လိင်ပိုင်းဆိုင်ရာထိပါးနှောင့်ယှက်သည်ဟုဆိုကာ NUG ၏ အိန္ဒိယနိုင်ငံဆိုင်ရာ ကိုယ်စားလှယ် ဆလိုင်းအိုက်ဇက်ခင်ကို ရာထူးမှထုတ်ပယ်

မောင်စာဂ၊ နိရဥ္စရာ၊ သြဂုတ် ၄/၂၀၂၄

ရုံးဝန်ထမ်းအမျိုးသမီးတစ်ဦးအပေါ် လိင်ပိုင်းဆိုင်ရာထိပါးနှောင့်ယှက်သည်ဟုဆိုကာ အမျိုးသားညီညွတ်ရေးအစိုးရ(NUG)၏ နိုင်ငံခြားရေးဝန်ကြီးဌာန၊ အိန္ဒိယနိုင်ငံဆိုင်ရာ ကိုယ်စားလှယ် ဆလိုင်းအိုက်ဇက်ခင်ကို ရာထူးမှထုတ်ပယ်လိုက်ကြောင်း NUG က ထုတ်ပြန်လိုက်သည်။

လိင်ပိုင်းဆိုင်ရာ ထိပါးနှောင့်ယှက်သည်ဆိုသည့် တိုင်ကြားချက်ကြောင့် တာဝန်မှ ယာယီရပ်ဆိုင်းခံထားရသည့် ဆလိုင်းအိုက်ဇက်ခင်ကို ဩဂုတ် ၁ ရက်၊ နံနက်ပိုင်းမှစပြီး ရာထူးမှ ထုတ်ပယ်လိုက်ကြောင်း ယမန်နေ့ သြဂုတ်လ ၃ ရက်တွင် NUG က တရားဝင် ထုတ်ပြန်လိုက်ခြင်းဖြစ်သည်။

NUG ၏ထုတ်ပြန်ချက်တွင် "အမျိုးသားညီညွတ်ရေးအစိုးရ၊ နိုင်ငံခြားရေးဝန်ကြီးဌာန၊ အိန္ဒိယသမ္မတနိုင်ငံ ဆိုင်ရာကိုယ်စားလှယ်ရုံး၊ ကိုယ်စားလှယ်တစ်ဦးဖြစ်သူ ဆလိုင်းအိုက်ဇက်ခင်နှင့်ပက်သက် သည့် တိုင်ကြားစာကိစ္စ နှင့်စပ်လျဉ်း၍ လိင်ပိုင်းဆိုင်ရာထိပါး နှောင့်ယှက်ခြင်း၊ အမြတ်ထုတ် ခြင်းနှင့် မဖွယ်မရာပြုမူခြင်းဆိုင်ရာ အကာအကွယ်ပေးရေးမူဝါဒ ဗဟိုကော်မတီ၏ သုံးသပ် ဆုံးဖြတ်ချက်များနှင့်အညီ ကိုယ်စားလှယ် ဆလိုင်းအိုက်ဇက်ခင်အား ၂၀၂၄ ခုနှစ် ဩဂုတ်လ (၁) ရက်နေ့ နံနက်ပိုင်းမှ စတင်၍ ရာထူးမှ ထုတ်ပယ်လိုက်ပြီးဖြစ်ပါကြောင်း အသိပေးထုတ်ပြန်အပ်ပါသည်"ဟု ဖော်ပြထားသည်။

NUG နိုင်ငံခြားရေးဝန်ကြီးဌာန၊ အိန္ဒိယနိုင်ငံဆိုင်ရာကိုယ်စားလှယ်ရုံးတွင် အတွင်းရေးမှူးအဖြစ် (၁၀) လကြာ တာဝန်ထမ်းဆောင်ခဲ့သည့် အမျိုးသမီးတစ်ဦးသည် တာဝန်ထမ်းဆောင်နေစဉ် ဆလိုင်းအိုက်ဇက်ခင်က သူ့အပေါ် လိင်ပိုင်းဆိုင်ရာ စိတ်အနှောင့် အယှက်ဖြစ်စေမှုများ၊ လုပ်ငန်းခွင်အတွင်း အထက်လူကြီးမပီသစွာ ဝန်ထမ်းအပေါ် နှိမ့်ချပြောဆို ဆက်ဆံမှုများပြုလုပ်ခဲ့ခြင်းကြောင့် ပြီးခဲ့သည့် မတ်လ ၈ ရက်တွင် NUG နိုင်ငံခြားရေးဝန်ကြီးဌာနထံ စတင် တိုင်ကြားခဲ့သည်ဟု သိရသည်။

ထိုတိုင်ကြားစာနှင့်ပတ်သက်ပြီး လိင်ပိုင်းဆိုင်ရာ ထိပါးနှောင့်ယှက်ခြင်း၊ အမြတ်ထုတ်ခြင်းနှင့် မဖွယ်မရာပြုမူခြင်းဆိုင်ရာ အကာအကွယ်ပေးရေးမူဝါဒ ဗဟိုကော်မတီ၏ သုံးသပ်ဆုံးဖြတ်ချက်များနှင့်အညီ ဆလိုင်းအိုက်ဇက်ခင်ကို ရာထူးမှ
ထုတ်ပယ်လိုက်ခြင်းဖြစ်သည်။

စစ်ဆေးခဲ့သည့် ကော်မတီ၏ထုတ်ပြန်ချက်တွင်လည်း စာရွက်စာတမ်းသက်သေ၊ လူသက်သေနှင့် မျက်မြင်သက်သေများ၏ ထွက်ဆိုချက်များအရ ကာယကံရှင် မလိုလား မနှစ်သက် စိတ်အနှောင့်အယှက်ကြီးစွာ ဖြစ်ရသည့်အပြုအမူများကို ကြိမ်ဖန်များစွာ ထပ်တလဲလဲ လုပ်ခဲ့သည်ဆိုသည်မှာ ထင်ရှားသည့်အတွက် ဆလိုင်းအိုက်ဇက်ခင်သည် လိင်ပိုင်းဆိုင်ရာ ထိပါးနှောင့်ယှက်ခြင်း အမှန်တကယ် ကျူးလွန်ခဲ့သည်ဟု သုံးသပ်ကြောင်း ဖော်ပြထားသည်။

"မြန်မာ့တော်လှန်ရေးအစိုးရရုံးမှာ တာဝန်ခံရမယ့် တာဝန်အရှိဆုံးပုဂ္ဂိုလ်ရဲ့ ပဋိပက္ခကာလအတွင်း လိင်ပိုင်းဆိုင်ရာ ထိပါးနှောင့်ယှက်မှု၊ တာဝန်ကင်းမဲ့မှုဖြစ်ပြီး အထူးသဖြင့် ကာကွယ်ပေးဖို့ တာဝန်အရှိဆုံးသူက ကျူးလွန်တာကြောင့် လုံးဝလက်မခံဘဲ ထိရောက်စွာ တုံ့ပြန်ရမဲ့ကိစ္စ ဖြစ်တယ်"ဟု ဖော်ပြထားသည်။

ကာယကံရှင်အမျိုးသမီး၏တိုင်ကြားမှုနှင့်ပတ်သက်ပြီး NUG နိုင်ငံခြားရေးဝန်ကြီးဌာနက ဆလိုင်းအိုက်ဇက်ခင်ကို အလားတူကိစ္စရပ်များ ထပ်မံမဖြစ်ပွားရန် နှုတ်ဖြင့်သတိပေးခဲ့ပြီးနောက် ဇွန်လကုန်ပိုင်းတွင် သူ့ကို နိုင်ငံခြားရေးဝန်ကြီးဌာနက ရာထူးမှ ယာယီရပ်ဆိုင်းခဲ့သည်ဟု သိရသည်။

နစ်နာသူအမျိုးသမီးအနေဖြင့် NUG နိုင်ငံခြားရေးဝန်ကြီးဌာန၏ဆုံးဖြတ်ချက်ကို လက်ခံနိုင်ခြင်းမရှိခြင်းကြောင့် မိမိသဘော ဆန္ဒအလျောက် မေလ ၁၄ ရက်တွင် အလုပ်ရာထူးမှ နှုတ်ထွက်ခဲ့သည်ဟုလည်း သိရသည်။

ယခုဖြစ်စဉ်နှင့်ပတ်သက်ပြီး ဆလိုင်းအိုက်ဇက်ခင်က ပြီးခဲ့သည့် ဇွန်လ ၂၄ ရက်က မဇ္စျိမသတင်းဌာနနှင့် အင်တာဗျူးတစ်ခုတွင် ဌာနတွင်းတွင် မိသားစုဝင်၊ မိဘ မောင်နှမ ဆက်ဆံရေးသာရှိခဲ့ပြီး တိုင်တန်းသူ အမျိုးသမီးအပေါ်မှာ ဖခင်ကဲ့သို့ ဂရုစိုက်မှုသာ ရှိခဲ့သည်ဟု ပြန်လည်ဖြေကြားခဲ့သည်။

ဆလိုင်းအိုက်ဇက်ခင်သည် Gender and Development Institute-Myanmar တည်ထောင်သူဖြစ်ပြီး NLD အစိုးရလက်ထက်တွင် ချင်းပြည်နယ် အစိုးရအဖွဲ့ဝင် စည်ပင်သာယာရေး၊ လျှပ်စစ်နှင့် စက်မှုလက်မှုဝန်ကြီး အဖြစ် ၂၀၁၆ မှ ၂၀၁၈ အထိ တာဝန်ထမ်းဆောင်ခဲ့သူဖြစ်သည်။

၂၀၁၈ ခုနှစ်၊ မေလ ၁၈ ရက်တွင် မိမိဆန္ဒအလျောက် ရာထူးမှ နှုတ်ထွက်ခဲ့သည်ဟုလည်း သိရသည်။

ဓာတ်ပုံ - လူမှုကွန်ရက်