တရုတ်ကွန်မြူနစ်ပါတီ၏ ဖိတ်ကြားချက်ဖြင့် မြန်မာ့နိုင်ငံရေးပါတီ ၄ ခု တရုတ်နိုင်ငံသို့ထွက်ခွာ

(AFP ပါတီကို  ဒေါက်တာအေးမောင်ဦးဆောင်လိုက်ပါသွား)

မောင်စာဂ၊ နိရဥ္စရာ၊ ဇူလိုင် ၂၁/ ၂၀၂၄

တရုတ်ကွန်မြူနစ်ပါတီ၏ ဖိတ်ကြားချက်အရ မြန်မာ့နိုင်ငံရေးပါတီ ၄ ခုသည် တရုတ်နိုင်ငံသို့ ယမန်နေ့က လေကြောင်းခရီးဖြင့် ထွက်ခွာသွားကြပြီဟု သိရသည်။

တရုတ်နိုင်ငံသို့ ထွက်ခွာသွားကြသည့်ပါတီ ၄ ခုမှာ ရခိုင်မှ ဒေါက်တာအေးမောင်ဦးဆောင်သည့် ရခိုင့်ဦးဆောင်ပါတီ(AFP)၊ ပြည်မဘက်မှ ဦးခင်ရီဦးဆောင်သော ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)၊ ဦးကိုကိုကြီးဦးဆောင်သော ပြည်သူ့ပါတီ(PP)နှင့် စိုင်းအိုက်ပေါင်း ဦးဆောင်သော ရှမ်းတိုင်းရင်းသားများ ဒီမိုကရက်တစ်ပါတီ(SNDP)တို့ဖြစ်ကြသည်။

အဆိုပါပါတီများသည် ယမန်နေ့ ဇူလိုင်လ ၂၀ ရက်၊ ညနေ ၃ နာရီကျော်တွင် ရန်ကုန်လေဆိပ်မှ တဆင့် ထွက်ခွာသွားကြခြင်းဖြစ်သည်ဟု USDP နှင့် ပြည်သူ့ပါတီတို့၏ လူမှုကွန်ရက် စာမျက်နှာများတွင် ယမန်နေ့က ရေးသားထုတ်ပြန်ထားသည်။

USDP ၏ထုတ်ပြန်ချက်တွင် "ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ဒုတိယဥက္ကဋ္ဌ ဦးလှထွန်း ဦးဆောင်သော အဖွဲ့ဝင် (၉)ဦးပါ ကိုယ်စားလှယ်အဖွဲ့သည် တရုတ်ကွန်မြူနစ်ပါတီက ဖိတ်ကြားချက်အရ တရုတ်ပြည်သူ့သမ္မတနိုင်ငံသို့ ၂၀၂၄ ခုနှစ်၊ ဇူလိုင်လ၊ ၂၀ ရက်နေ့မှ ၂၇ ရက်နေ့ထိ လေ့လာရေးခရီးသွားရောက်ရန် ယနေ့ မွန်းလွဲ ၃ နာရီ ၁၀ မိနစ်အချိန်တွင် လေယာဥ်အမှတ် - 9642၊ ရန်ကုန်အပြည်ပြည်ဆိုင်ရာလေဆိပ်မှ ထွက်ခွာသွားခဲ့သည်"ဟု ရေးသားထားသည်။

အလားတူ ပြည်သူ့ပါတီ၏ထုတ်ပြန်ချက်တွင်လည်း "တရုတ်ပြည်သူ့သမ္မတနိုင်ငံ၊ တရုတ်ကွန်မြူနစ်ပါတီ၏ ဖိတ်ကြားချက်အရ ပြည်သူ့ပါတီမှ ဥက္ကဋ္ဌ ဦးကိုကိုကြီးနှင့်  ဗဟိုအမျိုးသမီးနှင့်ကလေးသူငယ်ရေးရာ တာဝန်ခံ ဒေါ်စန္ဒာဝင်း၊ ဗဟိုကော်မတီဝင် ဦးစိုင်းသန်းထိုက်တို့သည် တရုတ်ပြည်သူ့သမ္မတနိုင်ငံသို့ ၂၀၂၄ ခုနှစ်၊ ဇူလိုင်လ၊ ၂၀ ရက်နေ့မှ ၂၇ ရက်နေ့ထိ လေ့လာရေးခရီးသွားရောက်ရန် ယနေ့ မွန်းလွဲ ၃ နာရီ အချိန်တွင် ရန်ကုန်အပြည်ပြည်ဆိုင်ရာလေဆိပ်မှ ထွက်ခွာသွားခဲ့ပါသည်"ဟု ဖော်ပြထားသည်။

ယခုခရီးစဥ်တွင် USDP ပါတီမှ ဒုတိယဥက္ကဋ္ဌ ဦးလှထွန်းဦးဆောင်သော အဖွဲ့ဝင် (၉)ဦး၊ AFP ပါတီမှ ဥက္ကဋ္ဌဒေါက်တာအေးမောင်အပါအဝင် ၃ ဦး၊ ပြည်သူ့ပါတီမှ ဥက္ကဋ္ဌဦးကိုကိုကြီး အပါအဝင် ၃ ဦးနှင့် SNDP ပါတီမှ ၃ ဦးတို့ လိုက်ပါသွားခဲ့ကြကြောင်း သိရသည်။

အဆိုပါတီများ၏ယခုခရီးစဥ်သည် ဇူလိုင်လ ၂၀ ရက်မှ ၂၇ ရက်အထိ ၈ ရက်တာ ကြာမြင့်မည်ဖြစ်ပြီး ခရီးစဥ်အတွင်း ကုန်ကျစရိတ်များကိုလည်း တရုတ်နိုင်ငံဘက်မှ ကျခံမည်ဟု သိရသည်။

ယခုခရီးစဉ်အတွင်း တရုတ်နိုင်ငံရှိ ယူနန်နှင့် ရှန်ဟိုင်းသို့ သွားရောက်ကာ ကျေးလက်ဒေသ ဖွံ့ဖြိုးရေးနှင့် တရုတ်၏ခေတ်သစ် ပိုးလမ်းမစီမံကိန်း အကောင်အထည်ဖော်ရေး တရုတ်နိုင်ငံက ကျွမ်းကျင်သူများနှင့် အမြင်သဘောချင်းဆွေးနွေးဖလှယ်သွားမည်ဟု တရုတ်ကွန်မြူနစ်ပါတီ၏ ဖိတ်ကြားစာတွင် ရေးသား ဖော်ပြထားကြောင်း သိရသည်။

အဆိုပါ တရုတ်ခေတ်သစ်ပိုးလမ်းမစီမံကိန်းတွင် ရခိုင်မှ ကျောက်ဖြူရေနက်ဆိပ်ကမ်း သည်လည်း အစိတ်အပိုင်းတခုအဖြစ်ပါဝင်ပြီး ထိုစီမံကိန်းအတွက် အမေရိကန်ဒေါ်လာ ၁ ဒသမ ၃ ဘီလီယံအသုံးပြုရန် လျာထားသည်ဟု သိရသည်။

ယခုခရီးစဥ်အတွင်း တရုတ်ကွန်မြူနစ်ပါတီနှင့် ဆက်ဆံရေး တိုးမြှင့်နိုင်မည်ဟု မျှော်လင့်ကြောင်း AFP ဥက္ကဋ္ဌ ဒေါက်တာအေးမောင်က ဇူလိုင် ၁၆ ရက်တွင် VOA သတင်းဌာနကို ထုတ်ဖော်ပြောဆိုထားသည်။

"ကျနော်တို့က ယူနန်မှာ ၂၄ မနက်ပိုင်းထိရှိနေမယ်။ ဒီကနေ ၂၀ ရက်နေ့သွားမယ်။ ၂၄ မှာလေယာဉ်စီးပြီး ဘေဂျင်းရောက်မယ်။ ၂၇ ပြန်လာမယ်။ ယူနန်မှာကျတော့ တရုတ်ကွန်မြူနစ်ပါတီ ကျေးလက်ပါတီတည်ဆောက်ပုံကို လေ့လာမယ်။ သူတို့ပါတီ စီးပွားရေးဘာညာကအစပေါ့။ ပြီးရင် တောင်အာရှပြပွဲတက်မယ်။ အဲကနေ ဘေဂျင်းသွားမယ်။ ဘေဂျင်းမှာတော့ နိုင်ငံတကာဆက်ဆံရေးဌာန တရုတ်ကွန်မြူနစ်ပါတီက နိုင်ငံခြားရေး ဒုဝန်ကြီးနဲ့တွေ့မယ်။ ပါတီချင်းဆက်ဆံရေး တိုးမြှင့်ဖို့အကြမ်းဖျင်းဒီလိုဘဲ သတ်မှတ် ထားပါတယ်"ဟု ဒေါက်တာအေးမောင်၏ပြောဆိုချက်ကို VOA တွင် ဖော်ပြထားသည်။

တရုတ်ကွန်မြူနစ်ပါတီသည် စစ်ကောင်စီထံတွင် မှတ်ပုံတင်ထားသည့်နိုင်ငံရေးပါတီများအနက် ယခုပါတီ ၄ ခုကို ဇူလိုင်လ ၈ ရက်က ရွေးချယ်ဖိတ်ကြားခဲ့ခြင်းလည်းဖြစ်သည်။

ပြီးခဲ့သည် ဇူလိုင် ၆ ရက်ကလည်း စစ်ကောင်စီ ဒုတိယခေါင်းဆောင် ဒုတိယဗိုလ်ချုပ်မှူးကြီး စိုးဝင်းသည် တရုတ်နိုင်ငံသို့ သွားရောက်ခဲ့သလို ဇွန်လကုန်ကလည်း သမ္မတဟောင်း ဦးသိန်းစိန်ကို တရုတ်အစိုးရက ဖိတ်ကြားတွေ့ဆုံခဲ့သေးသည်။

ဓာတ်ပုံ - USDP/Facebook, Peopleparty/Facebook)