ညီနောင်မဟာမိတ် ၃ဖွဲ့ဖြစ်သည့် ရက္ခိုင့်တပ်တော် (AA)၊မြန်မာအမျိုးသားဒီမိုကရက်တစ် မဟာမိတ် တပ်မတော် (MNDAA) နှင့်တအာန်းအမျိုးသားလွတ်မြောက်ရေးတပ်မတော် (TNLA)က ယမန်နေ့က စတင်လိုက်သည် ၁၀၂ရစစ်ဆင်ရေးတွင် ကရင်နီလူမျိုးပေါင်းစုံ လွတ်မြောက်ရေးတပ်ဦး (KNPLF) (ကလလတ)ကလည်းစစ်ကောင်စီကို ပါဝင်တိုက်ခိုက်မည်ဖြစ် ကြောင်း ယမန်နေ့က ကြေညာလိုက်သည်။

ဘုံရန်သူစစ်ကောင်စီကိုတိုက်ခိုက်ရာတွင် တတပ်တအား ပူးပေါင်းပါဝင်မည်ဖြစ်ကြောင်းအဆိုပါထုတ်ပြန်ချက်တွင် ဖော်ပြထားသည်။

“ကျွန်တော်တို့ ရင်ဆိုင်နေရသောစစ်မျက်နှာမှ ဘုံရန်သူ (စကစ)တပ်များကို တိုက်ခိုက်ခြင်းအားဖြင့်မိတ်ဆွေတို့ရဲ့ တိုက် ပွဲတွင် တစ်တပ်တစ်အား ပူးပေါင်းပါဝင်တိုက်ခိုက်မည်ဖြစ်ပါကြောင်း ကျွန်တော်တို့ (ကလလတ)အဖွဲ့အစည်းရဲ့တိုက်ပွဲဝင်စိတ်ဓါတ်ကို ယခုကြေညာချက်ဖြင့် တည်ကြည်စွာ အကြောင်းကြားအသိပေးအပ်ပါသည်”ဟုဖော်ပြထားသည်။

ထို့အပြင် ဘုံရန်သူစစ်အုပ်စုကိုတစ်နိုင်ငံလုံးရှိ လှန်ရေးတပ်ဖွဲ့များ ဟန်ချက်ညီ တိုက်ခိုက်ဖို့လိုအပ်ပြီးညီညွတ် သွေး စည်းမှုကသာလျှင် အောင်ပွဲကို အဆုံးအဖြတ်ပေးမည်ဟုယုံကြည်သည်ဟု ဖော်ပြထားသည်။

အောက်တိုဘာလ ၂၇ ရက်နေ့ကညီနောင်မဟာမိတ် ၃ ဖွဲ့ ပူးတွဲထုတ်ပြန်ချက်တွင် ဖော်ပြထားသည့်မူဝါဒမှာယနေ့ဘုံရန်သူကို တိုက်ခိုက်နေကြသည့် အဖွဲ့အစည်းများမှ လေ့လာအတုယူ လိုက်နာကျင့်သုံးထိုက်သောသဘောထားနှင့် လုပ် ဟန်များ ဖြစ်သည်ဟု (ကလလတ)မှ ရှုမြင်ပြီးတခြားအဖွဲ့အစည်းများနှင့် ဆက်သွယ်၍ တိုးချဲ့ကျင်းသုံးသင့်သည်ဟု လည်းအဆိုပါ ထုတ်ပြန်ချက်တွင် အကြံပြုတိုက်တွန်းထားသည်။

ယမန်နေ့ကညီနောင်မဟာမိတ် ၃ ဖွဲ့စတင်လိုက်သည့် ၁၀၂၇ စစ်ဆင်ရေးတွင်ဗမာပြည်သူ့လွတ်မြောက်ရေးတပ်မတော် (BPLA)၊ အမျိုးသားညီညွတ်ရေးအစိုးရ (NUG)လက်အောက်ခံ PDFများနှင့် ပြည်သူ့ကာကွယ်ရေးတပ်မတော်PDF (မန္တလေး) အပြင် ယခုအခါ (KNPLF)ကလည်း ပူးပေါင်းပါဝင်ရန်တရားဝင် ထုတ်ပြန်လာခြင်းဖြစ်သည်။

KNPLF ခေါ် ကလလတမှာ၁၉၇၈ ခုနှစ်တွင် ကရင်နီတိုးတက်ရေးပါတီမှ ခွဲထွက်ပြီး ၁၉၉၄ ခုနှစ်တွင်စစ်ကောင်စီတပ်နှင့် အပစ်အခတ် ရပ်စဲကာ စစ်ကောင်စီလက်အောက်ခံ နယ်ခြားစောင့်တပ်ဖွဲ့အဖြစ်ပြောင်းလွဲခဲ့သော်လည်း ယခုနှစ် ဇွန်လ ၃၁ ရက်နေ့တွင်စစ်ကောင်စီကို ပြန်လည်တိုက်ခိုက်လာခြင်းဖြစ်သည်။

၁၀၂၇ စစ်ဆင်ရေးပထမနေ့တွင် ရှမ်းပြည်နယ် နမ်းခမ်းမြို့နယ်အတွင်းရှိ နမ်ခမ်း-နမ်းဖတ်ကာလမ်း ၁၃ မိုင် တပ်စခန်း၊ ၁၂ မိုင် တပ်စခန်းနှင့် တာဝါတိုင်ကုန်းရှိစစ်ကောင်စီတပ်စခန်းနှင့် လားရှိုးမြို့နယ်အတွင်းရှိ တိန်းတန်တပ်စခန်းကိုတအာင်းအမျိုး သားလွတ်မြောက်ရေး တပ်မတော် TNLA က သိမ်းယူနိုင်ခဲ့ပြီးလက်နက်ခဲယမ်းမီးကျောက် အမြောက်အများကိုလည်း သိမ်းဆည်းရမိသည်ဟုထုတ်ပြန်ထားသည်။

ထို့အပြင်မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA) ခေါ် ကိုးကန့်တပ်မှလည်း ချင်းရွှေဟော်၊ဖောင် ဆိပ်၊ ကွမ်လုံ၊ မုံးကိုးနှင့်လားရှိုးမြို့ရှိနယ်အတွင်း စစ်ကောင်စီတပ်စခန်းတချို့ကို သိမ်းယူနိုင်ခဲ့ကြောင်းကိုးကန့်သတင်း တွင်း ဖော်ပြသည်။

စစ်ကောင်စီ ပြောခွင့်ရသူဗိုလ်ချုပ် ဇော်မင်းထွန်းက တိုက်ခိုက်ခံခဲ့ရသည့် စခန်းများမှာ စစ်တပ်စခန်းများမဟုတ်ဘဲရဲ နှင့် နယ်ခြားစောင့် တပ်စခန်းများဖြစ်ပြီး ထိခိုက်သေဆုံးမှု တချို့ရှိကြောင်းသတင်းဌာနတချို့ကို ပြောဆိုထားသည်။ (NN-14)