မြန်မာနိုင်ငံ၏ အခြေအနေသည် ထိန်းမနိုင်သိမ်းမရအောင် ဆက်လက် ဖြစ်ပေါ်နေကြာင်း ကန်သံအမတ်က လုံခြုံရေးကောင်စီတွင်ပြောဆို
ဂျွန်နသန်၊ နိရဉ္စရာ၊ မေ ၃၀/၂၀၂၄
မြန်မာနိုင်ငံ၏အခြေအနေသည် ထိန်းမနိုင်သိမ်းမရအောင် ဆက်လက် ဖြစ်ပေါ်နေကြောင်း၊စစ်အစိုးရ၏ လက်ရှိဖြစ်ပေါ်နေသော ရက်စက်ကြမ်းကြုတ်မှုများနှင့်လူ့အခွင့်အရေး ချိုးဖောက်မှုများကို ရှုတ်ချကြောင်းနှင့်စစ်တပ်၏ လေယာဉ်ဆီသုံးစွဲခွင့်ကိုကန့်သတ်ရန် လုံခြုံရေးကောင်စီကိုထပ်မံတောင်းဆိုကြောင်းကုလသမဂ္ဂဆိုင်ရာ အမေရိကန် သံအမတ်ကြီးက လုံခြုံရေးကောင်စီ တွင် ပြောကြားလိုက်သည်။
ရခိုင်ပြည်နယ်တွင်ပိုမိုဆိုးရွားလာနေသည့် အခြေအနေများကို လည်းစောင့်ကြည့်နေကြောင်းယခုနှစ်ငါးလအတွင်း မြန်မာစစ်အစိုး၇သည် နိုင်ငံအနှံ့လေကြောင်းတိုက်ခိုက်မှု (၁၀၀၀)နီးပါး ပြုလုပ်ခဲ့ပြီး တစ်ရက်လျှင်ပျမ်းမျှ တိုက်ခိုက်မှု ခြောက်ကြိမ်ထိရှိကြောင်း ၊ လေကြောင်းတိုက်ခိုက်မှုငါးခုအနက် တစ်ခုမှာ ရခိုင်ပြည်နယ်ကို ပစ်မှတ်ထားပြီးသုံးပုံတစ်ပုံမှာ အရပ်သားများကို ပစ်ခတ် တိုက်ခိုက်ခြင်းဖြစ်ကြောင်း မေလ(၂၉)ရက်ကပြုလုပ်သည် ကုလသမဂ္ဂလုံခြုံရေးကောင်စီ အဖွဲ့ဝင်များ နှင့် အဖွဲ့ဝင် မဟုတ်သူများ ဆွေးနွေးကြသည့် Arria-formula အစည်းအဝေးတွင် ကုလသမဂ္ဂဆိုင်ရာ အမေရိကန် သံအမတ်ကြီး Linda Thomas Greenfield ကအထက်ပါအတိုင်း ပြောကြားခဲ့သည်။
မြန်မာစစ်အစိုး၇သည်ယခုနှစ်အစပိုင်းမှစပြီး နိုင်ငံအနှံ့ လေကြောင်းတိုက်ခိုက်မှုပေါင်း ၁၀၀၀ နီးပါး ပြုလုပ်ခဲ့ပြီးတစ်ရက်လျှင် ပျမ်းမျှတိုက်ခိုက်မှု ခြောက်ကြိမ်ရှိခဲ့သည်။
၂၀၂၄ခုနှစ် ငါးလအတွင်း မြန်မာ စစ်အစိုး၇သည်၂၀၂၂ ခုနှစ် နှင့် ၂၀၂၃ ခုနှစ် နှစ်ခုပေါင်းထက် လေကြောင်းတိုက်ခိုက်မှုများပိုမိုပြုလုပ်ခဲ့သည်။
အဆိုပါလေကြောင်းတိုက်ခိုက်မှုများသည်လူမှုအသိုင်းအဝိုင်းတစ်ခုလုံးကို ပျက်စီးစေခဲ့ပြီးအိမ်များနှင့် ကျောင်းများ၊ ကျန်းမာရေးစောင့်ရှောက်မှု အဆောက်အအုံများနှင့်ဝတ်ပြုရာနေရာများကို ဖျက်ဆီးခဲ့သည်။
"ရွာများကိုမီးရှို့ခြင်း၊ညှဉ်းပန်းနှိပ်စက်ခြင်း၊ ခေါင်းဖြတ်သတ်ဖြတ်ခြင်းနဲ့အခြား ရက်စက်ကြမ်းကြုတ်တဲ့ လုပ်ရပ်တွေ အပါအဝင် အခုလက်ရှိဖြစ်ပေါ်နေတဲ့မြန်မာ စစ်အစိုးရရဲ့ ရက်စက်ကြမ်းကြုတ်မှုများနဲ့ လူ့အခွင့်အရေးချိုးဖောက်မှုတွေကို ကျွန်မတို့ ရှုတ်ချပါတယ်။ ကျွန်မတို့အားလုံးကအခုလို မတွေးဝံ့စရာကောင်းတဲ့ ကြောက်မက်ဖွယ်ရာလုပ်ရပ်တွေကို အများ သိအောင်ထုတ်ဖော်ပြောဆိုကြရမှာဖြစ်ပါတယ် " ဟု အမေရိကန်သံအမတ်ကြီးက ပြောဆိုသည်။
"ဒါပေမယ့် ကျွန်မတို့ရဲ့ အသံကို ထုတ်ဖော်တာထက်၊ ကျွန်မတို့ ကအကောင်အထည်ဖော်လုပ်ဆောင်ရမှာ ဖြစ်ပါတယ်။ အာဆီယံဟာကုလသမဂ္ဂရဲ့ ပံ့ပိုးကူညီမှုပိုမိုရရှိရရှိဖို့ အကြိမ်ကြိမ် တောင်းဆိုနေ ခဲ့ပါတယ်။ စစ်အစိုးရထံလက်နက်စီးဆင်းမှုကို ကန့်သတ်ရန် ကုလသမဂ္ဂ အထွေထွေ ညီလာခံက တောင်းဆိုခဲ့ပါတယ်။လေယာဉ်ဆီ စီးဆင်းမှုကို ကန့်သတ်ရန် သဘောတူညီချက် တစ်ရပ်ကိုလူ့အခွင့်ရေးကောင်စီကအတည်ပြုခဲ့ပါတယ်။ စစ်တပ်ရဲ့ လေယာဉ်ဆီသုံးစွဲခွင့်ကို ကန့်သတ်ဖို့ လုံခြုံရေးကောင်စီကို ထပ်မံတောင်းဆိုပါတယ်" ဟု အမေရိကန်သံအမတ်ကြီးက ဆက်လက်ပြောဆိုသည်။
မြန်မာနိုင်ငံအတွက်ပိုမိုငြိမ်းချမ်းပြီး ဒီမိုက ရေစီနည်းကျသည့် အနာဂတ်ကို ဦးဆောင်နေကြသူများအထူးသဖြင့် လူငယ်ခေါင်းဆောင်များနှင့် ဒီမိုကရေစီလိုလားသည့်အုပ်စုများကိုဦးဆောင်နေကြ သူများကို အပြည့်အ၀ ထောက်ခံပါကြောင်း (လုံခြုံရေးကောင်စီ) ဆုံးဖြတ်ချက် ၂၆၆၉ အရ မြန်မာနိုင်ငံကို ကိုယ်စားပြုဒီမိုကရေစီလမ်းကြောင်းပေါ်သို့ ပြန်လည်ရောက်ရှိရန် အားလုံးပါဝင်သောတွေ့ဆုံဆွေးနွေးမှုတစ်ရပ်ကို အမေရိကန်ပြည်ထောင်စုကအားပေး ထောက်ခံပါကြောင်း အမေရိကန်သံအမတ်ကြီး Linda Thomas Greenfield က ပြောကြားခဲ့သည်။
လှူရန်