လူထက်နိုင်(ဒွါရာမြီ)၊ နိရဉ္စရာ၊ ဇွန်လ ၆ ရက်/၂၀၂၄

စစ်ကောင်စီ၏အတင်းအဓမ္မ စစ်မှုထမ်းစေရေး ဥပဒေသစ်ထုတ်ပြန်ပြီး (၂) လအတွင်း နီးစပ်ရာ တောင်ပိုင်း စစ်ဒေသ လွတ်မြောက်နယ်မြေများထဲသို့ ရောက်ရှိလာခဲ့ကြသည့် PDF ရဲဘော် ၉၅၉  စစ်သင်တန်းဆင်း ခဲ့ကြပြီဖြစ်ကြောင်း  PDF (တောင်ပိုင်းစစ်ဒေသ)မှ ဇွန်လ ၅ရက်တွင် သတင်းထုတ်ပြန်ထားသည်။

အကြမ်းဖက်စစ်ကောင်စီ၏ အတင်းအဓမ္မစစ်မှုထမ်းစေရေး ဥပဒေသစ်ထုတ်ပြန်၍ ပြည်သူအချင်းချင်း တိုက်ခိုက်ရန်မတရားစေခိုင်းခြင်းကြောင့် လူငယ်အများစုသည် နီးစပ်ရာလွတ်မြောက် နယ်မြေများထဲသို့ သွားရောက်ခိုလှုံကာ လက်နက်ကိုင်လမ်းစဉ်အား ရွေးချယ်ခဲ့ကြသူများ ရှိလာခဲ့သည်ဟု သတင်း ထုတ်ပြန်ချက်တွင် ဖော်ပြသည်။'

ထိုအထဲတွင်ပြည်သူလူထုအားရှေးရှု၍ စစ်မှန်သော ဖက်ဒရယ်ဒီမိုကရေစီပြည်ထောင်စုပေါ်ထွန်း လာရေးအတွက် အမျိုးသားညီညွတ်ရေးအစိုးရကဖွဲ့စည်းတည်ထောင်ထားသော၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသသို့ဝင်ရောက်ခိုလှုံ၍ အကြမ်းဖက် စစ်ကောင်စီအားပြန်လည်ခုခံတွန်းလှန်ရန် ရောက်လာကြသူများလည်း ရှိခဲ့သည်။

တောင်ပိုင်းစစ်ဒေသ၊စစ်ဒေသခွဲ ၃ အနေဖြင့် ဝင်ရောက်ခိုလှုံလာသူများအား စိစစ်လက်ခံပြီးအခြေခံစစ်ပညာသင်တန်းများနှင့် သက်ဆိုင်ရာဌာနအလိုက် ကျွမ်းကျင်မှုသင်တန်းများပို့ချပေးခဲ့ရာ ပြီးခဲ့သည့်ဧပြီလနှင့် မေလအတွင်း ပြည်သူ့ကာကွယ်ရေးတပ်မတော်သားဦးရေ(၉၅၉)ဦး မွေးထုတ်ပေးနိုင်ခဲ့သည်ဟု ဆိုသည်။ 

ပြည်သူ့ကာကွယ်ရေးတပ်မတော်သည်မူလချမှတ်ထားသည့်လမ်းစဉ်အတိုင်း ပြည်သူလူထု လိုလားသည့်ပြည့်သူ့အာဏာပြည်သူ့လက်ထဲ ပြန်ရောက်သည်အထိ စွမ်းစွမ်းတမံကာကွယ် စောင့်ရှောက်သွားမည်ဟု ထပ်လောင်းကတိသစ္စာပြုပါသည်ဟု ထုတ်ပြန်ချက်တွင်ဖော်ပြထားသည်။ 

ဓာတ်ပုံ-တောင်ပိုင်းစစ်ဒေသ မေလအတွင်း အခြေခံစစ်ပညာသင်တန်းဆင်းပွဲနှင့် လက်နက်တပ်ဆင်ခြင်းအခမ်းအနားများ