(ပါတီဝင် ၂၁၀၀ ကျော် ဖမ်းဆီးခံထား၇ဟုဆို)

မောင်စာဂ၊နိရဥ္စရာ၊ စက်တင်ဘာ ၁/၂၀၂၄

စစ်ကောင်စီကအမျိုးသားဒီမိုကရေစီအဖွဲ့ချုပ်(NLD)မှလွှတ်တော်ကိုယ်စားလှယ် ၂ဦးနှင့် ပါတီဝင် ၁၀၇ ဦးကိုသတ်ဖြတ်ထားသည်ဟု NLD၏လူ့အခွင့်အရေးမှတ်တမ်း ကောက်ယူရေး အဖွဲ့ (HRDT-NLD) က ထုတ်ပြန်သည်။

သြဂုတ်လ၃၁ ရက်က Zoom မှတဆင့်ကျင်းပသော NLD ၏ ဒုတိယဗဟိုကော်မတီ၏ကြားကာလစတုတ္ထအကြိမ်အစည်းအဝေးသို့ HRDT-NLDကပေးပို့သည့် အစီရင်ခံစာတွင် ထည့်သွင်းဖော်ပြထားခြင်းဖြစ်သည်။

ယင်းသို့ဖော်ပြရာတွင်၂၀၂၁ ခုနှစ်တွင် စစ်အာဏာသိမ်းပြီးနောက် စစ်ကောင်စီက ယခုအချိန်ထိ NLD ပါတီဝင် ၂၁၈၂ဦးကို ဖမ်းဆီးထားသည်ဟုဆိုသည်။

ယင်းအထဲတွင် လွှတ်တော်ကိုယ်စားလှယ် ၁၄၅ဦးအထိပါဝင်နေပြီး လွှတ်တော်ကိုယ်စားလှယ်၂ ဦးနှင့် ပါတီဝင် ၁၀၇ ဦးတို့ စစ်ကောင်စီထံ သတ်ဖြတ်ခံခဲ့ရသည်ဟု အစီရင်ခံစာတွင်ရေးသားထားသည်။

အသတ်ခံလိုက်ရသည့်လွှတ်တော်ကိုယ်စားလှယ်နှစ်ဦးမှာ မည်သူမည်ဝါဖြစ်သည်ကိုအစီရင်ခံစာတွင် တိတိကျကျ ဖော်ပြထားခြင်းမရှိပါ။

သိုသော် အသတ်ခံလိုက်၇သည့် လွှတ်တော်ကိုယ်စားလှယ်၂ ဦးအနက် တစ်ဦးမှာ ဦးဖြိုးဇေယျာသော်ဖြစ်သည်ဟု နိရဥ္စရာက သိရှိထားသည်။

ဦးဖြိုးဇေယျာသော်ကို၈၈ မျိုးဆက်ကျောင်းသား ဦးဂျေမီနှင့်အတူ စစ်ကောင်စီက ၂၀၂၁ ခုနှစ်အတွင်း ရန်ကုန်တွင်ဖမ်းဆီးခဲ့ရပြီးနောက် သူတို့နှစ်ကို အကြမ်းဖက်မှုတိုက်ဖျက်ရေးဥပဒေပုဒ်မ၄၉(က)၊ ၅၀(ဈ)နှင့် ၅၀(ည)တို့အ၇ သေဒဏ်ချမှတ်လိုက်ကြောင်း စစ်ကောင်စီက ၂၀၂၃ ခုနှစ်၊ ဇန်နဝါရီလ ၂၁ ရက်တွင်ထုတ်ပြန်ခဲ့သည်။

HRDT-NLD ၏အစီရင်ခံစာတွင် တိုင်းနှင့်ပြည်နယ်အသီးသီးရှိNLD ပါတီရုံးများ၊လွှတ်တော်ကိုယ်စားလှယ်များနှင့် ပါတီဝင်များ၏နေအိမ်များကိုစစ်ကောင်စီက ဖျက်ဆီးချိတ်ပိတ်ခဲ့မှုအရေအတွက်များကိုလည်းထည့်သွင်းဖော်ပြထားသည်။

ယခု အစီရင်ခံစာပါမှတ်တမ်းများသည်စစ်တပ်ကအာဏာသိမ်းလိုက်သည့် ၂၀၂၁ ခုနှစ်၊ မေလမှစတင်ကာ၂၀၂၄ ခုနှစ်၊ သြဂုတ်လ ၁၅ ရက်အထိ ကောက်ယူထားသည့် မှတ်တမ်းများဖြစ်သည်ဟု HRDT-NLD က ဆိုထားသည်။

"အထက်ပါမှတ်တမ်းများသည် HRDT-NLD အနေဖြင့်လက်လှမ်းမီသလောက်နှင့် တိကျသောမှတ်တမ်းများကိုပြုစုထားခြင်းဖြစ်ပြီးပကတိမြေပြင်တွင် ယခုထက် ပိုမိုများပြားနိုင်ပါသည်"ဟုလည်းထည့်သွင်းဖော်ပြထားသည်။

စစ်ကောင်စီက တစ်နိုင်ငံလုံးရှိနိုင်ငံရေးပါတီများကို ပြီးခဲ့သည့် ၂၀၂၃ ခုနှစ်၊ ဇန်နဝါရီလမှစတင်ကာပြန်လည်မှတ်ပုံတင်ကြရန် ဖိအားပေးခဲ့သော်လည်း NLDသည် ပါတီမှတ်ပုံတင်ခွင့်လျှောက်ထားခြင်းမရှိခဲ့ဟုသိ၇သည်။

ယင်းသို့ပြန်လည်မှတ်ပုံမတင်သည့်ပါတီများကို စစ်ကောင်စီလက်အောက်ခံပြည်ထောင်စုရွေးကောက်ပွဲကော်မရှင်(UEC)ကဖျက်သိမ်းခဲ့ရာ NLD လည်းပါဝင်သွားခဲ့သည်။ NLD ဘက်ကမူ စစ်ကောင်စီ၏ယင်းသို့ဖျက်သိမ်းမှုမှာ တရားဝင်မှုမရှိဘဲ NLDတည်ရှိနေဆဲဖြစ်သည်ဟုထုတ်ပြန်ခဲ့သည်။