မြန်မာစစ်အစိုး၇၏အတင်းအကြပ် စစ်မှုထမ်းခြင်း၊ အသက်ကန့်သတ်ချက်ကိုတိုးချဲ့ခြင်း အပေါ် FORUM-ASIA မှ ရှုတ်ချ
(အရပ်သားများကိုလူသားဒိုင်းအဖြစ် အသုံးပြုခြင်းကို ချက်ချင်းရပ်တန့်ရန် တောင်းဆို)
ဂျွန်နသန်၊ နိရဉ္စရာ၊ စက်တင်ဘာ ၄/၂၀၂၄
မြန်မာစစ်အစိုးရသည်၎င်း၏အတင်းအကြပ် စစ်မှုထမ်းခြင်းမူဝါဒ၏ အသက်ကန့်သတ်ချက်ကို တိုးချဲ့ ရန်မကြာသေးမီက ဆုံးဖြတ်ခဲ့မှုအပေါ် ရှုတ်ချကြောင်းနှင့် နိုင်ငံတကာအသိုက်အဝန်းအားမြန်မာ နိုင်ငံသားများနှင့် အတူစည်းလုံးညီညွတ်စွာ ရပ်တည်ကြရန် FORUM-ASIA မှ တောင်းဆိုလိုက်သည်။
FORUM-ASIA မှသြဂုတ်(၄)ရက်ကကြေညာချက်ထုတ်ပြန်ခဲ့ရာတွင် ထိုသို့ အတင်းအကြပ် စစ်မှု ထမ်းခြင်း၊အသက်ကန့်သတ်ချက်ထပ်မံတိုးမြှင့်လိုက်ခြင်းသည် ပိုမိုကြီးထွားလာနေသောဒီမိုကရေစီ တော်လှန်ရေးလှုပ်ရှားမှုများကို ရင်ဆိုင်ကြုံတွေ့ နေရသည့်စစ်အစိုး၇အနေဖြင့် ၄င်း၏ အာဏာကို ဆက်လက်ထိန်းသိမ်းထားနိုင်ရန်အတွက် ကြိုးပမ်းအားထုတ်မှုတစ်ခု အဖြစ် ရှုမြင်သည်ဟု ဆိုသည်။
မြန်မာစစ်အစိုးရ၏ အတင်းအဓမ္မ စစ်မှုထမ်းခြင်းဥပေဒ ၊ ပြန်ပေးဆွဲမှု၊ အတင်းအဓမ္မ လုပ်အားပေး ခိုင်းစေမှုနှင့်အရပ်သားများကို လူသားဒိုင်းအဖြစ် အသုံးပြုခြင်းကို ချက်ချင်းရပ်တန့်ရန်လည်း FORUM-ASIAမှတောင်းဆိုခဲ့သည်။
၂၀၂၄ခုနှစ် သြဂုတ်လ ၂၅ ရက်နေ့တွင် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကပြည်သူ လူထုပူးပေါင်းပါဝင်သည့်လုံခြုံရေးမူဝါဒအသစ်(ပြည်သူ့လုံခြုံရေးအဖွဲ့ဖွဲ့စည်းခြင်း) ကို ကြေညာခဲ့သည်။
အသက်၃၅နှစ် မှ ၆၀နှစ် အတွင်း ရှိ အမျိုးသားများကိုလုံခြုံရေး အစောင့်များအဖြစ် တာဝန် ထမ်းဆောင်စေ ပြီး ၎င်းတို့အား ပဋိပက္ခဖြစ်ပွားရာ ရှေ့တန်း နေရာတွင်တာဝန်ချထားပေးနိုင်သည်။
(အမှန်မှာအသက်၃၅နှစ် မှ ၆၅နှစ် အတွင်းဖြစ်သည်) ဩဂုတ်လ၁၆ ရက်နေ့တွင် ပြည်သူ့လုံခြုံရေးနှင့် အကြမ်းဖက်မှု တိုက်ဖျက်ရေး ဗဟို ကြီးကြပ်ရေးကော်မတီကို ဖွဲ့စည်းပြီး နောက်ပိုင်းတွင် စစ်ဘက်ဆိုင်ရာ လေ့ကျင့်မှုများပြုလုပ်ရန်နှင့် အုပ်ချုပ်ရေး အဆင့် အသီးသီးရှိ “ပြည်သူ့လုံခြုံရေးနှင့် အကြမ်းဖက်မှု ဆန့်ကျင်ရေး” အဖွဲ့များကိုကြီးကြပ်ကွပ်ကဲရန် တာဝန်ပေးခဲ့သည်။
“မြန်မာစစ်အစိုးရရဲ့လူ့အခွင့်အရေးချိုးဖောက်မှုတွေ ကို စေ့စေ့စပ်စပ် စုံစမ်းစစ်ဆေးဖို့ ကုလသမဂ္ဂနဲ့အာဆီယံအပါအဝင် နိုင်ငံတကာအသိုင်းအဝိုင်းကို FORUM-ASIA ကတိုက်တွန်းလိုက်ပါတယ်။ ပိတ်ဆို့အရေးယူမှုများနဲ့အခြားသော ပြစ်ဒဏ်ခတ်မှုများမှတစ်ဆင့် စစ်အစိုးရကျူးလွန်ခဲ့တဲ့ရာဇဝတ်မှုများအားလုံးကို စစ်အစိုး၇က တာဝန်ယူသင့်တယ်” ဟုFORUM-ASIA ၏ အမှုဆောင် ဒါရိုက်တာ MaryAileen Diez-Bacalso က ပြောကြားခဲ့သည်။
"နိုင်ငံတကာအသိုင်းအဝိုင်းက စစ်အစိုးရကို အထီးကျန်ရေး အရေးတကြီးလုပ်ဆောင် ရပါမယ်။ တရားမျှတမှုနဲ့လွတ်လပ်မှုရရှိရေးကြိုးပမ်းရုန်းကန်နေကြတဲ့ မြန်မာပြည်သူတွေကို နိုင်ငံတကာ အသိုင်းအဝိုင်းကအားပေး ထောက်ခံ၇ပါမယ် " ဟု Bacalso ထပ်လောင်းပြောကြားခဲ့သည်။
၁၉၉၁ခုနှစ်တွင် တည်ထောင်ခဲ့သည့်လူ့အခွင့်အရေးနှင့် ဖွံ့ဖြိုးတိုးတက်ရေးဆိုင်ရာအာရှဖိုရမ် (FORUM-ASIA) သည် အဓိကအားဖြင့်အာရှရှိ နိုင်ငံပေါင်း ၂၃ နိုင်ငံရှိ ၊ အဖွဲ့အစည်းပေါင်း (၈၅) ခုပါဝင်ဖွဲ့စည်းထားသည့်အဖွဲ့တစ်ခုဖြစ်သည်။
ဖိုရမ်-အာရှအတွင်းရေးမှူးချုပ်ရုံးသည် ဘန်ကောက်တွင် အခြေစိုက်ပြီး ဂျကာတာ ၊ ဂျနီဗာနှင့် ခတ္တမန္ဒူ တို့တွင်ရုံးခွဲများ တည်ရှိသည်။ Source/FORUM-ASIA
လှူရန်