''ဝ'' ပြည်နယ် ဟိုပန်ခရိုင်သစ်ဖွဲ့စည်းမည်

ဟိုပန်မြို့ နှင့် ပန်လုံမြို့တို့ ''ဝ''ပြည်သွေးစည်းညီညွတ်ရေးပါတီ(UWSP/UWSA) အုပ်ချုပ်မှု အောက်သို့  လွှဲပြောင်းယူပြီးနောက် ဟိုပန်ခရိုင်သစ် ဖွဲ့စည်းသွားမည်ဖြစ်ကြောင်း တာဝန်ရှိသူ တစ်ဦးက နိရဉ္စရာသတင်းဌာနကို ပြောသည်။

“ အုပ်ချုပ်ရေးနဲ့ပတ်သက်ပြီး 'ဝ'ကိုယ်ပိုင်အုပ်ခွင့်ရတိုင်းပေါ့နော်။ အခြခံဥပ‌ဒအရ အဲ့ဒီကနေ လွဲပြောင်းယူလိုက်ပြီပါ့နော်။  ကြားကာလ အုပ်ချုပ်ရေးကော်မတီ ကျွန်တော်တို့ဖွဲ့မယ်။ ၂ လပိုင်း ကျတော့မှ အမြဲတမ်း ကော်မတီဖွဲ့မယ်။ ဟိုပန်ခရိုင်သစ် ဖွဲ့စည်းမယ်။ အဲ့ဒီမှာပန်လုံပါမယ်။ နောက် 'ဝ' အုပ်ချုပ်ရေးအောက်က နားဝီးပါမယ်။  ဟိုပန်နဲ့ကပ်လျက်ကတော့ ဗဟိုကနေတိုက်ရိုက်အုပ်ချုပ်တဲ့ နမ့်တစ် အထူးမြို့နယ်လို့ ‌ခေါ်တယ်။ နမ့်တစ်ကိုလည်းထည့်မယ်”ဟု ပြောသည်။

အဆိုပါဒေသသည် တိုင်းရင်းသားလူမျိုးပေါင်းစုံနေထိုင်ပြီး ဟိုပန်ခရိုင်သစ်ဖွဲ့စည်းပါက အဆင်ပြေမည်ဟု ပြောဆိုသည်။

“ ပြည်သူလူထုလည်း အေးအေးဆေးဆေးသမားများတယ် ''ဝ''ကတော့ အများစုပေါ့နော်။ ရှမ်းလည်းများတယ်။ တရုတ်နဲနဲရှိတယ်၊ လားဟူ နောက်မြောင်လူမျိုးတွေရှိတယ်။ ဟိုပန်မှာဆိုရင်လည်း ရခိုင်လည်းရှိတယ်။ ဟိုနည်းနည်း ဒီနည်းနည်းပေါ့။  ၀ပြည်မှာ လူမျိုး ၁၈ မျိုးရှိပါတယ်။ လူမျိုးမခွဲခြားဘူး။ အားလုံးကို နေထိုင်ခွင့်ပြုထားတယ်” ဟု ၎င်းကပြောသည်။

၁၀၂၇ စစ်ဆင်ရေးတွင် မြောက်ပိုင်းညီနောင်မဟာမိတ်တပ်ဖွဲ့များမှ ဟိုပန်မြို့ နှင့် ပန်လုံမြို့များအား ဇန်နဝါရီလ ၅ရက်တွင်  တိုက်ခိုက် ထိန်းချုပ်အပြီးတွင် စစ်ကောင်စီမှ ယင်းမြို့ နှစ်မြို့အား  'ဝ'ပြည်သွေး စည်း ညီညွတ်ရေးပါတီ(UWSP/UWSA) အုပ်ချုပ်မှုအောက်သို့ လွှဲပြောင်းလိုက်ကြောင်း ၀ဘက်မှ တရားဝင်ထုတ်ပြန်ခဲ့ခြင်းဖြစ်သည်။

မြောက်ပိုင်းညီနောင်မဟာမိတ်တပ်ဖွဲ့များမှ သိမ်းပိုက်ရာတွင် လက်နက်ချအညံ့ခံသည့် စစ်ကောင်စီတပ်သား ၇၀၀ ခန့်ကိုလည်း  လားရှိုးမြို့သို့ ပြန်လည်လွှဲပြောင်းပေးခဲ့ကြောင်းသိရသည်။

'ဝ' ကိုယ်ပိုင်အုပ်ချုပ်ခွင့်ရတိုင်းအတွင်းမှ ဟိုပန်မြို့ နှင့် ပန်လုံမြို့များအား   ပြီးခဲ့သည့် ဇန်နဝါရီလ ၁၀ ရက်နှင့် ၁၁ ရက်တွင်အခမ်းအနားဖြင့်  လွဲပြောင်းပေးခဲ့ခြင်းဖြစ်သည်။

ဟိုပန်နှင့်ပန်လုံဒေသ နှစ်ခုအား '၀'ပြည်နယ် ပြည်သူ့အစိုးရထံ လွှဲပြောင်းလက်ခံသည့် အခမ်းအနားကို ဟိုပန်မြို့တော်ခန်းမတွင် ကျင်းပခဲ့ပြီး ဗဟို"၀"ပြည်နယ်ပြည်သူ့အစိုးရကိုယ်စား မိုင်းမောခရိုင်မှူးနှင့် ဌာနဆိုင်ရာတာဝန်ရှိသူများက တက်ရောက်ခဲ့ကြောင်းသိရသည်။

ဟိုပန်မြို့နှင့် ပန်လုံမြို့များသည် 'ဝ' လူမျိုးများပိုင်ဆိုင်သည့်မြို့များဖြစ်ပြီး ၁၉၉၀ ခုနှစ် ဗိုလ်ချုပ်ကြီး စောမောင်လက်ထက်တွင် UWSA ထံ လွှဲပြောင်းရာတွင် ကျန်ခဲ့သည့် မြို့များဖြစ် ကြောင်းသိရသည်။ (NN-20)

ပုံစာ- ၀ပြည်နယ် ငြိမ်းချမ်းရေး နှစ် ၃၀ ပြည့်အခမ်းအနား