နယ်စပ်မှထွက်ပြေးလာသည့် မြန်မာလုံခြုံရေးတပ်ဖွဲ့၀င် များကို ဘင်္ဂလားဒေ့ရှ်က ၄င်း၏နိုင်ငံအတွင်းသို့ ထပ်မံ၀င်ရောက်ခွင့်မပြုတော့ဘဲချက်ခြင်းနှင်လွှတ်ခဲ့ဟု Times of India က သတင်းဖော်ပြ

ဂျွန်နသန်၊ နိရဉ္စရာ၊ ဇူလိုင် ၁၇/၂၀၂၄

ရခိုင် နယ်စပ်မှထွက်ပြေးလာသည့် မြန်မာလုံခြုံရေးတပ်ဖွဲ့၀င် များကို ဘင်္ဂလားဒေ့ရှ်က ၄င်း၏ နိုင်ငံအတွင်းသို့ ထပ်မံ၀င်ရောက်ခွင့်မပြုတော့ဘဲ ချက်ခြင်းဆိုသလို ပြန်လည် နှင်ထုတ်ခဲ့ကြောင်း Times of India က  သတင်းဖော်ပြသည်။

ယခုနှစ်အတွင်း ဘင်္ဂလားဒေ့ရှ်သို့ ထွက်ပြေးလာသည့် မြန်မာလုံခြုံရေးတပ်ဖွဲ့၀င်( ၈၅၀) ကျော်ကို ဘင်္ဂလားဒေ့ရှ်ကလက်ခံခဲ့ပြီး(၇၅၂) ဦးကို မြန်မာနိုင်ငံဆီ ပြန်လည်လွှဲပြောင်း ပေးခဲ့ကာ ကျန်ရှိနေသည့် (၁၀၀)ဦး ခန့်ကိုလည်း နေရပ်ပြန်ပို့ရန် စီစဥ်နေ ကြောင်း၊ ထပ်မံ၀င်ရောက်ဖို့ကြိုးစားလာသည့် မြန်မာ လုံခြုံရေးတပ်ဖွဲ့၀င် များကိုဘင်္ဂလားဒေ့ရှ်ကလက်ခံခြင်းမပြုတော့ဘဲ ချက်ခြင်း၊ မြန်မာနိုင်ငံဘက်ဆီ ပြန်လည်နှင်ထုတ်ခဲ့ကြောင်းသိရသည်။

မြန်မာနိုင်ငံ၊ရခိုင်ပြည်နယ် တွင် အာရက္ခတပ်တော်(AA)နှင့်မြန်မာစစ်တပ်တို့အကြားဖြစ်ပွားနေသည့် တိုက်ပွဲများကြောင့် နယ်စပ်မှ ထွက်ပြေးလာကြသည့် ဒါဇင်နှင့်ချီသော မြန်မာလုံခြုံရေး တပ်ဖွဲ့ဝင်များကို ဘင်္ဂလားဒေ့ရှ် က ၄င်း၏နိုင်ငံအတွင်းသို့ ထပ်မံ၀င်ရောက်လာခြင်းမရှိအောင် တားမြစ်ခဲ့ကြောင်း ဒေသဆိုင်ရာ အစိုးရ အရာရှိတစ်ဦးက ဇူလိုင်လ(၁၆) ရက်က ပြောကြားခဲ့သည်။

အာရက္ခတပ်တော်(AA) သည် မြန်မာ လုံခြုံရေးတပ်ဖွဲ့ဝင်များကို ၂၀၂၃ခုနှစ်၊ နိုဝင်ဘာလအတွင်းက တိုက်ခိုက်ခဲ့ရာ ၂၀၂၁ ခုနှစ်၊ စစ်တပ်က အာဏာသိမ်းပြီးနောက်ပိုင်း အပြင်းထန်ဆုံး တိုက်ပွဲများ ဖြစ်ပွားခဲ့ပြီး၊ အပစ်အခတ်ရပ်စဲရေးသဘောတူချက်သည်လည်းအဆုံးသတ်သွားခဲ့သည်။

ထိုအချိန်မှစ၍ မြန်မာစစ်တပ် နှင့်လုံခြုံရေးတပ်ဖွဲ့ဝင် ရာပေါင်းများစွာသည် အိန္ဒိယနှင့် ဘင်္ဂလားဒေ့ရှ် နိုင်ငံအတွင်းသို့ ပြေး၀င် ခိုလှုံခဲ့ကြပြီး နေရပ်ပြန်မပို့မီအချိန်အထိ ပုံမှန်အားဖြင့် ရက်သတ္တပတ်များစွာ အဆိုပါနိုင်ငံများတွင် နေထိုင်ခဲ့ကြသည်။

သို့ရာတွင် ဇူလိုင်လ(၁၄)ရက်က မြန်မာနယ်ခြားစောင့်ရဲတပ်ဖွဲ့ (BGP) မှ အဖွဲ့ဝင် (၆၆) ဦးထက် မနည်းသည် နတ်မြစ်ကိုဖြတ်၍ ဘင်္ဂလားဒေ့ရှ်နိုင်ငံသို့ ၀င်ရောက်ရန် ကြိုးပမ်းစဉ် ချက်ခြင်းဆိုသလို ဘင်္ဂလားဒေ့ရှ်က ၄င်းတို့အား မြန်မာနိုင်ငံဖက်ဆီ ပြန်လည် နှင်လွှတ်ခဲ့သည်။

မြန်မာစစ်တပ်မှတပ်ဖွဲ့၀င်များနှင့်နယ်ခြားစောင့်ရဲ တပ်ဖွဲ့၀င်များလိုက်ပါလာသည့်စက်လှေ များသည် တက်ကနကမြို့ရှိ ဆိပ်ခံတံတားအနီးသို့ ရောက်ရှိလာခဲ့သော်လည်း ဘင်္ဂလားဒေ့ရှ်က လက်မခံတော့ဘဲ ညပိုင်းတွင် မြန်မာနိုင်ငံဘက်သို့ ပြန်လည် နှင်လွှတ်ခြင်းခံရကြောင်း မြန်မာစက်လှေများကို ဓာတ်ပုံ ရိုက်ယူခဲ့သည့် တက္ကနတ်မြို့အခြေစိုက် သတင်းထောက်တစ်ဦးက ပြောကြားခဲ့သည်။

"မြန်မာနယ်ခြားစောင့်ရဲတပ်ဖွဲ့(BGP) အဖွဲ့ဝင်တွေဟာ စက်လှေနှစ်စင်းတက္ကနတ် ထဲ ဝင်ရောက် ဖို့ ကြိုးစားခဲ့တာပါ။ ကမ်းခြေစောင့်တပ်က သူတို့ဝင်ရောက်လာမှုကို တားဆီးခဲ့ပါတယ်” ဟု တက်ကနက် မြို့ ၏ ကောင်စီဝင် မူဂျီဘာရာမန်က ပြောဆိုခဲ့သည်။

ဘင်္ဂလားဒေ့ရှ် ကမ်းခြေစောင့်တပ်နှင့် မြန်မာစစ်အစိုးရတို့က အဆိုပါဖြစ်စဥ်နှင့်ပတ်သက်ပြီး တစုံတရာ မှတ်ချက်ပြုပြောကြားခြင်းမရှိပေ။

ယခုနှစ်အတွင်း ဘင်္ဂလားဒေ့ရှ်သို့ ထွက်ပြေးလာသည့် မြန်မာစစ်သား ၈၅၀ ကျော်ကို လက်ခံခဲ့သည်ဟု အမည်မဖော်လိုသည့် ဘင်္ဂလားဒေ့ရှ်အစိုးရ၏ အရာရှိတစ်ဦးက ပြောကြားခဲ့သည်။

“သူတို့ထဲက ၇၅၂ ဦးကို မြန်မာနိုင်ငံကို လွှဲပေးပြီးပါပြီ၊ ကျန်ရှိနေသေးတဲ့ နယ်ခြားစောင့် ရဲတပ်ဖွဲ့နဲ့ စစ်တပ်မှတပ်ဖွဲ့ဝင် ၁၀၀ ခန့်ကိုလည်း နေရပ်ပြန်ပို့ဖို့ စီစဥ်နေ ပါတယ်" ဟု ၎င်းက ဆက်လက် ပြောဆိုခဲ့သည်။

ယခုအခါ နယ်စပ်မှထွက်ပြေးလာသည့်မြန်မာနယ်ခြားစောင့်ရဲတပ်ဖွဲ့နှင့်စစ်တပ်မှတပ်ဖွဲ့ဝင် များကို ဘင်္ဂလားဒေ့ရှ်က ၄င်း၏နိုင်ငံအတွင်းသို့ ထပ်မံ၀င်ရောက်ခွင့်မပြုတော့ဘဲ မြန်မာနိုင်ငံဘက်ဆီ ပြန်လည်နှင်ထုတ်ခဲ့ခြင်းဖြစ်ကြောင်းသိရသည်။ Source/ Times of India