀၂၅ တွင် ကျင်းပမည်ဟုလည်း ပြောဆိုနေသည်။

“အောက်တိုဘာလ ၁ ရက် မှ ၁၅ ရက်အတွင်း ရွေးချယ်သတ်မှတ်ထားသည့် နေပြည်တော်အပါအဝင် ပြည်နယ် နှင့် တိုင်းဒေသကြီး မြို့နယ် ၂၀ တွင် ရှေ့ပြေးသန်းခေါင်စာရင်း စတင်ကောက်ယူသွားမည်” ဖြစ်ကြောင်း စစ်ကောင်စီ၏ ကြေညာချက်တွင် ဖော်ပြထားသည်။

နေပြည်တော်ဟု ဖော်ပြထားသော်လည်း မည်သည့်နေရာဟု အတိအကျ ဖော်ပြထားခြင်း မရှိပေ။

“ ယခု ကောက်ယူမည့် မြို့နယ် ၂၀ သည် နမူနာ ဖြစ်သည်” ဟုလည်း ကြေညာချက်တွင် ဖော်ပြထားသည်။

စစ်ကောင်စီ၏ နိုင်ငံပိုင်သတင်းဌာနက ကရင်၊ ပဲခူး နှင့် မန္တလေးတိုင်းဒေသကြီးတို့တွင် ရှေ့ပြေးသန်းခေါင်စာရင်းကောက်ယူမှု စတင်နေပြီဟု ဖော်ပြသော်လည်း မည့်သည့်နေရာဟု အတိအကျ ဖော်ပြခြင်း မရှိပေ။ အဆိုပါဒေသများမှာ ပြီးခဲ့သည့်ရက်များအတွင်း ကပင် စစ်ကောင်စီတပ် နှင့် တော်လှန်ရေးတပ်ဖွဲ့များအကြား တိုက်ပွဲဖြစ်ပွါးခဲ့သည့်နေရာများဖြစ်သည်။

တစ်နိုင်ငံလုံး သန်းခေါင်စာရင်းကောက်ယူမှုကို ၂၀၂၄ တွင် ပြုလုပ်မည်ဟုလည်း စစ်ကောင်စီ၏ ကြေညာချက်တွင် ဖော်ပြထားသည်။

ယခုသန်းခေါင်စာရင်း ကောက်ယူမှုဖြင့် စစ်ကောင်စီသည် ၄င်းတို့၏ အာဏာသိမ်းမှုကို ဆန့်ကျင်တော်လှန်နေကြသည့် ထောင်ပေါင်းများစွာသော အရပ်ဖက်ဝန်ထမ်းများ၊ ဆရာဝန်များ နှင့် ကျောင်းဆရာများကို ခြေလှမ်းတိုး ထောက်လှမ်းရန် ရည်ရွယ်သည်ဟု ဝေဖန်သူများက ဆိုသည်။

မြန်မာနိုင်ငံသည် စစ်တပ်က အာဏာသိမ်းပြီးနောက်ပိုင်း ပဋိပက္ခများ ပိုမိုနက်ရှိုင်းကြီးထွားလာနေပြီး နေ့စဉ်နှင့်အမျှ ဗုံးပေါက်ကွဲမှု၊ တိုက်ခိုက်မှုများကြားတွင် အရပ်သားများ နေထိုင်နေကြရသည်။

မြန်မာစစ်တပ်သည် နိုင်ငံ၏ ဒေသအချို့ကို အပြည့်အဝ ထိန်းချုပ်ထားနိုင်ခြင်း မရှိတော့ကြောင်းလည်း ဝန်ခံထားသည်။

ကုလသမဂ္ဂအစီရင်ခံစာအရ အာဏာသိမ်းပြီးနောက်ပိုင်း အကြမ်းဖက်တိုက်ခိုက်မှုများကြောင့် မြန်မာပြည်သူ ၁ ဒဿမ ၆ သန်း နေရပ်စွန့်ခွါထွက်ပြေးနေရသည်ဟု ဆိုသည်။

စစ်ကောင်စီက ကျင်းပမည့် မည်သည့်ရွေးကောက်ပွဲမဆို အတုအယောင် ရွေးကောက်ပွဲသာ ဖြစ်လိမ့်မည်ဟု ကုလသမဂ္ဂက ပြောကြားခဲ့ပြီး ရွေးကောက်ပွဲကြောင့် သွေးထွက်သံယိုမှုသာ ပိုမိုဖြစ်ပွါးလာမည်ဟု ဆိုသည်။

စစ်ကောင်စီ၏ ကြေညာချက်တွင် ဖော်ပြမထားသော်လည်း အီလက်ထရွန်းနစ် မှတ်ပုံတင်စနစ်ကို အကောင်အထည်ဖော်ရန် စစ်ကောင်စီ ဝန်ကြီးဌာနက စီစဉ်နေသည်ဟုလည်း သိရသည်။

အဆိုပါစီမံချက်အရ အသက် ၁၀ နှစ်အထက် နိုင်ငံသားအားလုံး၏ ကိုယ်ရေးအချက်အလက်နှင့် ဇီဝအချက်အလက်တို့ကို ကောက်ယူမည်ဟု ဆိုသည်။ စီမံချက်အကောင်အထည်ဖော်ရန် တရုတ်နိုင်ငံအား အကူအညီတောင်းထားသည်ဟုလည်း သိရသည်။

NN-27

ref:CNA