တနင်္ဂနွေ၊ ဇူလိုင်လ ၁၄ရက်၊ ၂၀၂၄

မန္တလေးတိုင်း စဉ့်ကူးမြို့နယ်အတွင်းရှိ နောက်ထပ် စခန်း ၅ ခုကို သိမ်းပိုက်


  • ရေးသူ: Web Master
  • | ရက်စွဲ: ၀၉ ဇူလိုင် ၂၀၂၄
  • | ကြည့်ရှုသူ: 522

(ဒုတိယဗိုလ်မှူးကြီး လှိုင်းထွန်းအောင် (OTC-19) အပါအဝင် (၁၅)ဦး အရှင်ဖမ်းဆီးရမိ မန္တလေး PDF သတင်းထုတ်ပြန် )

နိရဉ္စရာ၊ ဇူလိုင် ၈/ ၂၀၂၄

မန္တလေး စဉ့်ကူးမြို့နယ်အတွင်းရှိ နောက်ထပ် စခန်း ၅ ခုကို ပြည်သူ့ကာကွယ်ရေးတပ်မတော် (မန္တလေး)သည် သိမ်းပိုက်လိုက်သဖြင့် ၎င်းမြို့နယ် တစ်ခုတည်းတွင် သိမ်းပိုက်ရရှိသော စခန်းမှာ (၁၁) ခုထိ ရှိလာပြီဖြစ်ကြောင်း သတင်းရရှိသည်။

စစ်ဦးစီးအဖွဲ့ ပြည်သူ့ကာကွယ်ရေးတပ်မတော် (မန္တလေး)၏ ဇူလိုင် ၈ ရက်နေ့ တိုက်ပွဲသတင်းထုတ်ပြန်ချက်တွင် စဉ့်ကူးမြို့နယ်အတွင်းရှိ ရွှေပြည် ရဲစခန်း ၊ လက်ပန်လှ ရဲစခန်း ၊ ကျည်တောက်ပေါက်တပ်စခန်း ၊ ကန်တောင်တပ်စခန်းနှင့် ပင်လယ်ကြီး တပ်စခန်းတို့ကို ထပ်မံသိမ်းပိုက်ရရှိခဲ့သည်ဟု ဖော်ပြသည်။

သို့အတွက် စဉ့်ကူးမြို့နယ်အတွင်း ယခင်သိမ်းပိုက်ရရှိထားသော စစ်ကောင်စီ တပ်စခန်း(၆)ခု အပါအဝင် တပ်စခန်းသိမ်းပိုက်မှု (၁၁)ခုအထိ ရှိခဲ့ပြီဖြစ်သည်ဟု ဆိုသည်။


၎င်းအပြင် စဉ့်ကူးစစ်ဆင်ရေးများအတွင်း စစ်ကောင်စီဘက်မှ သပိတ်ကျင်းမြို့နယ် ဒုတပ်မှူး  ဒုတိယဗိုလ်မှူးကြီး လှိုင်းထွန်းအောင် (OTC-19) အပါအဝင် (၁၅)ဦး အရှင်ဖမ်းဆီးရမိခဲ့ကြောင်း၊  လက်နက်ချ အလင်းဝင်သော ပသစ(ပျူစောထီး)တပ်ဖွဲ့များလည်း ရှိကြောင်း သတင်း ထုတ်ပြန်ချက်တွင် ဖော်ပြသည်။

စဉ့်ကူးစစ်ဆင်ရေးအတွင်း စစ်ကောင်စီမှ လေကြောင်းဖြင့် ချပေးခဲ့သော လက်နက်ခဲယမ်း အထုပ်များအပါအဝင် အခြားသောလက်နက်ခဲယမ်းအများအပြားကိုလည်း သိမ်းဆည်းရမိခဲ့သည်ဟု ဆိုသည်။

စဉ့်ကူးစစ်ဆင်ရေးများတွင် ပြည်သူ့ကာကွယ်ရေးတပ်မတော် (မန္တလေး)အား စဉ့်ကူးမြို့နယ် ပကဖမှ ထောက်ပို့ဆိုင်ရာလုပ်ငန်းများကို ပံ့ပိုးကူညီပေးလျက်ရှိဟု ဖော်ပြထားသည်။ ဓာတ်ပုံ-စစ်ဦးစီးအဖွဲ့ ပြည်သူ့ကာကွယ်ရေးတပ်မတော် (မန္တလေး)


ဆက်စပ် သတင်းများ