မောင်စာဂ၊နိရဥ္စရာ၊ စက်တင်ဘာ ၂ /၂၀၂၄

စစ်ကောင်စီ၏လာမည့် ၂၀၂၅ ခုနှစ်၊ နိုဝင်ဘာလတွင်ကျင်းပမည့်အတုအယောင် ရွေးကောက်ပွဲကို ဆန့်ကျင်ကြောင်း အမေရိကန်ရောက်ရခိုင်လူမျိုးများအပါအဝင် မြန်မာပြည်သူများက ဆန္ဒပြခဲ့သည်။

အမေရိကန်ပြည်ထောင်စု၊ ကယ်လီဖိုးနီးယားပြည်နယ်၊ဆန်ဖရန်စစ္စကိုမြို့ရှိ မြို့တော်ခန်းမ ရှေ့တွင် သြဂုတ်လ ၃၁ရက်က ပြုလုပ်ခဲ့ခြင်းဖြစ်သည်ဟု သိ၇သည်။

ဆန္ဒပြပွဲကို Free Burma Action Committee-Northern California ကဦးဆောင်ကာ နွေဦးတော်လှန်ရေး အင်အားစုများ၊ ထောက်ပို့ပြည်သူများနှင့်ရခိုင်အပါအဝင် အမေရိကန်ရောက် မြန်မာပြည်သူတို့ကစုပေါင်းပြုလုပ်ခဲ့ကြခြင်းလည်းဖြစ်သည်။

ဆန္ဒပြပွဲတွင်စစ်ကောင်စီကျင်းပမည့် အတုအယောင်ရွေးကောက်ပွဲကိုပုံစံမျိုးစုံဖြင့် ဆန့်ကျင်တိုက်ဖျက်ရန်၊ အထွေထွေအကျပ်အတည်းများကိုလူထုအားဖြင့် အုံကြွ ဖောက်ထွက်ရန်၊တရုတ်နိုင်ငံ ရွှေလီမြို့နိုင်ငံတော်လုံခြုံရေးကော်မတီက တအာင်းတပ်မတော် (TNLA)ထံ ပေးပို့သော ခြိမ်းခြောက်စာနှင့်ပတ်သက်၍နွေဦးတော်လှန်ရေး အင်အားစုများက တရုတ်ကွန်မြူနစ်အစိုးရ၏အချုပ်အခြာအာဏာပိုင် နိုင်ငံအပေါ် မိုက်ရိုင်းစော်ကားသော လုပ်ရပ်များကိုပြင်းပြင်းထန်ထန် ဆန့်ကျင်ကြရန် ထည့်သွင်း တောင်းဆိုခဲ့ကြသည်ဟု သိရသည်။

ထို့အပြင်(၇၉)ကြိမ်မြောက် ကုလသမဂ္ဂ အထွေထွေညီလာခံတွင် မြန်မာသံအမတ်ကြီး ဦးကျော်မိုးထွန်း ဆက်လက်တည်မြဲရေးအတွက် စက်တင်ဘာလအတွင်းကမ္ဘာလုံးဆိုင်ရာ လူထုလှုပ်ရှားမှုများ၊လှုံ့ဆော်တောင်းဆိုမှုများ ပြုလုပ်ရန်လည်း တိုက်တွန်းနှိုးဆော်ခဲ့သည်ဟုသိ၇သည်။

ဓာတ်ပုံ- Free Burma Action Committe