TNLA ထံ ပေးစာနှင့်ပတ်သက်ပြီး တရုတ်၏ရိုင်းပျစွာခြိမ်းခြောက်စော်ကားမှုကို ပြင်းထန်စွာရှုတ်ချကြောင်း NUCC နှင့် AFCC ကြေညာချက်ထုတ်ပြန်

မောင်စာဂ၊ နိရဥ္စရာ၊ စက်တင်ဘာ ၂/၂၀၂၄

ရှမ်းမြောက်ဒေသတွင် အပစ်အခတ်ရပ်စဲပေးရန် တအာင်းတပ်မတော်(TNLA)ထံ တစ်ဘက်သတ် စာပေးပို့ခြိမ်းခြောက်ခဲ့သည့် တရုတ်၏လုပ်ရပ်ကို ကန့်ကွက်ရှုတ်ချကြောင်း အဖွဲ့အစည်းအချို့က ထုတ်ပြန်လိုက်သည်။

အာဏာရှင်စနစ်ဆန့်ကျင်ရေးပြည်သူ့အင်အားများ  ချိတ်ဆက်ညှိနှိုင်းရေး ကော်မတီ (မန္တလေး) (AFCC)က ယနေ့ စက်တင်ဘာလ ၁ ရက်တွင်လည်းကောင်း၊ အမျိုးသားညီညွတ်ရေး အတိုင်ပင်ခံကောင်စီ(NUCC)က ယမန်နေ့ သြဂုတ် ၃၁ ရက်တွင်လည်းကောင်း အသီးသီး ထုတ်ပြန်လိုက်ခြင်းဖြစ်သည်။

ယင်းနှင့်ပတ်သက်ပြီး အမျိုးသားညီညွတ်ရေးအတိုင်ပင်ခံကောင်စီ(NUCC)၏ ယမန်နေ့ ထုတ်ပြန်ချက်တွင် TNLA ထံပေးပို့သည့် စာပါအချက်အလက်များအရ ကြောက်ရွံ့ကျိုးနွံမှုနှင့် ဆုံးမသွန်သင်နည်းလမ်းများကို ပိုမိုလုပ်ဆောင်မည်ဟု ရိုင်းပျစော်ကားသည့် အသုံးအနှုန်းဖြင့် ရေးသားထားသည်ကိုတွေ့ရကြောင်း ဖော်ပြထားသည်။

NUCC က "အမျိုးသားညီညွတ်ရေးအတိုင်ပင်ခံကောင်စီအနေဖြင့် မိမိတို့၏ မဟာမိတ် တော်လှန်ရေး အင်အားစုတစ်ခုဖြစ်သည့်အပြင် အချုပ်အခြာအာဏာပိုင် လူမျိုးတစ်မျိုး ဖြစ်သည့် တအာင်းအမျိုးသားတို့၏တပ်မတော်အပေါ်နှင့် မိမိတို့ပြည်သူများ၏ တော်လှန်ရေး အပေါ် ယခုကဲ့သို့ ရိုင်းပျစွာ ခြိမ်းခြောက်စော်ကားမှုကို ပြင်းထန်စွာရှုတ်ချသည်"ဟုလည်း ဆိုထားသည်။

ယင်းအပြင် မြန်မာတစ်နိုင်ငံလုံးကိုသော်လည်းကောင်း၊ နိုင်ငံအတွင်းရှိ လူမျိုးတစ်မျိုး၊ ပြည်နယ်တစ်ခု၊ နယ်မြေဒေသတစ်ခုကိုသော်လည်းကောင်း၊ မည်သည့်တိုင်းတစ်ပါးနိုင်ငံကမှ နိုင်ငံရေးအရဖြစ်စေ၊ စစ်ရေးအရဖြစ်စေ၊ ခြိမ်းခြောက်အကျပ်ကိုင် ကန့်သတ်ပိတ်ပင် ဟန့်တားခြင်းများ ပြုလုပ်ခွင့်မရှိဟု NUCC ၏ ထုတ်ပြန်ချက်က ဆိုသည်။

ယင်းကြောင့် ရွှေလီမြို့အမျိုးသားလုံခြုံရေးကော်မတီအနေဖြင့် စာပေးပို့မှုကိုရုပ်သိမ်းရန်၊ မြန်မာနိုင်ငံနှင့် သက်ဆိုင်ရာလူမျိုးများ၊ ပြည်သူများအပေါ် နိုင်ငံတကာဥပဒေများ၊ ကျင့်ဝတ်များနှင့်အညီ လေးစားအသိအမှတ်ပြုရန်လည်း NUCC က တိုက်တွန်းထားသည်။

NUCC က "မြန်မာနိုင်ငံရှိ လူမျိုးစုံပြည်သူများသည် ငြိမ်းချမ်းရေး၊ ဖွံ့ဖြိုးရေးတို့အပြင် အိမ်နီးချင်းနိုင်ငံများနှင့် ချစ်ကြည်ရင်းနှီးမှုကို အထူးတန်ဖိုးထားလိုလားသူများဖြစ်ပြီး စစ်အာဏာရှင်များ၏ ရက်စက်ကြမ်းကြုတ်မှုများ၊ မတရားဖိနှိပ်မှုများကြောင့် မလွှဲမရှောင်သာဘဲ တော်လှန်ရေးဆင်နွှဲနေရခြင်းသာဖြစ်သည်"ဟုလည်း ထုတ်ပြန်ချက်တွင် ရေးသားထားသည်။

တရုတ်ပြည်သူ့သမ္မတနိုင်ငံနှင့် နယ်စပ်ဒေသ အာဏာပိုင်များအနေဖြင့် မြန်မာနိုင်ငံမှ လူမျိုးစုံပြည်သူများ စစ်တပ်၏ မတရားအနိုင်ကျင့်ခံနေရမှုကို စာနာနားလည်၍ ကူညီပံ့ပိုးပေးခြင်းဖြင့် ဆွေမျိုးပေါက်ဖော် ချစ်ကြည်ရင်းနှီးမှုကို ပိုမိုခိုင်မြဲစေရန် ကြိုးစားသင့်ကြောင်းလည်း NUCC က အကြံပြုတိုက်တွန်းထားသည်။

မြန်မာနိုင်ငံမြောက်ပိုင်းရှိ ခုခံတော်လှန်တွန်းလှန်နေသည့် မဟာမိတ်အင်အားစုများ၏ စစ်ရေးလှုပ်ရှားမှုများအပေါ် အတင်းအဓမ္မ ဖိအားပေး ရပ်တန့်စေသည့် တရုတ်၏ ကြိုးပမ်းမှုအားလုံးအပေါ် ပြင်းထန်စွာ ရှုတ်ချကန့်ကွက်သည်ဟု AFCC ၏ထုတ်ပြန်ချက်တွင် ဖော်ပြသည်။

"တရုတ်နိုင်ငံအနေဖြင့် မြန်မာနိုင်ငံ၏ အချုပ်အခြာအာဏာသည် မြန်မာပြည်သူ လူထုထံမှ ဆင်းသက်လာကြောင်းကို သတိပြု၍ ယခုကဲ့သို့ နိုင်ငံတနိုင်ငံ၏ အချုပ်အခြာအာဏာအား ခြိမ်းခြောက် စော်ကားသည့် ဝင်ရောက်စွက်ဖက်သော လုပ်ရပ်မျိုးကို ရှောင်ရှား သင့်ကြောင်းလည်း အသိပေးအပ်ပါသည်"ဟု ဖော်ပြထားသည်။

တရုတ်နိုင်ငံအနေဖြင့် မြန်မာပြည်သူလူထုတစ်ရပ်လုံး၏ ဆန္ဒသဘောထားအား မထီမဲ့မြင်ပြုသည့် ယခုကဲ့သို့ အကြမ်းဖက်စစ်တပ်အား ထောက်ခံသော အပြုအမူ ဆောင်ရွက်မှုများအား လုံးဝမပြုလုပ်ရန်လည်း အလေးအနက် တိုက်တွန်းထားသည်။

ယနေ့ တော်လှန်နေကြခြင်းသည် စစ်အာဏာရှင်စနစ်ပျက်သုဉ်း၍ ဖက်ဒရယ် ဒီမိုကရေစီအရေး တိုက်ပွဲဝင်နေကြခြင်းဖြစ်သည်ကို သတိပြု၍ အာဏာရှင်တို့အား အထောက်အပံ့ဖြစ်သော လုပ်ရပ်များအပါအဝင် အာဏာရှင်တို့အား ပြစ်ဒဏ်ကင်းလွတ်ခွင့်ပေးစေမည့် ငြိမ်းချမ်းရေး ဖြစ်စဉ်များအား နည်းလမ်းပေါင်းစုံဖြင့် ခြိမ်းခြောက်ခြင်း၊ တိုက်တွန်းခြင်းများ ပြုလုပ်နေပါက မြန်မာလူထုနှင့် တရုတ်နိုင်ငံသည် ဝေးကွာ၍ မလိုလားအပ်သော အမုန်းတရားများ ဖြစ်ပွား လာစေမည်ကို သတိချပ်၍ တရုတ်နိုင်ငံအနေဖြင့် မြန်မာပြည်သူတို့၏ ဆန္ဒသဘောထားကို အလေးအနက်ထားစေလိုကြောင်းလည်း AFCC ၏ထုတ်ပြန်ချက်တွင် ရေးသားထားသည်။

ရှမ်းမြောက်ဒေသတွင် စစ်ပွဲများရပ်တန့်ရန် ဖိအားပေးခြိမ်းခြောက်စာတစ်စောင်ကို သြဂုတ် ၂၉ ရက်တွင် တရုတ်နိုင်ငံ၊ ရွှေလီမြို့လုံခြုံရေးကော်မတီက TNLA ထံ ပေးပို့ခဲ့ခြင်းဖြစ်သည်။

အပစ်မရပ်ပါက ဖြစ်လာမည့်အကျိုးဆက်များကို တာဝန်ယူရမည်ဖြစ်ပြီး ကြောက်ရွံ့ကျိုးနွံမှုနှင့် ဆုံးမသွန်သင်နည်းလမ်းများကို ပိုမို လုပ်ဆောင်မည်ဟုလည်း တရုတ်က သတိပေး ရေးသားဖော်ပြထားသည်။

လက်ရှိတွင် တရုတ်ဘက်မှ ပေးပို့သောစာနှင့်ပတ်သက်၍ TNLA တွင် ဗဟိုကော်မတီအတွင်း ဆွေးနွေးနေကြသည်ဟု သိရသည်။

တရုတ်သည် အာဏာသိမ်းစစ်ကောင်စီကို ဖိအားပေးခြင်းမရှိဘဲ TNLA ကိုသာ ဖိအားပေးနေခြင်း ဖြစ်သည်။ TNLA သို့ ပေးပို့သည့်စာမှာ အစစ်ဖြစ်ပြီး တရုတ်အစိုးရသည် တိုင်းရင်းသားလက်နက်ကိုင်အဖွဲ့များ (ERO)  ထံပေးပို့သောစာများတွင် တံဆိပ်တုံးထုလေ့မရှိဟု ဆိုသည်။

လက်ရှိတွင် အာဏာသိမ်းစစ်ကောင်စီသည် လေကြောင်းမှ ဗုံးကြဲတိုက်ခိုက်ခြင်း၊ မြေပြင် စစ်ကြောင်းများက ပြည်သူလူထုကို သတ်ဖြတ်ခြင်း၊ ဓားစာခံအဖြစ် ဖမ်းဆီးခြင်း၊ နေအိမ်များကို မီးရှို့ဖျက်ဆီးခြင်း စသည့် စစ်ရာဇဝတ်မှုများကို ကျူးလွန်လျက်ရှိသည်။

တစ်ဘက်တွင်လည်း TNLA နှင့် တော်လှန်ရေးအဖွဲ့များက ရှမ်းမြောက်ရှိ မြို့များကို တစ်ခုပြီးတစ်ခု သိမ်းပိုက်လျက်ရှိရာ စစ်ဆင်ရေး ၁၀ လခန့်အကြာတွင် အရှေ့မြောက်ပိုင်းတိုင်း စစ်ဌာနချုပ်(ရမခ) အခြေစိုက်ရာ လားရှိုးမြို့အပါအဝင် ရှမ်းမြောက်ဒေသတစ်ခုလုံးနီးပါးကို သိမ်းပိုက်ထားပြီဖြစ်သည်။

မြန်မာ-တရုတ်နယ်စပ်တွင် တိုက်ပွဲများမရှိတော့ဘဲ  TNLA က ပြင်ဦးလွင်မြို့၏ အဓိက ခံစစ်စခန်းလည်းဖြစ်သော  နောင်ချို နှင့်ပြင်ဦးလွင်ကြား တောင်ခမ်းရှိအမြောက်တပ်များကို ထိုးစစ်ဆင်တိုက်ခိုက်သိမ်းပိုက်လျက်ရှိသည်ဟု သိရသည်။

ထိုကြောင့် တိုက်ပွဲများမှာ နယ်စပ်တွင် မဖြစ်တော့ဘဲ ပြင်ဦးလွင်၊ မန္တလေးတိုင်းဘက်သို့ ဦးတည်တိုက်ခိုက်လာချိန်တွင် တရုတ်ဘက်က စစ်ပွဲများကိုချက်ချင်းရပ်တန့်ရန် ပြင်းထန်သည့် ခြိမ်းခြောက်စာ ပေးပို့လာခြင်းလည်းဖြစ်သည်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Mr. Lin Jian ကလည်း "တရုတ်နိုင်ငံက မြန်မာနိုင်ငံ ငြိမ်းချမ်းရေးနဲ့ ပြန်လည်သင့်မြတ်မှုလုပ်ငန်းစဉ်အတွက် အပြုသဘောဆောင်တဲ့ အခန်းကဏ္ဍကနေ ဆက်လက်ပါဝင်ပြီး မြန်မာနိုင်ငံမြောက်ပိုင်းအခြေအနေ အရှိန်လျော့ ကျလာစေရန် မြှင့်တင်ဖော်ဆောင်သွားမှာဖြစ်ပါတယ်"ဟု ပြောဆိုကြောင်း ယမန်နေ့တွင် မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားသည်။