လူထက်နိုင်(ဒွါရာမြီ)၊ နိရဥ္စရာ၊ စက်တင်ဘာ ၃  / ၂၀၂၄

မန္တလေးမြို့အတွင်းရှိနေရာတချို့ အပါအဝင် အလယ်ပိုင်းတိုင်း စစ်ဌာနချုပ်(လပခ)တို့  စက်တင်ဘာ ၃ ရက်နေ့နံနက်အစောပိုင်းတွင် ရှော့တိုက်ဒုံးများဖြင့် ပစ်ခတ် တိုက်ခိုက်ခံခဲ့ရသည်ဟု သတင်းရရှိသည်။

မြို့ခံတစ်ဦးက “ အခုမြို့ထဲမှာအစစ်အဆေးတွေ များနေတယ်။ မနက်ကထဲကလက်နက်ကြီးပစ်သံတွေ  ကြားနေရတော့လူတွေစိုးရိမ်နေကြတယ်။ ထိခိုက်တာတွေရှိတယ်လို့သိရတယ်။ စစ်ပွဲကမြို့ထဲရောက်လာပြီ။ ညောင်ကွဲရပ်ကွက် အကွက် (၅)၊ ၈လမ်းနဲ့ ၉လမ်းကြား ၈၈လမ်းနဲ့၈၉လမ်း ကြားက အိမ်အပေါ်ထပ်နံရံကို လက်နက်ကြီး ဖောက်ဝင် ပေါက်ကွဲတာပါ”ဟု ပြောသည်။

ယနေ့ နံနက် ၄နာရီဝန်းကျင်အချိန်တွင် ပစ်ခတ်မှုဖြစ်ပွားခဲ့ပြီး လမ်း ၈၀×၁၁×၁၂ လမ်း ကြားကိုရီးယား အကြောပြင် တိုက်အပေါ်ဆုံးထပ်သို့ လက်နက်ကြီး တစ်လုံးကျရောက်ခဲ့ပြီးအမိုးပွင့်ထိခိုက်ပျက်စီး သွားကြောင်း 𝑴𝑫𝒀 𝑹𝒆𝒗𝒐𝒍𝒖𝒕𝒊𝒐𝒏ကထုတ်ပြန်ထား သည်။

အမှတ် ၄ရဲစခန်းအရှေ့ဘက်တိုက်သို့ လက်နက်ကြီးကျည်တစ်လုံး ကျရောက်ကာ တိုက်အပေါ် ထပ် အုတ်နံရံ ပျက်စီးသွားကြောင်း၊တတိယတစ်လုံးမှာ ရွှေကျင်တိုးဂိတ်သို့ ကျရောက်ပေါက်ကွဲခဲ့ကြောင်းလည်း 𝑴𝑫𝒀 𝑹𝒆𝒗𝒐𝒍𝒖𝒕𝒊𝒐𝒏 ကသတင်းထုတ်ပြန်ထား သည်။

ထို့အပြင် Brave Warriors forMyanmar (BWM) အဖွဲ့၏စီမံမှုဖြင့် ShadowMandalay အဖွဲ့သည်၂၀၂၄ ခုနှစ်၊ စက်တင်ဘာလ ၃ ရက်၊ မနက် ၄ နာရီ ၈ မိနစ် အချိန်တွင် မန္တလေးရှိ၊အာဏာသိမ်း စစ်ရှုံးကောင်စီ၏ အလယ်ပိုင်းတိုင်း စစ်ဌာနချုပ်(လပခ) အတွင်းသို့ ၁၀၇ မမ ရှော့တိုက်ဒုံး ၁၀ လုံးပစ်ခတ်ခဲ့ရာ ၇ လုံးကိုအောင်မြင်စွာ ပစ်ခတ်တိုက်ခိုက်နိုင်ခဲ့ကြောင်း Brave Warriors forMyanmar (BWM) မှ စက်တင်ဘာ ၃ တွင်ထုတ်ပြန်ထားသည်။

အလယ်ပိုင်းတိုင်းစစ်ဌာနချုပ်(လပခ) သည် တော်လှန်ရေးအင်အားစုများဆင်နွှဲနေသော ၁၀၂၇ ဒုတိယလှိုင်း၊ရှမ်း-မန်း စစ်ဆင်ရေးတွင် အာဏာသိမ်းစစ်ရှုံးကောင်စီဘက်မှ တန်ပြန်ခုခံနေသောစစ်စခန်းများကို အဓိက ကွပ်ကဲနေသည့် အရေးပါ သော စစ်တိုင်းဌာနချုပ် ၂ခုထဲမှတစ်ခုဖြစ်ပြီးတော်လှန်ရေး အင်အားစုများက အဆိုပါ စစ်တိုင်းကွပ်ကဲရေးဌာနချုပ်နှစ်ခုထဲမှ တစ်ခုဖြစ်သည့် အရှေ့မြောက်တိုင်းစစ်ဌာနချုပ် (ရမခ) ကိုဖြိုခွင်း သိမ်းပိုက်နိုင်ခဲ့ပြီး ဖြစ်ကြောင်းထုတ်ပြန်ချက်တွင်ပါရှိသည်။

“BWMအဖွဲ့နှင့်မဟာမိတ်အဖွဲ့များကလည်း တော်လှန်ရေးအင်အားစုများ၏ ၁၀၂၇ ဒုတိယလှိုင်းရှမ်း-မန်းစစ်ဆင်ရေးကို ပူးပေါင်းပါဝင်ကူညီသည့် အနေဖြင့်ကျန်ရှိနေသေးသောအလယ်ပိုင်းတိုင်း စစ်ဌာနချုပ် ဖြိုလဲရန်၁၀၇ မမ ရှော့တိုက်ဒုံး များဖြင့် တိုက်ခိုက်၇ခြင်းဖြစ်ပါသည်။

ယနေ့ မစ်ရှင်သည် BWM နှင့်မဟာမိတ်အဖွဲ့များကအလယ်ပိုင်းတိုင်း စစ်ဌာနချုပ်ကို ဒုတိယ အကြိမ်မြောက် တိုက်ခိုက်သောမစ်ရှင်ဖြစ်ပြီး ၂၀၂၃ ဒီဇင်ဘာကလည်း ပထမ အကြိမ် တိုက်ခိုက်ခဲ့သေးသည်”ဟုထုတ်ပြန်ချက်တွင်ဖော်ပြထားသည်။

BWMအဖွဲ့သည်ရန်သူစစ်ရှုံးကောင်စီ၏ လေတပ်နှင့် အခြားအရေးကြီးသည့် စစ်ရေးပစ်မှတ်များကို အဓိကပစ်မှတ်ထား တိုက်ခိုက်ခြင်းအားဖြင့် နိုင်ငံတဝန်းတော်လှန်ရေးအင်အားစုများနှင့်အတူဟန်ချက်ညီစွာတိုက်ပွဲ ဝင်လျက်ရှိနေကြောင်းသိ၇သည်။

၂၀၂၄ခုနှစ်အတွင်း ကျွနု်ပ်တို့ BWM အဖွဲ့ သည် တော်လှန်ရေးမဟာမိတ်များနှင့်ပူးပေါင်း၍အေလာလေတပ် စခန်း ကို ၂ ကြိမ်၊ တောင်ငူ လေတပ်စခန်းကို ၃ကြိမ်၊ တံတားဦး လေတပ်စခန်းကို ၁ ကြိမ် တိုက်ခိုက်ခဲ့ပြီး ဖြစ်သလို ဆက်လက်၍လည်းစစ်ရှုံး ကောင်စီပြိုလဲသည်အထိ အရှိန်အဟုန်မြှင့်၍ တိုက်ပွဲဝင်သွားမည် ဖြစ်ကြောင်း Brave Warriors forMyanmar (BWM) မှထုတ်ပြန်ထားသည်။

ညောင်ကွဲရပ်ကွက်အကွက် (၅)၊ ၈လမ်းနှင့် ၉လမ်းကြား ၈၈လမ်းနှင့် ၈၉လမ်း ကြားရှိ အိမ်အပေါ်ထပ်နံရံကိုလက်နက်ကြီး ဖောက်ဝင် ပေါက်ကွဲလို့ အဲဒီအခန်းမှာ အခန်းငှား နေထိုင်တဲ့ အသက် ၃၀အရွယ် အမျိုးသားတစ်ဦး ထိခိုက်ဒဏ်ရာ၇ခဲ့ကြောင်းဒေသတွင်းသတင်းများတွင်ဖော်ပြထားသည်။

ဓာတ်ပုံ-မန္တလေးသတင်းများ