မေလအတွင်း နိုင်ငံတဝန်းတွင် စစ်တပ်၏ သတ်ဖြတ်ခံရသူ ၂၅၆ ဦးရှိပြီး ထိုအထဲတွင် ရခိုင်တွင်အများဆုံးဖြစ်ကြောင်း AAPP ထုတ်ပြန်

လူထက်နိုင် (ဒွါရာမြီ)၊ နိရဉ္စရာ၊ ဇွန်လ ၆ ရက်/၂၀၂၄

၂၀၂၄ ခုနှစ်၊ မေလ ၁ ရက်နေ့မှ ၃၁ ရက်နေ့အထိ နိုင်ငံတဝန်း၌ အကြမ်းဖက်စစ်အုပ်စုကြောင့် အမျိုးသမီး (၇၄) ဦးနှင့် အမျိုးသား (၁၈၂) ဦး စုစုပေါင်း (၂၅၆) ဦး သေဆုံးခဲ့သည်ဟု နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) မှ ဇွန် ၅ ရက်နေ့တွင် သတင်းထုတ်ပြန်သည်။

သေဆုံးသူများကို  အမည်နှင့်တကွ အတည်ပြုနိုင်ခဲ့သည်ဟုဆိုသည်။

သေဆုံးသူအများအထဲတွင် သေနတ်ဖြင့် ပစ်ခတ်ခံရ၍ သေဆုံးသူများနှင့်​ ဖမ်းဆီးခံရပြီးနောက် သတ်ဖြတ်ခံရသူဟူ၍ နှစ်မျိုးခွဲခြားထားသည်။

ရခိုင်ပြည်နယ်တွင် သေဆုံးသူများမှာ  ဖမ်းဆီးခံရပြီးနောက် သတ်ဖြတ်ခံရသူများဖြစ်ပြီး အရေအတွက် (၄၈) ဦးဖြင့် သေဆုံးမှု အများဆုံးဖြစ်သည်ဟု ဖော်ပြထားသည်။

သေဆုံးသူ ၂၅၆ ဦးအထဲတွင် သေနတ်ဖြင့်ပစ်ခတ်ခံရမှုကြောင့် သေဆုံးရသူ အမျိုးသမီး (၇) ဦးနှင့် အမျိုးသား (၅၁) ဦး စုစုပေါင်း (၅၈) ဦး ပါဝင်ကာ အဆိုပါအရေအတွက်ထဲမှ (၃၉) ဦးမှာ စစ်ကိုင်းတိုင်းမှ ဖြစ်သည်။

အလားတူပင် ဖမ်းဆီးထိန်းသိမ်းပြီးနောက် သတ်ဖြတ်မှုကြောင့် သေဆုံးရသူ အမျိုးသမီး (၈) ဦးနှင့် အမျိုးသား (၇၈) ဦး စုစုပေါင်း (၈၆) ဦး ရှိခဲ့ပြီး အဆိုပါအရေအတွက်၌လည်း ရခိုင်ပြည်နယ်မှာ (၄၈) ဦးဖြင့် သေဆုံးမှု အများဆုံးဖြစ်သည်ဟု ဖော်ပြထားသည်။

ဖေဖော်ဝါရီလ ၁ ရက်၊ ၂၀၂၁ ခုနှစ် မတရားစစ်အာဏာလုမှုဖြစ်စဉ်စတင်ချိန်မှ ဇွန်လ ၅ ရက်၊ ၂၀၂၄ ခုနှစ်အထိ အကြမ်းဖက်စစ်အုပ်စုနှင့် ၎င်း၏လက်ပါးစေများကြောင့် နွေဦးတော်လှန်ရေး ကာလအတွင်း သေဆုံးခဲ့ရသည့် ဒီမိုကရေ စီရေး လှုပ်ရှားသူများနှင့် ပြည်သူစုစုပေါင်းမှာ (၅၂၃၃) ဦး ရှိခဲ့ပြီဖြစ်သည်။ အေအေပီပီအနေဖြင့် အတည်ပြုရန် လိုအပ် နေသည့် အမည်စုံစမ်းဆဲ သတ်ဖြတ်ခံရသူ (၁၈၀၀) ဝန်းကျင်စာရင်းကိုလည်း သီးခြားပြုစု ထားကြောင်းလည်း ထုတ်ပြန်ချက်တွင်ပါရှိသည်။

ထို့အပြင် မတရားအာဏာလုမှုဖြစ်စဉ်နှင့် ဆက်စပ်၍ ဖမ်းဆီးခံခဲ့ရသူ စုစုပေါင်း (၂၆၈၂၄) ဦးရှိပြီး ထိုအထဲမှ (၂၀၅၆၅) ဦးမှာ ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူများအနက်မှ (၉၁၅၆) ဦးမှာ ထောင်ဒဏ်ချမှတ်ခံထားရကြောင်းထုတ်ပြန်ချက်တွင်ပါရှိသည်။

“ဇွန်လ ၅ ရက်၊ ၂၀၂၄ ခုနှစ်အထိ နွေဦးတော်လှန်ရေးနှင့်ဆက်စပ်၍ သေဒဏ်ချမှတ်ခံထားရပြီး အကျဉ်းထောင်များတွင် ထိန်းသိမ်းခံနေရသူ စုစုပေါင်း (၁၂၄) ဦး ရှိပြီဖြစ်သည်။

မျက်ကွယ်သေဒဏ်ချမှတ်ခံထားရသူ (၄၃) ဦး အပါအဝင် (၁၁၉) ဦးမှာ မျက်ကွယ်ပြစ်ဒဏ် ချမှတ်ခံထားရသည်။ ထိုကြောင့် သေဒဏ်ချမှတ်ခံထားရသူ စုစုပေါင်း (၁၆၇) ဦး ရှိပြီဖြစ်သည်။ ဖမ်းဆီးခံရပြီးနောက် ပြန်လည်လွတ်မြောက်လာသူ ဦးရေမှာ (၆၂၅၉) ဦး ရှိသည်” ဟု ထုတ်ပြန်ချက်တွင်ဖော်ပြထားသည်။

ဖော်ပြပါ ကိန်းဂဏန်းအရေအတွက်များသည် အေအေပီပီမှ လက်လှမ်းမီသမျှ ကောက်ယူ ရရှိထားသည့် အရေအတွက် ဖြစ်ပြီး မြေပြင်တွင် ဖြစ်ပွားနေသည့် အချက်အလက်များမှာ ယခုထက် ပိုမိုများပြားနိုင်ပါသည်။  အချက်အလက်များကို ထပ်မံကောက်ယူရရှိပြီး အတည်ပြုနိုင်ပါက ဆက်လက် ထည့်သွင်းဖော်ပြသွားမည်ဖြစ်ကြောင်း AAPP မှထုတ်ပြန်ထားသည်သည်။