ရခိုင်က နေရပ်စွန့်ခွာသူများကိုပြန်လည်လက်ခံရေးမစတင်နိုင်သေးကြောင်း စစ်ကောင်စီ ပြောဆို

ဂျွန်နသန်/နိရဉ္စရာ၊ ဧပြီ ၉/၂၀၂၄

ရခိုင်ပြည်နယ်မှ တစ်ဘက်နိုင်ငံသို့ နေရပ်စွန့်ခွာသူများကို လတ်တလောတွင် ပြန်လည်လက်ခံရေး လုပ်ငန်းစဥ်ကို မစတင်နိုင်သေးခြင်းမှာ ရခိုင်ပြည်နယ်၏ လက်ရှိ လုံခြုံရေးအခြေအနေများကြောင့် ဖြစ်သည်ဟု  စစ်ကောင်စီ နိုင်ငံခြားရေး၀န်ကြီးဌာနက ယမန်နေ့က သတင်းထုတ်ပြန်ခဲ့သည်။

မြန်မာနိုင်ငံအနေဖြင့်ရခိုင်ပြည်နယ်ရှိနေရပ်စွန့်ခွာသူများကိုနှစ်နိုင်ငံသဘောတူညီချက်များနှင့်အညီ ပြန်လည်လက်ခံရန် အတွက် ကြိုးပမ်းဆောင်ရွက်လျက်ရှိပြီး စိစစ်ပြီးနေရပ်စွန့်ခွာသူများကို ပြန်လည်လက်ခံရန် အသင့်ရှိသည်။

မြန်မာနိုင်ငံအစိုးရအနေဖြင့် ပြန်လည်လက်ခံရေးလုပ်ငန်းစဥ်နှင့် ပတ်သက်၍ အပြည့်အ၀ ကတိက၀တ်ပြု ဆောင်ရွက်လျှက်ရှိသည် ဟုဆိုသည်။

လတ်တလောတွင်ပြန်လည်လက်ခံရေးလုပ်ငန်းစဥ်ကိုမစတင်နိုင်သေးခြင်းမှာ ရခိုင်ပြည်နယ်၏ လက်ရှိ လုံခြုံရေးအခြေအနေများကြောင့်ဖြစ်သည်ဟု ယနေ့ထုတ်နိုင်ငံပိုင် သတင်းစာများတွင် ဖော်ပြထားသည့်  နိုင်ငံခြားရေး၀န်ကြီးဌာန၏ သတင်းထုတ်ပြန်ချက်တွင် အထက်ပါ အတိုင်းရေးသားထား သည်။

မြန်မာနိုင်ငံအပေါ် ကုလသမဂ္ဂ၏တစ်ဖက်သတ် ဖိအားပေးမှုသည်အပြုသဘောဆောင်သော ပူးပေါင်း ဆောင်ရွက်မှုအတွက် အထောက်အကူပြုစေမည်မဟုတ်ကြောင်းကိုလည်း  စစ်ကောင်စီ၏  နိုင်ငံခြားရေး၀န်ကြီးဌာန၏သတင်းထုတ်ပြန်ချက်ကဆိုသည်။