မင်းဘူး-အမ်းကားလမ်းမပေါ် တိုက်ပွဲဖြစ်၍ စစ်ကောင်စီတပ်ဖွဲ့ဝင် ၂ ဦး သေဆုံး

မောင်စာဂ၊ နိရဥ္စရာ၊ ဩဂုတ် ၂၈/ ၂၀၂၄

မကွေးတိုင်း၊ ငဖဲမြို့နယ်ရှိ မင်းဘူး- အမ်းကားလမ်းမပေါ်တွင် စစ်ကောင်စီတပ်နှင့် ချင်းတော်လှန်ရေး ပူးပေါင်းတပ်တို့ ထိတွေ့ တိုက်ပွဲဖြစ်ပွားရာမှ စစ်ကောင်စီတပ်ဖွဲ့ဝင် ၂ ဦး သေဆုံးသွားကြောင်း သိရသည်။

ဩဂုတ်လ ၁၉ ရက်၊ နံနက် ၁၁ နာရီခွဲခန့်က မင်းဘူး- အမ်းကားလမ်းမပေါ်ရှိ တုံးကြီးကျေးရွာ အနီး လက်ဖက်ခြံစခန်းကုန်းပေါ်တွင် တပ်စွဲထားသော စစ်ကောင်စီတပ်သည် လင်းတဲကျေးရွာ ဘက်သို့ အင်အား ၂၀ ခန့်ဖြင့် ကင်းရှည်ထွက်လာစဉ် အရှိုချင်းကာကွယ်ရေးတပ် (ACDF) အပါအဝင် တော်လှန်ရေးပူးပေါင်းတပ်နှင့် ထိတွေ့တိုက်ပွဲဖြစ်ပွားခဲ့သည်ဟု ACDF က သြဂုတ် ၂၆ ရက်တွင် သတင်းထုတ်ပြန်ထားသည်။

စစ်ကောင်စီဘက်က ထိခိုက်ဒဏ်ရာ ရရှိသူအချို့နှင့် တပ်ဖွဲ့ဝင်အများအပြား တပ်ဆုတ်သွားသည်ဟုလည်း ထုတ်ပြန်ချက်တွင် ဖော်ပြထားသည်။

စစ်ကောင်စီထံမှ MA3 အမျိုးအစား သေနတ်တစ်လက် သိမ်းဆည်းရရှိခဲ့ပြီး မဟာမိတ် ပူးပေါင်းတပ်မှ ထိခိုက်မှုမရှိခဲ့ဟု ဆိုထားသည်။

အဆိုပါတိုက်ပွဲကို ACDF အပါအဝင် New Society Army (NSA) နှင့် People Independent Army (PIA) ပူးပေါင်းတပ်ဖွဲ့က တိုက်ခိုက်ခဲ့ခြင်းဖြစ်သည်ဟု သိရသည်။

စစ်ကောင်စီတပ်သည် ငဖဲမြို့နယ်၊ အရှိုချင်းကျေးရွာ တောင်ပေါ် ဆယ်အုပ်စုအတွင်းရှိ ပြည်သူပိုင် ပစ္စည်းများဖြစ်သော ဆိုင်ကယ်များအား လက်နက်အားကိုးဖြင့် လုယူခြင်း၊ ပြည်သူပိုင် ဥယျာဉ်ခြံအတွင်း သီးနှံများ ခိုးယူစားသုံးခြင်း၊ ပြည်သူများကို ခြိမ်းခြောက်ခြင်းများ မကြာခဏ လုပ်ဆောင်နေကြောင်း ACDF ထုတ်ပြန်ချက်တွင် ဖော်ပြထားသည်။

ACDF သည် မကွေးတိုင်းဒေသကြီး၊ ဧရာဝတီမြစ်အနောက်ခြမ်းရှိ မကွေး - ရခိုင်အစပ်၊ ငဖဲမြို့နယ်တွင် စစ်ရေးလှုပ်ရှားလျက်ရှိသည်ဟု သိရသည်။

ချင်းပြည်နယ်အတွင်း စခန်းသိမ်းတိုက်ပွဲများ၊ မြို့သိမ်းတိုက်ပွဲများတွင် ချင်းပြည်ကောင်စီ လက်အောက်ခံ ချင်းတော်လှန်ရေးတပ်များနှင့် လက်တွဲကာ စစ်ကောင်စီကို တိုက်ခိုက်လျက် ရှိသည်ဟုလည်း သိရသည်။

ဓာတ်ပုံ - ACDF