ဂျွန်နသန်၊ နိရဉ္စရာ၊ ဇွန် ၂၁/ ၂၀၂၄

မြန်မာနိုင်ငံသားများနှင့်နယ်စပ်ရှိဒုက္ခသည်များအတွက် လူသားချင်းစာနာထောက်ထားမှုဆိုင်ရာအကူအညီပေးနိုင်ရန်အတွက် ယူရို (၁၅) သန်း ထပ်မံပေးအပ်သွားမည်ဖြစ်ကြောင်း ဥရောပသမဂ္ဂ(EU)က ဇွန်၂၀ရက်ကသတင်းထုတ်ပြန်လိုက်သည်။

မြန်မာနိုင်ငံတွင်ဖြစ်ပွားနေသောပဋိပက္ခများသည် အရှိန်အဟုန်ဖြင့် တိုးလာနေသည့်အတွက်လူသားချင်းစာနာထောက်ထားမှုဆိုင်ရာ လိုအပ်ချက်များ ထပ်တိုးလိုအပ်လာသောကြောင့်ဥရောပသမဂ္ဂသည် နိုင်ငံတွင်း ထိခိုက်ခံရသော ပြည်သူများနှင့်အိမ်နီးချင်းနိုင်ငံများဆီ ထွက်ပြေး တိမ်းရှောင်သွားရသော ဒုက္ခသည်များအား ကူညီနိုင်ရန် ယူရို (၁၅)သန်းထပ်မံ ပေးအပ်သွားမည်ဟု ဆိုသည်။

"မြန်မာနိုင်ငံမှာဖြစ်ပွားနေတဲ့ ပဋိပက္ခတွေဟာ ပြည်သူလူထုအတွက် လူသားချင်းစာနာမှုဆိုင်ရာအလွန်ဆိုးရွားတဲ့ အကျိုးဆက်တွေကို ဖြစ်ပေါ်စေပါတယ်။အခုထပ်မံချထားပေးတဲ့ယူရို (၁၅) သန်းဟာ ပြင်းထန်သော အကာအကွယ်မဲ့မှု၊ဆိုးရွားသော စားနပ်ရိက္ခာဖူလုံရေး အကျပ်အတည်းနှင့် အရေးကြီးသောကျန်းမာရေးစောင့်ရှောက်မှု လက်လှမ်းမမီခြင်းအပါအဝင် ခြိမ်းခြောက်မှုများစွာကိုရင်ဆိုင်နေရသော လူဦးရေအတွက် သက်သာရာရစေမှာပါ။ အရပ်သားများအပေါ်အကြမ်းဖက်မှုများ တိုးလာခြင်းအကြောင်း ထိတ်လန့်ခြောက်ခြားစရာအစီရင်ခံစာများအရ အားလုံးဟာ နိုင်ငံတကာ လူသားချင်းစာနာထောက်ထားမှုဆိုင်ရာဥပဒေကို လေးစားလိုက်နာရန် အရေးကြီးကြောင်း ထင်ရှားပါတယ်။ဒီ အခြေဟာ အထူးသဖြင့် လက်နက်ကိုင်များ၏ လက်ထဲတွင်ပြင်းထန်သော အန္တရာယ်များ ကြုံတွေ့နေရတဲ့ ရခိုင်ပြည်နယ်ရှိ ရိုဟင်ဂျာများအပါအဝင်လူ့အဖွဲ့အစည်း အားလုံးအတွက်စိုးရိမ်စရာကောင်းနေပါတယ်။ အရပ်သားပြည်သူလူထုကိုအကာအကွယ် ပေးရေးတွင် သူတို့ရဲ့တာဝန်ဝတ္တရားတွေကို ထိန်းထိန်းသိမ်းသိမ်းလုပ်ဆောင်ဖို့နဲ့ လေးစားလ ိုက်နာကြဖို့အားလုံးကို တိုက်တွန်းချင်ပါတယ်”ဟု အကြပ်အတည်းစီမံခန့်ခွဲမှု ကော်မရှင်နာJanezLenarčič က ပြောဆိုသည်။

ယခုထပ်မံချထားပေးသောပမာဏသည် ပဋိပက္ခကြောင့် အိုးအိမ်စွန့်ခွာခဲ့ရသူများအား စားစရာ၊အမိုးအကာ၊ ရေသန့်နှင့် အရေးပေါ်ကျန်းမာရေး စောင့်ရှောက်မှုများအတွက်အသက်ကယ် အထောက်အပံ့များ ပေးနိုင်ရန် ကူညီနိုင်မည်ဖြစ်သည်။

ယင်းထပ်လောင်းရန်ပုံငွေသည် မြေမြှုပ်မိုင်းအန္တရာယ်နှင့်ထိတွေ့မှု အနည်းဆုံးဖြစ်စေခြင်းကဲ့သို့သော အန္တရာယ်များသည့်အခြေအနေတွင် မိမိကိုယ်ကို ကာကွယ်နိုင်ရန် အကူအညီပေးနိုင်မည်ဖြစ်သည်။

၂၀၂၁ခုနှစ်တွင်မြန်မာ စစ်တပ်က အာဏာသိမ်းမှုဖြစ်ပွားစဥ်ကတည်းက ဥရောပသမဂ္ဂသည်မြန်မာနိုင်ငံ အကြပ်အတည်းအတွက် အကူအညီများ နှစ်စဥ် တိုးမြှင့်ထားပေးလာရာ၂၀၂၄ ခုနှစ်တွင် ယူရို (၃၆) သန်းရှိပြီဖြစ်သည်။ Source/European Union