အင်္ဂါ၊ မတ်လ ၅ရက်၊ ၂၀၂၄

ကုန်းကြမ်းမှ ထွက်ပြေးသည့် စစ်ကောင်စီတပ်၏ အကြွင်းအကျန်များကို MNDAAမှ လိုက်လံရှင်းလင်းရာ စစ်သား (၁၀၀)နီးပါးကိုချေမှုန်းနိုင်ခဲ့ပြီး သုံ့ပန်းတစ်ချို့ဖမ်းမိ


  • ရေးသူ: Web Master (NN 30)
  • | ရက်စွဲ: ၀၂ ဒီဇင်ဘာ ၂၀၂၃
  • | ကြည့်ရှုသူ: 1.1k

နိုဝင်ဘာလ ၂၈ ရက်နေ့တွင် MNDAA မှ  ရှမ်းပြည်မြောက်ပိုင်း ကုန်းကြမ်းစခန်းကိုသိမ်းပိုက်ပြီးနောက် လက်နက်မချဘဲ ထွက်ပြေးသွားခဲ့ကြသည့် စစ်ကောင်စီတပ်၏ အကြွင်းအကျန်များကို  လိုက်လံရှင်းရာ စစ်သား (၁၀၀)နီးပါးခန့်ကို ချေမှုန်းနိုင်ခဲ့သည်ဟု ကိုးကန့်သတင်းမီဒီယာတွင် သတင်းဖော်ပြသည်။

ကုန်းကြမ်းတွင် အမြဲတမ်းတပ်စွဲထားသော အရှေ့မြောက်တိုင်းစစ်ဌာနချုပ်လက်အောက်ခံ ခလရ(၁၂၅) ၊ စကခ(၁၂ ၊ ၁၆)မှ အဖွဲ့ဝင်အချို့မှာ လက်နက်ချအလင်းဝင်လာခဲ့သော်လည်း  စကခ(၁၆)မှူးအပါအဝင် အကြွင်းအကျန်အဖွဲ့ဝင်အချို့ မှာ လက်နက်မချဘဲ ထွက်ပြေးသွားခဲ့ကြသည်ဟု ဆိုသည်။

ကုန်းကြမ်းမှထွက်ပြေးလာသူများကို  MNDAA မှ ဝန်းရံပိတ်ဆို့ချေမှုန်းရန် ကြိုးစားခဲ့ကြောင်း၊  နိုဝင်ဘာလ ၂၉ ရက်နေ့တွင် MNDAA လိုက်လံပိတ်ဆို့ တိုက်ခိုက်မှုကြောင့် စစ်ကောင်စီ အကြွင်းအကျန် အဖွဲ့ဝင်(၂၈၀)ကျော်သည်  ရှီရှမ်းဒေသ ရှောက်ကိုင်အုပ်စု ၊ ဝကြည်ကျိုင့်ရွာ နှင့် စူကြာကျိုင့်ရွာကြားရှိတောင်ကုန်းအောက်ခြေသို့ စုစည်းပုန်းအောင်းလာခဲ့ကြောင်း သတင်းတွင် ဆက်လက် ဖော်ပြသည်။



 

နိုဝင်ဘာလ ၃၀ ရက်နေ့ နံနက် (၁၁း၁၀)နာရီခန့်တွင် MNDAA မှ ၎င်းနေရာတွင် စုစည်းပုန်းအောင်း နေသော စစ်ကောင်စီအကြွင်းအကျန်အဖွဲ့ဝင် ဆက်လက်ပစ်ခတ်တိုက်ခိုက်ခဲ့ပြီး ဒီဇင်ဘာလ ၁ ရက်နေ့နံနက်ပိုင်း MNDAA မှ စစ်နယ်မြေရှင်းလင်းရေးလုပ်ဆောင်ချိန်တွင် စစ်ကောင်စီဘက်မှ ပစ်သတ်ချေမှုန်းခံရသောအလောင်း (၂၀)လောင်းတွေ့ရှိခဲ့သည်ဟု ဆိုသည်။  

 

ထိုနေ့ညနေပိုင်းတွင် MNDAA မှ ၎င်းအကြွင်း အကျန်အဖွဲ့ဝင်များကို ထပ်မံလိုက်လံပစ်ခတ်ပြီး စစ်ကောင်စီတပ်သား အလောင်း(၇၀)ကျော်ကို ထပ်မံချေမှုန်းနိုင်ခဲ့ပြီး စစ်သုံ့ပန်း(၄)ယောက် ဖမ်းဆီးရရှိခဲ့သည်။

 

၎င်းပြင် လက်နက်ခဲယမ်းအချို့သိမ်းဆည်းရရှိပြီး သိမ်းဆည်းရရှိ‌သောပစ္စည်းများထဲတွင် မူးယစ်ဆေးဝါးစိတ်ကြွ ဆေးပြားများလည်းပါရှိနေပါသည်။




ဆက်စပ် သတင်းများ