လူထက်နိုင် (ဒွါရာမြီ)၊ နိရဉ္စရာ၊ ဇွန်လ ၁၂ ရက်/၂၀၂၄

စစ်ကောင်စီကို တရုတ်နိုင်ငံမှ ကင်းလှည့်ရေယာဉ် ၆ စီး ထောက်ပံ့ပေးခဲ့ခြင်းသည်မြန်မာနိုင်ငံက ရေကြောင်းပို့ဆောင်မှုဘေးကင်းရေး၊ ရေပေါ်ရှာဖွေကယ်ဆယ်ရေးနှင့်ရေအရင်းအမြစ်ကာကွယ် အသုံးချမှု လုပ်ငန်းများကို ပိုမိုကောင်းမွန်စွာဆောင်ရွက်ရန်ကူညီပေးမည်ဖြစ်ကြောင်း  ဇွန်လ ၁၁ရက်နေ့တွင် မြန်မာနိုင်ငံဆိုင်ရာ တရုတ်သံရုံးမှ ထုတ်ပြန်ချက်တွင် ဖော်ပြသည်။

တရုတ်နိုင်ငံအစိုးရမှ မြန်မာစစ်ကောင်စီကို ကူညီထောက်ပံ့သောကင်းလှည့်ရေယာဥ် ၆ စီးကို ဇွန် ၁၁ ရက်တွင် ရန်ကုန်မြို့၌အောင်မြင်စွာလွှဲပြောင်းပေးအပ်ခဲ့သည်။

အဆိုပါစီမံကိန်းကို ၂၀၁၈ ခုနှစ် ဇွန်လတွင် မြန်မာနိုင်ငံအစိုးရက တရုတ်နိုင်ငံထံသို့တရားဝင်အဆိုပြုခဲ့ပြီး နှစ်ဦးနှစ်ဖက်က ၂၀၂၀ ပြည့်နှစ် သမ္မတ ရှီကျင့်ဖျင်၏မြန်မာနိုင်ငံခရီးစဉ်အတွင်း အဆိုပါစီမံကိန်း၏ လဲလှယ်မှု စာလွှာကိုလက်မှတ်ရေးထိုးခဲ့သည်ဟု သံရုံးထုတ်ပြန်ချက်တွင် ဖော်ပြသည်။ 

တရုတ်နိုင်ငံဘက်က ဖော်ဆောင်သည့်ကုမ္ပဏီသည် ကပ်ရောဂါစသည့်အခက်အခဲများကို ကျော်လွှားပြီး ရေယာဉ်များကို အချိန်မီထုတ်လုပ်ပို့ဆောင်ပေးခဲ့သည်ဟုဆိုသည်။

တရုတ်-မြန်မာ နှစ်နိုင်ငံက ယခုအကြိမ် ကင်းလှည့်ရေယာဉ်လွှဲပြောင်းခြင်းမှအစပြု၍တရား ဥပဒေ စိုးမိုးမှုစွမ်းရည် တည်ဆောက်ခြင်းဆိုင်ရာ ပူးပေါင်းဆောင်ရွက်မှုကိုနက်ရှိုင်းစေပြီး လောင်းကစား၊ လိမ်လည်မှု၊ မူးယစ်ဆေးဝါး စသည့်နိုင်ငံဖြတ်ကျော်ပြစ်မှုကျူးလွန်မှုများကို အဆက်မပြတ် နက်ရှိုင်းစွာ တိုက်ဖျက်သွားကာကမ္ဘာလုံးဆိုင်ရာ လုံခြုံရေးအစီအမံကို မြန်မာနိုင်ငံ၌ အကောင်အထည် ဖော်ခြင်းအားတက်ကြွစွာမြှင့်တင်ဆောင်ရွက်ခြင်းဖြင့် နှစ်နိုင်ငံ၏ဘုံအကျိုးစီးပွားကိုကာကွယ် စောင့်ရှောက်သွားမည် ဖြစ်ကြောင်းဖြင့်လည်း သံရုံးထုတ်ပြန်ချက်တွင် ဖော်ပြထားသည်။